Hunza uya ka timhaka ta kona

Tlhela ka xaxameto wa tihloko ta mhaka

Timboni ta Jehovha

Select language ciTshwa

Tlhatlhambuto 101: Jesu A Dawa

Tlhatlhambuto 101: Jesu A Dawa

HI NGA wona a nchumu lowu wo tshisa wu mahekako! Jesu o dawa. Va mu hayekile laha ka mhanze. Ku belelwe zipikiri lomu mandleni ni lomu mikonzweni yakwe. Hikuyini va zako va mu maha lezo Jesu ke?

Jesu na afa

Hi lezaku a vanhu vo kari va mu venga Jesu. Wa zi tiva a ku hi vamani? Munwe wabye hi ngelosi yo biha Satani Diyabu. Hi yena a zi kotileko ku maha lezaku Adamu na Eva va tsika ku ingisa Jehova. Niku Satani hi yena a mahileko lezaku a valala va Jesu va maha a kubiha loku ko tshisa.

Hambu mahlweni ka kubelelwa ka Jesu laha mhanzeni, a valala vakwe va mu maha zilo zo biha. Wa alakanya lezi va nga ta mu khomisa zona le sinwini ga Getsemane? Ku wa hi vamani a valala lavayani? Ina, ku wa hi varangeli va wukhongeli. Lezi, a hi woneni lezi zi mahekako hi kulanzela.

Laha Jesu a tekiwako hi varangeli va wukhongeli, a vapostoli vakwe va mu tsutsuma. Va siya Jesu yece ni valala vakwe, hakuva va khonwa hi kuchava. Kanilezi a vapostoli Pedro na Johani a vayi kule nguvu. Vona va va lanza lezaku va wona lezi zi humelelako Jesu.

A vapristi va teka Jesu va mu yisa ka dota Anasi, loyi a nga hi mupristi wa hombe kale. A xidlemo a xi tshami xikhati xo leha laho. Hi kulanzela vona va yisa Jesu mutini wa Kayafasi, loyi a nga mupristi wa hombe makunu. A varangeli vo tala va wukhongeli va tsombene mutini wakwe.

Kwalaho mutini wa Kayafasi va enghena kulamuleni. Ku ngheniswa vanhu lezaku va ta wulawulela mawunwa ha Jesu. Vontlhe varangeli va wukhongeli ve ngalo: ‘Jesu i fanele ku dawa.’ Zonake va mu phelela nghoheni, va tlhela va muba hi zibhakela.

Laha zontlhe lezo zi mahekako, Pedro i le handle le tsenzeleni. Wusiku go titimela, niku zalezo zi maha lezaku a vanhu va dzivela nzilo. Laha va worako nzilo, a nanza go kari ga xisati gi cuwuka Pedro, giku: ‘A wanuna loyi yenawu i wa hi na Jesu.’

Pedro i hlamula aku: ‘Ahihi, nzi wa nga hi naye!’

A vanhu va wula a makhati manharu ka Pedro lezaku yena i wa hi na Jesu. Kanilezi ka khati ni khati Pedro i ngalo lezo a hi lisine. Ka khati ga wunharu legi Pedro a wulako lezo, Jesu i hunzuluka a mu cuwuka. Pedro i ti sola nguvu hi lezi a wulileko mawunwa lawo, zonake a suka a famba a ya rila.

Laha a gambo gi sangulako ku woneka hi wa Wuntlhanu ni mixo, a vapristi va yisa Jesu le wutshanwini gabye ga hombe ga mitlhangano, le ndlwini ya Hubye. Laho va xuxa hi lezi va to maha Jesu. Va mu teka va mu yisa ka Pontiu Pilatu, a mufumeli wa muganga wa Judia.

A vapristi vaku ngalo ka Pilatu: ‘A wanuna loyi i bihile. I fanele ku dawa.’ Anzhako ka kuva a mahile ziwutiso zo kari ka Jesu, Pilatu i ngalo: ‘A nzi woni xihoxo ka yena.’ Hizalezo Pilatu i rumela Jesu ka Herodi Antipasi. Herodi hi yena mufumeli wa Galilea, kanilezi a ka xikhati lexo i kumeka Jerusalema. Herodi yenawu a nga woni xihoxo ka Jesu, hikwalaho i mu tlhelisa ka Pilatu.

Pilatu wa zi lava ku tlhatlha Jesu a famba. Kanilezi a valala va Jesu va lava lezaku ku tlhatlhiwa yinwani peresu wutshanwini gakwe. A peresu leyo hi muphangi Barabasi. Lomu ka xikhati xa dina Pilatu i humesa Jesu handle. Aku ngalo ka vanhu: ‘Wonani! A hosi ya nwina!’ Kanilezi a vapristi va tinduna va kanyuluka vaku: ‘Mu humese! Mu daye! Mu daye!’ Hizalezo Pilatu i tlhatlha Barabasi a famba, zonake va humesa Jesu lezaku a ya dawa.

Na xa ha sangula a xikhati xa ni gambo ga wa Wuntlhanu, Jesu i belelwa laha ka mhanze. A wu nge va woni laha mufananisweni, kanilezi ka tlhelo ginwe ni ginwani ga Jesu ku na ni muphangi a dawako yenawu laha mhanzeni. Xikhatanyana mahlweni ka kufa ka Jesu, a munwe wa vaphangi i mu byela lezi: ‘Nzi alakanye loku u enghena mufunweni wa wena.’ Zonake Jesu i hlamula aku: ‘Nza ku tsumbisa lezaku u tava na mina Paradiseni.’

A hi xitsumbiso xo saseka lexo? Wa gi tiva a paradise lego Jesu a wulawulako hi gona? Gi wa hi kwihi a paradise legi Nungungulu a nga gi mahile kusanguleni? Ina, gi wa hi misaveni. Kasike loku Jesu a fuma kota hosi le tilweni, yena i ta neha a wanuna loyi lezaku a ta hanya Paradiseni giswa misaveni. A hi nge tsaki hi lezo?

Mateu 26:57-75; 27:1-50; Luka 22:54-71; 23:1-49; Johani 18:12-40; 19:1-30.



Ziwutiso

  • Hi vamani hi kusangula va nga ni wutihlamuleli hi kufa ka Jesu?
  • Va maha yini a vapostoli a xikhati lexi Jesu a tekiwako hi varangeli va wukhongeli?
  • Zini zi mahekako le mutini wa Kayafasi, a mupristi wa hombe?
  • Hikuyini Pedro a sukako a ya rila?
  • Anzhako ka ku Jesu a tlhelisilwe ka Pilatu, xana a vapristi va tinduna va kanyuluka va ku yini?
  • Zini lezi Jesu a mahiwako na xa ha sangula a xikhati xa ni gambo ga wa Wuntlhanu, niku hi xihi a xitsumbiso lexi a mahelako a muphangi loyi a hayekilweko tlhelweni gakwe?
  • Gi ta kumeka kwihi a Paradise legi Jesu a wulawulileko hi gona?

Ziwutiso zo engetela

  • Gonza Mateu 26:57-75.

    Xana a ziro za hubye yo tlakuka ya vaJuda zi kombisile kuyini a ku a timbilu tabye ti wa bihile? (Mat. 26:59, 67, 68)

  • Gonza Mateu 27:1-50.

    Hikuyini hi nga ha wulako a ku a kutisola loku Judasi a ku zwileko ku wa nga hi ka lisine? (Mat. 27:3, 4; Mar. 3:29; 14:21; 2 Kor. 7:10, 11)

  • Gonza Luka 22:54-71.

    Xigonzo muni hi zi kotako ku xi kuma xungetano hi lezi Pedro a alileko Jesu wusikwini ga kutokometwa ni kukhonwa kakwe? (Lu. 22:60-62; Mat. 26:31-35; 1 Kor. 10:12)

  • Gonza Luka 23:1-49.

    Xana Jesu i hlamulisile kuyini a kubiha loku a mahelweko, niku xigonzo muni hi zi kotako ku xi kuma hi ka lezo? (Lu. 23:33, 34; Rom. 12:17-19; 1 Ped. 2:23)

  • Gonza Johani 18:12-40.

    Hambulezi Pedro a nga nyimile nkhata hi xikhatanyana hi kota ya ku khonwa hi kuchava munhu, yena i zile a tiya a tlhela a maha mupostoli a dumileko. Xana lezo zi komba yini? (Joh. 18:25-27; 1 Kor. 4:2; 1 Ped. 3:14, 15; 5:8, 9)

  • Gonza Johani 19:1-30.

    Mawonela wahi ya ku ringanisela lawa Jesu a ngave nawo xungetano hi zilo zi wonekako? (Joh. 2:1, 2, 9, 10; 19:23, 24; Mat. 6:31, 32; 8:20)

    Xana a magezu yo gumesa ya Jesu a xikhati lexi a nga kari afa ma ti kombisile kuyini a ku ma wa hi ya ku giya hi lezi a nga yimele wuhosi ga Jehova? (Joh. 16:33; 19:30; 2 Ped. 3:14; 1 Joh. 5:4)