Hunza uya ka timhaka ta kona

Tlhela ka xaxameto wa tihloko ta mhaka

Timboni ta Jehovha

Select language ciTshwa

XIENGETELO

Jesu Kristu—Messia Loyi A Tsumbisilweko

Jesu Kristu—Messia Loyi A Tsumbisilweko

KASI ku hi vuna a ku tiva Messia, Jehova Nungungulu i pimisele a vaprofeti vo tala va Biblia lezaku va nyika a mitlhamuselo xungetano hi kubelekwa, ni wutireli, ni kufa ka Mutlhatlhisi loyi a tsumbisilweko. Zontlhe ziprofeto lezo zi tatisekile ka Jesu Kristu. Zi tlhamuselwe khwatsi hi ndlela yo hlamalisa. Kasi ku fananisa lezo, a hi kambisiseni a ziprofeto zitsongwani lezi zi nga wulawula na ka ha hi mahlweni xungetano hi zimaho za kubelekwa ni wunwanana ga Messia.

Muprofeti Isaya i wulile na ka ha hi mahlweni lezaku Messia i wa ta pswaliwa lixakeni la Hosi Davida. (Isaya 9:7) Jesu hakunene i pswalelwe lixakeni la Davida.—Mateu 1:1, 6-17.

Mika, muprofeti munwani wa Nungungulu, i wulile na ka ha hi mahlweni lezaku a nwanana loyi hi kugumesa i wa ta maha mufumeli niku i wa ta belekelwa “Betlehema Efrata.” (Mika 5:2) A xikhatini xa kubelekwa ka Jesu, ku wa hi ni madoropa mambiri le Israeli ma nga vitwa Betlehema. A ginwe gi wa kumeka kusuhani ni Nazareta le xipanzeni xa nwalungu wa tiko, a ginwanyani, gi wa kumeka kusuhani ni Jerusalema le Juda. A Betlehema legi gi nga hi kusuhani ni Jerusalema gi wa vitanwa Efrata a kaleloko. Jesu i belekelwe ka doropa lego, khwatsi-khwatsi kota lezi a xiprofeto xi nga wulile na ka ha hi mahlweni!—Mateu 2:1.

A xinwani xiprofeto xa Biblia xi wulile na ka ha hi mahlweni lezaku a N’wana wa Nungungulu i wa ta vitanwa “a huma le Gipite.” Na a hi nwanana, Jesu i lo yisiwa Gipite. I lo wuyisiwa anzhako ka kufa ka Herodi, zonake ku tatiseka a xiprofeto.—Hosea 11:1; Mateu 2:15.

Lomu ka kwadro “Ziprofeto Zi Wulawulako Hi Messia”, a mitsalo leyi yi xaxametilweko hasi ka xihlokwana xa mhaka “Xiprofeto” yi na ni mitlhamuselo xungetano hi Messia. Hi wuxinji ringanisa mitsalo leyo ni leyi yi nga hasi ka xihlokwana xa mhaka “Kutatiseka.” A ku maha lezo ku ta tiyisa nguvu a kukholwa ka wena lisineni la Mhaka ya Nungungulu.

A xikhati u kambisisako a mitsalo leyo, tiva lezaku leyi yi nga ziprofeto yi tsalilwe a mazana ya malembe mahlweni ka kubelekwa ka Jesu. Jesu i te ngalo: “Timhaka tontlhe leti ti tsalilweko ha mina nayweni wa Mosi, ni ka vaprofeti, ni lomu ka Tisimu, ti fanele ku tatiseka.” (Luka 24:44) Kota lezi u zi kotako ku kambisisa lomu ka Biblia ga wena, zona zi tatisekile hakunene—hambu ni ka mitlhamuselo ya yi tsongwani nguvu!

ZIPROFETO ZI WULAWULAKO HI MESSIA
XIMAHO XIPROFETO KUTATISEKA
I belekelwe lixakeni la ka Juda Genesisi 49:10 Luka 3:23-33
I belekilwe hi nhwana Isaya 7:14 Mateu 1:18-25
I humele lixakeni la Hosi Davida Isaya 9:7 Mateu 1:1, 6-17
Jehova i mu huwelele kota N’wana wakwe Tisimu 2:7 Mateu 3:17
A va kholwangi ka yena Isaya 53:1 Johani 12:37, 38
I nghenile Jerusalema na a khilele mbongola Zakaria 9:9 Mateu 21:1-9
I tokometilwe hi munghana Tisimu 41:9 Johani 13:18, 21-30
I tokometilwe hi 30 wa zingerengere za siliva Zakaria 11:12 Mateu 26:14-16
A nga vululangi nomu mahlweni ka valumbeti vakwe Isaya 53:7 Mateu 27:11-14
Va hlahluvile tihlolo hi ku lava tinguwo takwe Tisimu 22:18 Mateu 27:35
I tseketselwe a xikhati a nga hi mhanzeni Tisimu 22:7, 8 Mateu 27:39-43
A ku tshoviwangi ni rambu ginwe gakwe Tisimu 34:20 Johani 19:33, 36
I lahlilwe ni vanhu va fumileko Isaya 53:9 Mateu 27:57-60
I vuxilwe na a nga se bola Tisimu 16:10 Mitiro 2:24, 27
I tlakusilwe a yimiswa canjeni ga xinene ga Nungungulu Tisimu 110:1 Mitiro 7:56

← Wona a xipimo xi wulawulako hi mhaka leyi