Hunza uya ka timhaka ta kona

Tlhela ka xaxameto wa tihloko ta mhaka

Timboni ta Jehovha

Select language ciTshwa

 CIPIMO 78

A nekwa yo tsumbeka yi fanele ku tshama yi longile

A nekwa yo tsumbeka yi fanele ku tshama yi longile

LUKA 12:35-59

  • A WULAWULA HI NEKWA YO TSUMBEKA A TLHELA A VA KUCA KU TSHAMA NA VA LONGILE

  • JESU AKU I TILE KU TA HAMBANISA VANHU

Jesu i wa ha hi ku mbheta ku tlhamusela lezvaku i “ntlhambi wu tsongwani” wa vanhu wu to nghena Mufun’weni wa Nungungulu. (Luka 12:32) Kanilezvi a kuva ni thomo lego a hi nchumu wo hlakana. Makunu, i noya mahlweni a khanyisa lezvaku kasi a munhu ava ni thomo lego ga kuva Mufun’weni wa Nungungulu zva lisima ku ava ni mawonela ma nene.

Hikwalaho, Jesu i no kuca vapizani vakwe lezvaku va tshama na va longile, va rindzela cikhati leci a nga wa ta wuya hi cona. I te: “Ngha na zviwunu zva n’wina zvi bohiwa hi mabhandi, ni tikandiya ta n’wina ti vhura; mu kota vanhu va . . . [rindzelako] a hosi yabye laha yi ta nga wuya hi le mubuzweni; kasi loku yita yi ta gongondza, va fela ku yi vhululela hi cihatla. Ma katekile a malandza lawo a hosi ya wona yi ta nga ta ma kuma na ma lavelele a kuwuyeni ka yona”. — Luka 12:35-37.

A vapizani va Jesu a zvi va karatelangi ku zvi zwisisa ku i wa wula yini hi mufananiso lowo. A malandza lawa a nga ma kumbuka, ma longile niku ma rindzela hosi ya wona lezvaku yi wuya. Jesu i no tlhamusela aku: “Ni loku [a hosi] yi chikela hi cirindzo ca wumbiri [kusukela ma 21 wora kala ma zero wora], kutani hi ca wunharu [kusukela ma zero wora kala ma 3 wora ya kuca], yi ma kuma ma hi nghaho, ma katekile lawo malandza.” — Luka 12:38.

Lezvi Jesu kota N’wana wa munhu a nga ti patsisa zvona ka mufananiso lowo, zvi komba ku i wo kuca vapizani vakwe ku va maha zvo hundza kuva vatiri va zvigingi. I no va byela lezvi: ‘Na n’winawu, . . . tshamani mu longile; hakuva a N’wana wa munhu i ta wuya hi cikhati mu nga ci alakanyiko.’ (Luka 12:40) Hi magezu lawo, Jesu i wo komba lezvaku i wa ta wuya ka cikhati co kari ci nga hata, niku i wa lava ku a ta kuma vapizani vakwe na va longile — nguvhunguvhu lava va “ntlhambi wu tsongwani”.

Pedro i no lava ku zvi zwisisa khwatsi lezvi Jesu a nga wula, a se: “Hosi, a mufananiso lowu u wu kanela ka hina, kutani ni ka vontlhe ke?” Jesu a nga hlamula ciwutiso ca Pedro hi ku kongoma; kanilezvi i no hlawutela mufananiso wa ku yelana ni mhaka leyo, aku: “Himani a nekwa yi kholekileko [“yo tsumbeka,” NM], le’yo tlhariha, leyi a hosi ya yona yi ta nga yi yimisa hehla ka malandza ya yona, kasi ku va avela zvakuga hi cikhati ca kona ke? Gi katekile lego nandza, a hosi ya gona yi ta nga wuya yi ta gi kuma gi kari gi maha lezvo. Hizvinene ndziku ka n’wina: Yi ta gi yimisa a kuva muhlayisi wa zvontlhe lezvi yi nga nazvo.” — Luka 12:41-44.

Ka mufananiso a nga rangile a hlawutela, a “hosi” hi Jesu, a N’wana wa munhu. Makunu, zva zwisiseka ku a “nekwa yi kholekileko” kutani yo tsumbeka ku wuliwa vavanuna vo kari va “ntlhambi wu tsongwani” lowu wu to nyikiwa Mufumo. (Luka 12:32) Ka mufananiso lowu, Jesu i wo komba lezvaku a vokari va ntlawa lowu, va wa ta nyikiwa ntiro wa ku hlayisa ‘malandza yakwe,’ va ma nyika “zvakuga hi cikhati ca kona”. Makunu Pedro ni vapizani van’wani lava Jesu a nga kari a va gondzisa a tlhela a va phamela zvakuga zva moya, va zvi zwisisile lezvaku a N’wana wa munhu i wa ta wuya ka cikhati co kari ci nga hata. Niku ka cikhati leco, ku wa tava ni ntlawa wo kari wu nga wa ta tira ku ma phamela zvakuga a “malandza” ya yena Jesu kota Hosi.

Kota lezvi zvi nga kari zvi koteka ku va sangula ku nga ha khatali hi ntiro wabye hambu kuza va xanisa vamakabye vabye, Jesu i no va khanyisela hi ndlela yin’wani a ku hikuyini va nga fanele ku tshama na va longile va tlhela va ti karatela kuva ni kupima ku nene. I te: “Kanilezvi loku a nandza lego giku mbilwini ya gona: A hosi ya mina ya hlwela ku wuya; gi sangula kuba a malandza ya cinuna ni ya cisati, giga, ginwa, gi popiwa; a hosi ya lego nandza yi ta wuya hi siku gi nga . . . [gi rindzelangiko], ni cikhati leci gi nga ci tiviko, yi ta gi pulakanyisa, yi gi nyika ciavelo zvin’we ni va nga kholekangiko.” — Luka 12:45, 46.

Hi kulandzela, Jesu i no wula lezvaku i tele ku ta “hoxa ndzilo misaveni”. Kunene, i wa gondzisa zvilo zvi nga vanga kukanetisana zvi tlhela zvi fuvisa  tigondzo ta mawunwa ni zvihena zva wukhongeli. Lezvi a nga gondzisa zvi wa ta hambanisa vanhu lava va nga fanele ku zwanana. I te: “A . . . [papayi] i ta hambana ni n’wana wakwe, ni n’wana i ta hambana ni . . . [papayi] wakwe; a . . . [mamani] i ta hambana ni nhanyana wakwe, ni nhanyana a hambana ni . . . [mamani] wakwe; a mwingi i ta hambana ni katamwane wakwe, ni katamwane a hambana ni mwingi.” — Luka 12:49, 53.

Lezvi Jesu a nga zvi wula i wa byela nguvhunguvhu a vapizani vakwe. A kutala ka vanhu va wa tlula va khoma ni tilo hi ku ala lezvaku Jesu hi yena Mesiya, hambu lezvi va nga kari va wona zvilo zvi nga tiyisekisa mhaka leyi. Hikwalaho, i no hundzuluka a va byela lezvi: “Loku mu wona a refu na gi huma hi le . . . [Mupela-gambo], ma hatlisa muku ngalo: Yi tana vhula; zvi maheka lezvo. Laha na mu wona a mheho ya le Dzongeni, mu ngalo: Ku tava ni mumu; zvi maheka lezvo. N’wina vaxengeteli, ma zvi tiva ku tlhamusela nghohe ya misava ni tilo; kanilezvi hi yini mu nga zvi kotiko a ku tlhamusela a cikhati leci ke?” (Luka 12:54-56) Zvi no tekela ku woneka lezvaku va wa nga longangi ku amukela Mesiya.