Hunza uya ka timhaka ta kona

Tlhela ka xaxameto wa tihloko ta mhaka

Timboni ta Jehovha

Select language ciTshwa

Tlhatlhambuto 102: Jesu Wa Hanya

Tlhatlhambuto 102: Jesu Wa Hanya

WA MU tiva a wasati loyi ni vavanuna lava va vambiri? A wasati hi Maria Magdala, wa munghana wa Jesu. Niku a vavanuna lava va bohileko zo basa tingelosi. A wutshanwana legi Maria a hlomelako ka gona hi lomu wu nga vekilwe kona a miri wa Jesu anzhako ka loku a file. Gi vitwa ku ngalo xilahla. Kanilezi a miri lowo a wa ha hi kona makunu! Himani a wu tekileko? A hi woneni.

Tingelosi na ti wulawula na Maria Magdala

Anzhako ka kufa ka Jesu, a vapristi ve ngalo ka Pilatu: ‘Na a ha hanya Jesu i te ngalo i wa ta vuxiwa anzhako ka masiku manharu. Hikwalaho laya lezaku a xilahla xi lavelelwa. Kasi ku a vapizani vakwe va nga zi koti ku yiva a miri wakwe zonake va taku ngalo i vuxilwe hi ka vafileko!’ Pilatu i byela vapristi lezaku va rumela masochwa a ku ya lavelela a xilahla.

Kanilezi na ga ha hi mixo nguvu wa siku ga wunharu anzhako ka loku Jesu a file kuta a ngelosi ya Jehova hi xitshuketi. Yona yi wumbuluta a ribye gi nga laha xilahleni. A masochwa ma chava nguvu laha ka kuza ma nga zi koti ni ku ti henyahenya. Hi kugumesa, laha va hlomelako lomu xilahleni, a miri a wa ha hi kona! A masochwa yo kari ma nghena doropeni ma ya byela vapristi. Wa zi tiva lezi a vapristi lavo vo biha va zi mahako? Va nyika mali a masochwa lezaku ma hemba. A vapristi ve ngalo ka masochwa: ‘Wulani ku ngalo a vapizani vakwe va tile ni wusiku, na hi etlele, va ta yiva a miri.’

Laha zontlhe lezo zi mahekako, a vavasati vo kari va vanghana va Jesu va chikela xilahleni. A hi kuhlamala loku va nga nako hi ku kuma a xilahla na xi hi phanga! Hi xitshuketi ku woneka a tingelosi timbiri ti bohileko tinguwo to ngangamela. Tona ti wutisa tiku: ‘Hikuyini mu lavetelako Jesu laha ke? Yena i vuxilwe. Fambani hi kuhatlisa mu ya byela a vapizani vakwe.’ A hi kutsutsuma ka vavasati lavo! Kanilezi laha ndleleni va nyimiswa hi wanuna. Wa mu tiva a ku himani? Hi Jesu! Yena i ngalo: ‘Fambani mu ya byela vapizani va mina.’

Laha a vavasati va byelako a vapizani lezaku Jesu wa hanya ni ku ngalo vona va mu wonile, a vapizani va zi wona na zi karata a ku zi kholwa. Pedro na Johani va tsutsuma vaya xilahleni lezaku va ya zi wona a voce, kanilezi a xilahla xi phanga! Laha Pedro na Johani va sukako, Maria Magdala i sala nzhako. Hi kwalaha a hlomelako a wona a tingelosi letiya ta timbiri.

Wu humelelwe hi yini a miri wa Jesu? Nungungulu i lo wu nyamalalisa. Nungungulu a nga vuxangi Jesu na a hi ni miri wa nyama lowu a fileko ka wona. Yena i lo mu nyika a miri wuswa wa moya, kota lowu wu nga ni tingelosi le tilweni. Kanilezi hi ku fela ku komba a vapizani vakwe lezaku yena wa hanya, Jesu wa zi kota ku ambala a miri wu kotekako ku woniwa hi vanhu, kota lezi hi to zi gonza.

Mateu 27:62-66; 28:1-15; Luka 24:1-12; Johani 20:1-12.



Ziwutiso

  • Himani wasati loyi laha mufananisweni? Hi vamani vavanuna lava va vambiri, niku hi kwihi laha va nga kona?
  • Hikuyini Pilatu a byelako vapristi lezaku va rumela masochwa a ku ya lavelela a xilahla xa Jesu?
  • Zini lezi a ngelosi yi mahako na ga ha hi mixo nguvu wa siku ga wunharu anzhako ka kufa ka Jesu, kanilezi zini lezi a vapristi va mahako?
  • Hikuyini a vavasati vo kari va hlamalako a xikhati lexi va yako va ya kamba a xilahla xa Jesu?
  • Hikuyini Pedro na Johani va tsutsumako vaya xilahleni xa Jesu, niku zini lezi va zi kumako?
  • Zini zi humeleleko a miri wa Jesu, kanilezi zini lezi yena a zi mahako kasi ku komba vapizani lezaku wa hanya?

Ziwutiso zo engetela

  • Gonza Mateu 27:62-66 ni 28:1-15.

    Xana a vapristi va tinduna, ni vaFarisi, ni masingalakati va onhele a moya wa ku basa hi ndlela muni xikhatini xa ku vuxiwa ka Jesu hi ka vafileko? (Mat. 12:24, 31, 32; 28:11-15)

  • Gonza Luka 24:1-12.

    Xana a tlhatlhambuto wa ku vuxiwa ka Jesu hi ka vafileko wu kombisa kuyini ku ngalo Jehova i wona vavasati kota timboni to tsumbeka? (Lu. 24:4, 9, 10; Mat. 28:1-7)

  • Gonza Johani 20:1-12.

    Hi vuniwa hi ndlela muni hi Johani 20:8, 9 a ku wona a xilaveko xa kuva ni lihlaza-mbilu loku hi nga ku pimi khwatsi a kutatiseka ka xiprofeto xo kari xa Biblia? (Mav. 4:18; Mat. 17:22, 23; Lu. 24:5-8; Joh. 16:12)