Hunza uya ka timhaka ta kona

Tlhela ka xaxameto wa tihloko ta mhaka

Timboni ta Jehovha

Select language ciTshwa

Tlhatlhambuto 75: Mune Wa Vafana Le Babuloni

Tlhatlhambuto 75: Mune Wa Vafana Le Babuloni

HOSI Nebukadnezzare i teka vontlhe vaIsraeli lava va gonzileko nguvu a va yisa Babuloni. Anzhako ka xikhati a hosi yi hlawula xikari ka vona a majaha lawa ma nga timbhuri ni ya wutlhari nguvu ku hunza vontlhe. A mune wa vona hi vafana lava u va wonako kwalaha. Munwe hi Danieli, ni lava vanwani va vanharu a vaBabuloni va va vitana ku ngalo hi Xadrake, Mexake na Abed-nego.

Nebukadnezzare i na ni mixuvo ya ku gonzisa majaha lawo a ku tira lomu ndlwini yakwe ya wuhosi. Loku ku ta hunza malembe manharu ya gonziselelo yena i ta hlawula ntsena lawa ma nga ni wutlhari nguvu lezaku ma mu vuna a ku xuxa timhaka. A hosi yi lava lezaku a vafana lavo vava lava va tiyileko na va hi ni kuhanya khwatsi a xikhati lexi va gonzisiwako. Hikwalaho yona yi laya lezaku a malanza ya yona ma nyika a vafana lavo a zakuga za zinwe zo nona ni vinya lezi yona ni ngango wa yona va zi amukelako.

Danieli, Xadrake, Mexake, na Abed-nego na va tlhamusela a kukholwa kabye

Hi nga cuwuka jaha Danieli. Wa zi tiva lezi a wulako ka nduna ya malanza ya Nebukadnezzare, Axpenaze? Danieli i mu byela lezaku yena a nga zi lavi kuga zilo zo nona za le mezeni ya hosi. Kanilezi lezo zi karata Axpenaze. Yena aku ngalo: ‘A hosi yi leletele lezi mu faneleko kuga ni kunwa. Niku loku mu nga woneki na mu hanya khwatsi a kufanana ni manwani majaha, yena wa zi kota ku nzi daya.’

Hikwalaho Danieli i famba ka murinzeli a vekilweko hi Axpenaze kasi ku hlayisa yena ni vanghana vakwe va vanharu. A yaku ngalo: ‘Maha wuxinji u hi ringa a masiku ya 10. Hi nyike kuga matsawu ni kunwa mati. Zonake u hi ringanisa ni manwani majaha lawa ma gako a zakuga za hosi, u wona ku ngalo hi vamani va wonekako va hi chukwana.’

A murinzeli i vumela ku maha lezo. Niku laha a masiku ya 10 ma mbhelako, Danieli ni vanghana vakwe va vanharu va woneka na va hanya khwatsi nguvu ku hunza wontlhe manwani majaha. Hizalezo a murinzeli i va tsika va simama kuga matsawu wutshanwini ga lezi a hosi yi va nyikako.

Kumbheleni ka malembe manharu a majaha wontlhe ma tekiwa maya ka Nebukadnezzare. Anzhako ka kuva yi wulawulile ni majaha wontlhe, a hosi yi kuma lezaku Danieli ni vanghana vakwe va vanharu hi vona va nga ni wutlhari nguvu ku hunza vontlhe. Hikwalaho yena i va veka kota vavuneteli vakwe lomu ndlwini ya wuhosi. Niku xontlhe xikhati lexi a hosi yi mahako ziwutiso ka Danieli, Xadrake, Mexake na Abed-nego kutani a va nyikako timhaka to karata, vona va ti komba va hi ni wutivi nguvu hi ka makhati ya 10 ku hunza vontlhe vapristi kutani titlhari.

Danieli 1:1-21.



Ziwutiso

  • Hi vamani a vafana lava va mune va nga mufananisweni, niku hikuyini vahi Babuloni?
  • Zini lezi Nebukadnezzare a zi xuvako xungetano hi vafana lava va mune, niku zilayelo muni lezi yena a nyikako malanza yakwe?
  • Xikombelo muni lexi Danieli a xi mahako xungetano hi zakuga ni zakunwa lezi zi ta nga nehelwa yena ni vanghana vakwe va vanharu?
  • Anzhako ka kuva va gile matsawu hi khume ga masiku, xana Danieli ni vanghana vakwe va vanharu va hambanisa kuyini ni manwani majaha?
  • Zi mahekisa kuyini a ku Danieli ni vanghana vakwe va vanharu va kumeka ndlwini ya wuhosi, niku xana vona va na ni wutlhari ga chukwana ku hunza tin’anga ni titlhari hi ndlela muni?

Ziwutiso zo engetela

  • Gonza Danieli 1:1-21.

    Kutikarata muni ku lavekako lezaku hi zi kota ku timisela ziringo ni ku hlula gome? (Dan. 1:8; Gen. 39:7, 10; Gal. 6:9)

    Xana a vanhu vaswa inyamutlha va nga ringiwa kutani ku kurumetwa hi tindlela muni lezaku va maha lezi a vo kari va zi wonako kota zilo zo hlawuleka? (Dan. 1:8; Mav. 20:1; 2 Kor. 6:17-7:1)

    Xana a tlhatlhambuto wa Biblia xungetano hi majaha lawa ya mune ya maHeberu wu hi vuna a ku tiva yini maringano ni ku gonza a wutivi ga misava? (Dan. 1:20; Isa. 54:13; 1 Kor. 3:18-20)