Hunza uya ka timhaka ta kona

Tlhela ka xaxameto wa tihloko ta mhaka

Timboni ta Jehovha

Select language ciTshwa

Tlhatlhambuto 85: Jesu A Pswaliwa Lomu Rangeni

Tlhatlhambuto 85: Jesu A Pswaliwa Lomu Rangeni

WA ZI tiva a ku himani a xinwanana lexi? Ina, hi Jesu. Yena wa ha hi ku pswaliwa lomu rangeni. A ranga hi lomu ku valelwako kona zifuyo. Maria i latile Jesu lomu ka xigowolo, ku nga wutshamu legi a timbongola ni zinwani zifuyo zi gelako kona zakuga. Kasi hikuyini Maria na Josefa va hi kona lomu ni zihari? Legi a hi wutshamu ga ku a xinwanana xi pswalilwa kona, a hi zona?

Ahihi, a hi gona. Kanilezi vona va kona lomo hi lezi: A mufumeli wa Roma, Kesari Augustu, i vekile nayo wu nge ngalo a munwe ni munwani i fanele ku tlhelela doropeni legi a pswalilweko kona lezaku a ya tsalisa a vito gakwe bhukwini. Makunu, Josefa i pswalilwe kwalaha Betlehema. Kanilezi a xikhati lexi yena na Maria va chikeleko, ku wa nga hi na wutshamu gi nga hi ni yindlu ya lezaku va tshama ka yona. Hikwalaho vona va zile va ta tshama kwalomu ni zifuyo. Niku ka galego siku Maria i lo pswala Jesu! Kanilezi, kota lezi u mu wonako, yena Jesu wa hanya khwatsi.

Josefa, Maria, ni nwanana Jesu

Wa va wona a varisi va tako a ku ta wona Jesu? Vona va wa hi le livaleni ni wusiku na va risa a tiyivu tabye, laha a kuwonekela ko ngangamela ku nga va ranzela. Ku wa hi ngelosi! A varisi va lo chava nguvu. Kanilezi a ngelosi yi te ngalo: ‘Mu nga chavi! Nzi mu nehela mahungu yo saseka. Nyamutlha, le Betlehema, ku pswalilwe Kristu a Hosi. Yena i ta ponisa vanhu! Mu ta ya mu kuma a petselwe ka tinguwo na a latilwe lomu xigowolweni.’ Hi xitshuketi ku lota tingelosi to tala zonake ti sangula a ku dumisa Nungungulu. Zalezo a varisi lavo va lo hatlisa va famba va ya lava Jesu, niku zalezi va mu kumile.

Wa zi tiva a ku hikuyini Jesu a hi munhu wo hlawuleka nguvu? Wa zi tiva a ku hi yena mani hakunene? Khumbula, ka tlhatlhambuto yo sangula ya bhuku legi hi hlawutile hi N’wana wa Nungungulu wo sangula. A N’wana loye i tirile zinwe na Jehova kumaheni ka matilo ni misava ni zontlhe zinwani zilo. Makunu, yaloye hi yena Jesu!

Ina, Jehova i rurisile a wutomi ga N’wana wakwe hi le tilweni a gi veka lomu nzeni ka Maria. Zalezo ku lo sangula ku kula a xinwanana lomu nzeni kakwe a kufanana ni lezi a zinwani zivanana zi kulisako zona lomu nzeni ka vamamani va zona. Kanilezi a xinwanana lexi xi wa hi N’wana wa Nungungulu. Hi kugumesa Jesu i pswalilwe kwalaha rangeni lomu Betlehema. Wa zi wona makunu a ku hikuyini a tingelosi ti nga wa tsaka nguvu hi ku bikela a vanhu lezaku Jesu i wa pswalilwe?

Luka 2:1-20.



Ziwutiso

  • Himani a xinwanana lexi laha mufananisweni, niku xana Maria i xi latile kwihi?
  • Hikuyini Jesu a pswalilweko lomu rangeni ku nga ni zihari?
  • Laha mufananisweni, hi vamani a vavanuna lava va nghenako rangeni, niku zini lezi va nga byelilwe hi ngelosi?
  • Hikuyini Jesu ahi munhu wo hlawuleka?
  • Hikuyini zi kotekako a ku Jesu a vitwa N’wana wa Nungungulu?

Ziwutiso zo engetela

  • Gonza Luka 2:1-20.

    Xipanze muni lexi Kesari Augustu a ngave naxo kutatisekeni ka xiprofeto xa kubelekwa ka Jesu? (Lu. 2:1-4; Mika 5:2)

    Zi nga mahekisa kuyini a ku munhu a kala a patseka xikari ka lava va wuliwako ku ngalo “vanhu lava a xaleleko ha vona” Nungungulu? (Lu. 2:14; Mat. 16:24; Joh. 17:3; Miti. 3:19; Maheb. 11:6)

    Kota lezi ku nge a varisi lavayani va nyalidede va vaJuda va wa hi ni xigelo xa ku tsaka hi kota ya kubelekwa ka Muhanyisi, xigelo muni xa hombe ku hunza lexo lexi a malanza ya Nungungulu ma nga naxo inyamutlha xa kuva ma tsaka? (Lu. 2:10, 11; Efe. 3:8, 9; Kuv. 11:15; 14:6)