Hunza uya ka timhaka ta kona

Tlhela ka xaxameto wa tihloko ta mhaka

Timboni ta Jehovha

Select language ciTshwa

Tlhatlhambuto 90: Ni Wasati Laha Hlobyeni

Tlhatlhambuto 90: Ni Wasati Laha Hlobyeni

JESU i lo nyima a fela ku humula laha kusuhani ni hlowo le Samaria. A vapizani vakwe va yile doropeni a ku ya xava zakuga. A wasati loyi Jesu a wulawulako naye i tile ku takha mati. Yena i ngalo ka wasati: ‘Hi nga nziha nzinwa.’

Jesu na a wulawula ni wasati wa muSamaria

Lezo zi hlamalisa nguvu a wasati. Wa zi tiva a ku hikuyini? Hi lezaku Jesu muJuda, kuveni yena muSamaria. Niku a vaJuda vo tala a va va ranzi vaSamaria. Vona vaza va nga lavi niku wulawula navo! Kanilezi Jesu i ranza a tixaka tontlhe ta vanhu. Hikwalaho yena i ngalo: ‘Loku u wa mu tiva loyi a ku kombelako mati ya kunwa, u wa ta mu kombela zonake yena i wa ta ku nyika a mati ya kuhanya.’

A wasati aku ngalo: ‘Hosi, a hlowo yi etile, niku hambu bhaketi a wu nago. U wa ta ma kumisa kuyini a mati lawo ya kuhanya ke?’

Jesu i tlhamusela ku ngalo: ‘Loku unwa a mati ya hlowo leyi u ta tlhela uzwa tora kambe. Kanilezi a mati lawa nzi to ku nyika ma zi kota ku maha munhu a hanya kala kupinzuka.’

A wasati aku ngalo: ‘Hosi, nzi nyike mati lawo! Kasi nzi nga hazwi tora kambe. Nzi fela ku kala nzi nga hati laha kambe a ku takha mati.’

A wasati i alakanya ku ngalo Jesu i wulawula hi mati ya lisine. Kanilezi yena i wulawula hi zinene xungetano hi Nungungulu ni mufumo wakwe. A zinene lezo zi fanana ni mati ya kuhanya. Zona za zi kota ku nyika munhu a wutomi ga pinzukelwa.

Makunu Jesu i ngalo ka wasati: ‘Famba u ya vitana a nuna wa wena u wuya naye.’

Yena i hlamula ku ngalo: ‘A nzi na nuna.’

Jesu aku: ‘U hlamulile khwatsi. Kanilezi uve ni ntlhanu wa vanuna, ni wanuna loyi u hanyako naye lezi a hi nuna wa wena.’

A wasati o hlamala, hakuva zontlhe lezo lisine. I zi tivisile kuyini Jesu zilo lezo zontlhe? Ina, hi lezaku Jesu hi yena Loyi a Tsumbisilweko a rumelweko hi Nungungulu, niku Nungungulu wa mu nyika a mahungu lawo. A ka xikhati lexo ku wuya vapizani va Jesu, zonake va hlamala hi lezi Jesu a wulawulako ni wasati wa muSamaria.

Hi gonza yini hi zontlhe lezo? Zi komba ku ngalo Jesu mu nene ka vanhu va tixaka tontlhe. Niku hinawu hi fanele ku maha lezo. A hi fanelangi ku alakanya lezaku a vanhu vo kari va bihile hi lezi va nga va lixaka lo kari ntsena. Jesu i lava lezaku a vanhu vontlhe va tiva a zinene zi yisako wutomini ga pinzukelwa. Niku hinawu hi fanele ku xuva ku vuna a vanhu a ku gonza a zinene.

Johani 4:5-43; 17:3.



Ziwutiso

  • Hikuyini Jesu a nyimileko kusuhani ni hlowo le Samaria, niku zini lezi a wulako ka wasati kwalaho?
  • Hikuyini a wasati a hlamalako? Zini lezi Jesu a mu byelako, niku hikuyini?
  • I mati ya lixaka muni lawa a wasati a alakanyako lezaku Jesu i wulawula hi wona, kanilezi i mati muni lawa hakunene a wulawulako hi wona?
  • Hikuyini a wasati a hlamalako hi lezi Jesu a zi tivako xungetano hi yena, niku xana i ma kumisile kuyini mahungu lawo?
  • Zigonzo muni hi zi kotako ku zi kuma hi ka tlhatlhambuto wa wasati laha hlobyeni?

Ziwutiso zo engetela

  • Gonza Johani 4:5-43.

    Hi ku lanzela a xikombiso xa Jesu, mawonela muni hi faneleko kuva nawo hi vanhu va lixaka lo hambana ni la hina kutani va wundlilweko ka matshamela ma hambeneko ni ya hina? (Joh. 4:9; 1 Kor. 9:22; 1 Tim. 2:3, 4; Tit. 2:11)

    Mabhinzu muni a ma kumako hi tlhelo ga moya a munhu loyi a mahako mupizani wa Jesu? (Joh. 4:14; Isa. 58:11; 2 Kor. 4:16)

    Hi nga zi kotisa kuyini ku komba a kutsakela ko fanana ni loku ka wasati wa muSamaria, loyi a nga kari a xuva nguvu ku byela vanwani lezi a nga zi gonzile? (Joh. 4:7, 28; Mat. 6:33; Lu. 10:40-42)