Hunza uya ka timhaka ta kona

Tlhela ka xaxameto wa tihloko ta mhaka

Timboni ta Jehovha

Select language ciTshwa

 CIPIMO 75

Jesu a komba leci ci nyikako litsako la lisine

Jesu a komba leci ci nyikako litsako la lisine

LUKA 11:14-36

  • JESU AKU I HLONGOLA MADHIMONI HI “LITIHO LA NUNGUNGULU”

  • CINI CI NYIKAKO LITSAKO LA LISINE?

Laha Jesu a nga hi lomu Judhiya, i no phinda lezvi a nga rangile a gondzisa xungetano hi mukhongelo. Kanilezvi a ku khongela a hi zvona zvoce a nga phinda a cikhati a nga gondzisa laha misaveni.

Na a ha hi kwalomu Judhiya, Jesu i no hlongola dhimoni laha ka wanuna wo kari. Lava va nga zvi wona va no hlamala, kanilezvi a hi vontlhe. A ku fana ni lezvi zvi nga rangile zvi maheka le Galileya, a vokari va no lumbeta Jesu vaku: “I hlongola madhimoni hi Bhelzebhubha, a hosi ya madhimoni.” (Luka 11:15) A van’wani va no mu kombela ciwoniso ca le tilweni na va lava ku tiva ku kasi hi yena mani hakunene.

Jesu i no zvi tiva ku vo mu ringa, a se va hlamulisa zvezvi a nga va hlamulisile zvona lava va le Galileya a cikhati leci vonawu va nga mu ringa. I no wula lezvaku ni wihi mufumo wu ti pandzako ha woce wu ti vhukela wu tawa, zvonake aku: “Loku Sathani a hlongola Sathani o ti vhukela ha yece; makunu, a mufumo wakwe wu ta tiyisa kuyini ke?” A se guma a va byela hi kukongoma, aku: “Loku ndzi hlongola madhimoni hi litiho la Nungungulu, hakunene a Mufumo wa Nungungulu wu tile ka n’wina.” — Luka 11:18-20NM.

Zva koteka ku lava va ngazwa Jesu na a kumbuka “litiho la Nungungulu” va alakanyile lezvi zvi nga mahekile kaleloko matin’wini ya vaIzrayeli. A cikhati leci lava va nga hi wuhosini ka Faro va nga wona zvihlamaliso lezvi Mosi a nga maha, va no banguleka vaku: “Leli litiho la Nungungulu!” A Khume ga Milayo kambe yi tsalilwe laha ka maribye mambiri hi “litiho la Nungungulu.” (Eksodhusi 8:19; 31:18) Jesu yenawu i wa hlongola madhimoni ni ku hanyisa vababyi hi ku vhuniwa hi “litiho la Nungungulu” — ku nga moya wakwe wa ku basa kutani ntamu lowu a wu tirisako. Hikwalaho, a Mufumo wa Nungungulu wu wa tile ka valala va Jesu hakuva yena kota Hosi yi hlawulilweko hi Nungungulu, i wa maha zvihlamaliso kwalaha kabye.

Lezvi Jesu a nga kari a zvi kota ku hlongola madhimoni, zvi wa komba ku i na ni ntamu wa ku hlula Sathani. Jesu i no phinda mufananiso wakwe wa wanuna a nga hi ni moya wo biha wu guma wu hlongoliwa. I te loku a wanuna loye a nga vhali laha ku nga hi ni moya lowo wo biha hi zvilo zva zvi nene, a moya lowo wu wuya ni mimoya yin’wani ya 7 yi ta mu xanisa nguvhu ku hundza lezvi a nga xanisisiwa zvona hi lowu wa mun’we. (Matewu 12:22, 25-29, 43-45) Hi zvalezvi a tiko ga Izrayeli gi nga tshamisile zvona.

A wasati wo kari a nga kari a ingisela Jesu, i no hlamala aku: “Yi katekile a nyimba leyi yi nga ku beleka, ni mavele lawa u nga ma an’wa”! A vavasati va vaJudha va wa zvi lava nguvhu a ku pswala muphrofeti; Mesiya a ha ha wuli! Makunu a wasati loye i wa zvi wonisa ku Mariya i katekile nguvhu hi lezvi a nga mamani wa mugondzisi wa hombe nguvhu wo kota Jesu. Kanilezvi Jesu i no lulameta a maalakanyo ya wasati loye hi ku mu byela leci ci nyikako litsako la lisine, aku: “Ku katekile nguvhunguvhu lava va zwako a mhaka ya Nungungulu, va yi hlayisa.” (Luka 11:27, 28) Jesu a nga tshukangi a kuca vanhu lezvaku va wona mamani wakwe Mariya kota munhu wo hlawuleka. Hikwalaho, leci ci nga mahako munhu a tsaka — kani wanuna kani wasati — a hi kuva xaka ga wokari a nga ni malungelo yo hlawuleka. Kanilezvi, kuva nandza go tsumbeka ga Nungungulu.

Khwatsi hi lezvi Jesu a nga mahile le Galileya, i no kawuka vanhu kambe hi lezvi va nga mu kombela ciwoniso ca le tilweni. I no va byela lezvaku va nga ta nyikiwa ciwoniso, ahandle ka “ciwoniso ca Jona.” Jona ive ciwoniso hi tindlela timbiri: Hi ku tshama masiku manharu lomu ndzeni ka njhanjhi ni ku tiya hlana a chumayela vaNinivha, lava va nga guma va ti sola. Jesu i no guma aku: “Kasi a wahombe ku hundza Jona i kona laha.” (Luka 11:29-32) Jesu i wa hi wa hombe ku hundza Solomoni kambe, loyi a hosi ya cisati ya le Xebha yi ngaya yi yazwa wutlhari gakwe.

Jesu i no engeta aku: “A ku na munhu a lumekako kandiya, a yi veka wutshan’wini ga cihundla, hambu lahasi ka cirundzu, kanilezvi yi hayekwa le hehla”. (Luka 11:33) Kuzvilava i wa wula lezvaku a ku  gondzisa ni ku maha zvihlamaliso mahlweni ka vanhu lavo zvi wa fana ni ku lumeka kandiya u guma u yi fihletela. Hakuva va wa veka kupima ka zvin’wani, va wa nga gi zwisisi a kungo ga zvihlamaliso zvakwe.

Jesu i wa ha hi ku hlongola dhimoni a tlhela a hanyisa mbeveve. Lezvo zvi wa fanele ku kuca vanhu lavo lezvaku va dhumisa Nungungulu va tlhela va byela van’wani lezvi Jehovha a nga kari a maha. Hi cigelo leco, Jesu i no tlharihisa lava va nga mu vhukela, aku: ‘Ti woneleni lezvaku a kuwonekela loku ku nga ka n’wina ku nga . . . hi munyama. Hikwalaho loku a miri wontlhe wa n’wina wu tele hi kuwonekela na wu nga hi na tlhelo ga munyama, wona wontlhe wu ta woningelwa, kota lezvi a kandiya yi ku woningelako hi kuwonekela ka yona.’ — Luka 11:35, 36.