Hunza uya ka timhaka ta kona

Tlhela ka xaxameto wa tihloko ta mhaka

Timboni ta Jehovha

Select language ciTshwa

Tlhatlhambuto 112: A Taru Gi Panzekela Xihlaleni

Tlhatlhambuto 112: A Taru Gi Panzekela Xihlaleni

HI NGA wona! A taru gi le mhangweni! Go panzekela! Wa va wona a vanhu lava va tluleleko matini? A vo kari va kona se va chikela muhanzeni. Hi Paule gayani a nga kwalahaya? A hi poleni lezi zi mu mahekelako.

Vanhu va ponileko kupanzekeleni ka taru

Khumbula, Paule i khonwilwe kota peresu hi malembe mambiri le Kesaria. Makunu yena ni tinwani tiperesu va khiletwa lomu ka taru, zonake va suka vaya Roma. Laha va hunzako kusuhani ni xihlale xa Kreta, va biwa hi bhubhutsa ga hombe nguvu. A moya wu pupuxa nguvu laha kaku a vavanuna va nga zi koti ku fambisa a taru. Niku a va zi koti ku wona a gambo laha hlikanhini kutani a tinyeleti laha wusikwini. Hi kugumesa, anzhako ka masiku yo tala, lava va nga lomu tarwini va luza a kutsumba kontlhe ka ku tshuka va poniswa.

Zonake Paule i suka a yima aku: ‘Ku hava ni munwe wa nwina a ta nga lahlekelwa hi wutomi gakwe; ntsena a taru hi gona gi to lahleka. A matolo nzi telwe hi ngelosi ya Nungungulu yi taku ngalo ka mina: “U nga chavi, Paule! U fanele ku yima mahlweni ka Kesari a mufumeli wa Roma. Zonake Nungungulu i ta ponisa vontlhe lava va enzako na wena.”’

Lomu xikari ka wusiku ga siku ga wukhume ni mune anzhako ka kuva gi sangulile a bhubhutsa, a vamarinyero va wona lezaku a kueta ka mati ka hunguka! Hi kota ya ku chava ku gumula a fungu wa maribye lomu munyameni, vona va releta zirikhiso. Ka mixo wu nga lanzela va wona a yipswha. Vona va boha ku zama a ku fambisa a taru kala kwale muhanzeni.

Ina, laha va chikelako kusuhani ni muhanza, a taru gi chekema fungwini zonake gi njhibila. Makunu a mabyandlati ma sangula ku giba nguvu, gi sangula ku panzekela. A nduna ya butho leyi yi rangelako yi ngalo: ‘Nwina nwentlhe mu zi kotako ku hlambela sangulani hi nwina a ku tlulela bimbini mu hlambela muya muhanzeni. Nwina mu salako tlulani anzhako kabye, mu khoma a zipanze za taru mu fela ku deluka.’ Hi zona zalezo va mahako. Hi kumaha loko vontlhe va 276 wa vanhu va nga hi tarwini va chikela muhanzeni hi kuhlayiseka, kota lezi a ngelosi yi tsumbisileko hakunene.

A xihlale lexo xi vitwa aku i Melita. A vanhu va kona va nene nguvu, niku va hlayisa lava va nga hi tarwini. Laha a xikhati xi chukwatako, Paule i khiletwa ka ginwani taru a yisiwa Roma.

Mitiro 27:1-44; 28:1-14.



Ziwutiso

  • Zini zi humelelako a taru legi Paule a nga ka gona a xikhati lexi gi hunzako kusuhani ni xihlale xa Kreta?
  • Zini lezi Paule a byelako lava va nga lomu tarwini?
  • Ku maheka yini a kuza a taru gi panzekela?
  • Zileletelo muni zi nyikiwako hi nduna ya butho leyi yi rangelako, niku vanhu vangani va chikelako muhanzeni hi kuhlayiseka?
  • Hi gihi a vito ga xihlale lexi va humelelweko hi mhango ka xona, niku zini a mahiwako Paule laha a xikhati xi chukwatako?

Ziwutiso zo engetela

  • Gonza Mitiro 27:1-44.

    Xana a kutsumba ka hina xungetano hi kumbhelela ka lezi zi tsalilweko lomu ka Biblia ku tiyisiswa kuyini a xikhati lexi hi lerako a tlhatlhambuto wa pfhumba ga Paule ga kuya Roma? (Miti. 27:16-19, 27-32; Lu. 1:3; 2 Tim. 3:16, 17)

  • Gonza Mitiro 28:1-14.

    Lezi a vaaki va Melita, va nga hi mahedeni, va susumetilweko ku hlayisa Paule hi “wuxinji ga hombe” zinwe ni vanghana vakwe va nga humelelwe hi mhango ya ku panzekelwa hi taru, xana a maKristu ma fanele ku susumetiwa a ku komba yini? Nguvunguvu hi ndlela muni? (Miti. 28:1, 2; Maheb. 13:1, 2; 1 Ped. 4:9)