Hunza uya ka timhaka ta kona

Tlhela ka xaxameto wa tihloko ta mhaka

Timboni ta Jehovha

Select language ciTshwa

 CIPIMO 101

Jesu a lalela le Bhetaniya laha kaya ka Simoni

Jesu a lalela le Bhetaniya laha kaya ka Simoni

MATEWU 26:6-13 MARKU 14:3-9 JOHANI 11:55–12:11

  • JESU A TLHELA LE BHETANIYA, KUSUHANI NI JERUSALEMA

  • MARIYA A CHULULA MAFURA YO NUHELA LOMU HLOKWENI NI LOMU MIKONDZWENI YA JESU

Laha Jesu a nga suka Jeriko, i noya Bhetaniya, le Mutsuwuka-gambo wa citsunga ca maOlivha. Ka pfhuka lowo ku wa kweliwa cipimo ca 20 wa tikilometro lomu ko karata ku famba kambe. Lazaru ni vamakabye vakwe va vambiri va wa tshama kwalomu Bhetaniya. A cidhoropana leco, ci wa hi ka pfhuka wa 3 wa tikilometro kusukela Jerusalema.

A kutala ka vaJudha ja va wa hi le Jerusalema kasi va yaga Phasika. Va hatlile va chikela ‘kasi va ya ti basisa’, loku ku hi lezvaku va wa henyile cirumbi kutani ku maha nchumu wun’wani lowu a nayo wu nga lava lezvaku va ti basisa. (Johani 11:55; Mitsengo 9:6-10) A vokari va lava va nga hatlile va chikela va no ya tlhangana laha tempeleni. Va wa kari va wutisana ku kani Jesu i tata ku taga Phasika ke. — Johani 11:56.

Ku wa vhukile vhunyi ga hombe xungetano hi Jesu. A varangeli vo kari va wukhongeli va wa lava ku mu khoma kasi va mu daya. Hi lisine, va wa layile vanhu lezvaku loku va tshuka va mu keti, va wa fanele ku va byela, “kasi va fela ku ya mu khoma.” (Johani 11:57) A varangeli lava va wa zamile ku daya Jesu a cikhati a nga vhuxa Lazaru. (Johani 11:49-53) Makunu, zvi wa zwisiseka ku a vanhu va wutisana ku Jesu i ta humelela lomu ka talo wa vanhu ke.

Jesu i no chikela le Bhetaniya hi Wazihlanu, na ku kiyela “ntlhanu wa masiku ni gin’we” kasi ku chikela Phasika. (Johani 12:1) A siku gi nga landzela gi wa hi Sabhadho, 8 ka Nisani. A Sabhadho gi wa sangula hi Wazihlanu loku a gambo gi pela, kala hi Mulongiso loku a gambo gi pela. Makunu, Jesu i chikele Bhetaniya na ka ha hi Wazihlanu futsi, hakuva a nayo wa ciJudha wu wa betela ku a munhu a famba pfhuka wo leha hi Sabhadho. Zva koteka ku Jesu a yile kaya ka va Lazaru, khwatsi hi lezvi a nga tolovela ku maha.

Simoni, loyi yenawu a nga hanya lomu Bhetaniya, i no ramba Jesu ni lava a nga hi navo, zvin’we na Lazaru lezvaku va ya lalela le kaya kakwe hi Mulongiso. Simoni loye, i wa vitaniwa ku hi “loyi wa hlokonho”. Kuzvilava i wa hi mun’we wa lava Jesu a nga va hanyisa. Marta i no kombisa tshamela gakwe kambe, ga kuva munhu wa zvigingi, a tirela vapfhumba.

Kanilezvi Mariya i no kombisa ku khatala ka hombe hi Jesu. Zvini a nga maha? I no vhulula cikhudzana cakwe ca alabhasteri, ci nga hi ni ‘mafura yo nuhela ya spikenardha, ya cipimo ca khihlanya ga kilo.’ (Johani 12:3) A mafura lawo ma wa hi yo dhura nguvhu. A mali ya kona (300 wa madhenariyu) yi wa ringana muholo wa lembe! Mariya i no chulula mafura lawo lomu hlokweni ya Jesu ni lomu mikondzweni, a guma a sula mikondzo hi misisi yakwe. A masema ya ma nene ya mafura lawo ma no tata yindlu yontlhe.

A vapizani va Jesu va no zangara, vaku: “Ma xakelelwa yini a mafura [lawa] ke?” (Marku 14:4)  Judhasi Iskariyoti aku: ‘Hikuyini a mafura lawa ma nga kala ku . . . [xavisiwa hi] 300 wa macheleni [madhenariyu, NM], ku hiwa zvisiwana ke?’ (Johani 12:5) A hi ku khwatsi Judhasi i wo karatekela ku vhuna zvisiwana. I wa tolovela ku yiva lomu ka kaxa gi nga tshama mali ya vapizani.

Jesu i no yimelela Mariya, aku: “Mu mu karatela yini a wasati loyi ke? I ndzi mahele a ntiro wo saseka. A zvisiwana zvi na n’wina cikhati contlhe, kanilezvi a mu na mina cikhati contlhe. Hakuva hi ku chulula lawa mafura mirini wa mina, i zvi mahele kulahliwa ka mina. Hi zvinene ndzi ngalo ka n’wina: Kani hi kwihi laha misaveni laha a ivhangeli leyi yi ta nga kanelwa kona, ku ta kanelwa ni leci a ci mahileko loyi wasati, lezvaku a alakanyiwa ha cona.” — Matewu 26:10-13.

Ka cikhati leco, Jesu i wa hi ni siku na a hi lomu Bhetaniya, niku a mahungu ya ku i kona ma wa hangalakile. Ku nota vaJudha vo tala laha kaya ka Simoni kasi va ta wona Jesu na Lazaru, “loyi [Jesu] a nga mu vhuxile kufeni.” (Johani 12:9) A vapristi va hombe va no xuxa cikungo ca ku daya Jesu na Lazaru. A varangeli lavo va wukhongeli va wa pimisa lezvaku a vanhu vo tala va kholwa ka Jesu hi lezvi va nga wona Lazaru loyi a nga mu vhuxa. Hi nga wona a kubiha ka vona!