Hunza uya ka timhaka ta kona

Tlhela ka xaxameto wa tihloko ta mhaka

Timboni ta Jehovha

Select language ciTshwa

Tlhatlhambuto 67: Jehoxafate A Tsumba Jehova

Tlhatlhambuto 67: Jehoxafate A Tsumba Jehova

WA VA tiva a ku hi vamani vavanuna lava niku zini lezi va mahako ke? Vona vo huma a ku yalwa, niku a vavanuna lava va rangileko vo yimbelela. Kanilezi u nga ha wutisa uku: ‘Hikuyini a vayimbeleli lava va nga hiko ni tisupado ni matlhari kasi kulwa hi zona ke?’ A hi woneni.

Vaisraeli na vaya kulweni

Jehoxafate i hosi ya mufumo wa Israeli wa tixaka timbiri. Yena i hanya xikhatini xa xinwe ni xa Hosi Ahabi zinwe na Jezebeli va mufumo wa le nwalungu wa tixaka ta 10. Kanilezi Jehoxafate i hosi ya yinene, niku a raru wakwe Asa i wa hi hosi ya yi nene na yenawu. Hikwalaho a vanhu va mufumo wa seno dzongeni wa tixaka timbiri va hanya wutomi gi nene hi malembe yo tala.

Kanilezi ku humelela nchumu wo kari wu chavisako vanhu makunu. A mitsumi yi bikela Jehoxafate yiku ngalo: ‘Kata butho ga hombe hi le matikweni ya Moabi, Amoni ni le Xitsungeni xa Seire a ku ta ku vukela.’ A vaIsraeli vo tala va tsombana le Jerusalema lezaku va hlota xivuno xa Jehova. Vona va famba tempeleni, zonake kwaseyo Jehoxafate i khongela aku: ‘O Jehova Nungungulu wa hina, a hi zi tivi lezi hi to zi maha. A hi na ntamu mahlweni ka butho legi ga hombe. Hi cuwukela wena a kuva u hi vuna.’

Jehova wa ingisa, a tlhela a rumela munwe wa malanza yakwe lezaku a byela vanhu ku ngalo: ‘A kulwa a hi ka nwina, kanilezi ka Nungungulu. A hi nwina mu ta ngalwa. Cuwukiselani basi, mu wona lezi Jehova a to mu hanyisisa zona.’

Zonake ni mixo wa kona Jehoxafate i byela vanhu ku ngalo: ‘Tsumbani Jehova!’ Yena makunu i humesa vayimbeleli a va rangisa mahlweni ka masochwa yakwe, niku laha va fambako va yimbelela tisimu ta ku dumisa Jehova. Wa zi tiva lezi zi mahekako laha va chikelako kusuhani ni le kulweni? Jehova i maha lezaku a masochwa ya valala malwa hi xa ka wona. Ni loku a vaIsraeli va chikela, a masochwa wontlhe ya valala ma file!

Xana Jehoxafate a nga vangi ni wutlhari hi ku tsumba Jehova ke? Hi tava va wutlhari loku hinawu hi Mu tsumba.

1 Tihosi 22:41-53; 2 Kronekele 20:1-30.


Ziwutiso

  • Himani Jehoxafate, niku i hanya ka xikhati muni?
  • Hikuyini a vaIsraeli va chavako, niku zini lezi a vo tala xikari kabye va mahako?
  • Xana Jehova i hlamulisa kuyini a mukhongelo wa Jehoxafate?
  • Zini lezi Jehova a mahako na ku nga se sangula a kulwa?
  • Xigonzo muni hi zi kotako ku xi kuma hi ka Jehoxafate?

Ziwutiso zo engetela

  • Gonza 2 Kronekele 20:1-30.

    Xana Jehoxafate i kombisisile kuyini lezi a malanza yo tsumbeka ya Nungungulu ma faneleko ku maha a xikhati lexi ma tlhanganako ni ziyimo zi dzukisako? (2 Kro. 20:12; Tis. 25:15; 62:1)

    Kota lezi xontlhe xikhati Jehova a tirisako ndlela ya ku wulawulisana hi yona a xikhati lexi a tirisanako ni vanhu vakwe, i ndlela muni a yi tirisako inyamutlha? (2 Kro. 20:14, 15; Mat. 24:45-47; Joh. 15:15)

    Loku Nungungulu a sangula a “kulwa ka siku lego ga hombe ga Nungungulu wa Ntamu-wontlhe,” xana lezi hi ta nga zi hanya zi ta fanana ni lezi Jehoxafate a tlhangeneko nazo hi ndlela muni? (2 Kro. 20:15, 17; 32:8; Kuv. 16:14, 16)

    Na va pimanyisa vaLevi, xana a maphayona ni vamisionario va maha a hlengo wa lixaka muni ntirweni wa kuxumayela wa misava yontlhe inyamutlha? (2 Kro. 20:19; Rom. 10:13-15; 2 Tim. 4:2)