Hunza uya ka timhaka ta kona

Tlhela ka xaxameto wa tihloko ta mhaka

Timboni ta Jehovha

Select language ciTshwa

Tlhatlhambuto 57: Nungungulu A Hlawula Davida

Tlhatlhambuto 57: Nungungulu A Hlawula Davida
Davida na a ponisa yivu

WA ZI wona lezi zi mahekileko? A mufana loyi i ponisile a yivana leyi hi ka urso. A urso yi tile yi ta rwala a yivana na yi lava a ku ya yiga. Kanilezi a mufana i lo yi hlongolisa, a ponisa a yivana nonwini wa urso. Kanilezi laha a urso yi nga mu vukela, a mufana i la su yi khoma a yi khehesela a yi daya! Ka xinwani xikhati yena i lo ponisa yinwe ya tiyivu hi ka nghala. A hi mufana wa ntamu loye? Wa mu tiva a ku himani?

Loyi hi jaha Davida. Yena i hanya doropeni ga le Betlehema. A kokwani wakwe ku wa hi Obedi, a n‘wana wa Rute na Boazi. Wa va alakanya? Ni raru wa Davida hi Jese. Davida i risa tiyivu ta raru wakwe. Davida i pswalilwe 10 wa malembe anzhako ka loku Jehova a hlawulile Saule lezaku ava hosi.

Ku chikela xikhati laha Jehova a nge ngalo ka Samueli: ‘Teka mafurana yo hlawuleka uya mutini wa Jese le Betlehema. Nzi hlawulile munwe wa vana vakwe lezaku ava hosi.’ Loku Samueli a wona a n’wana wa Jese wa nhonzwa Eliabe, i ngalo lomu mbilwini: ‘Loyi hi yena hakunene a hlawulilweko hi Jehova.’ Kanilezi Jehova i mu byela lezi: ‘U nga cuwuki kuleha ni kusaseka ka yena. A nzi mu hlawulangi a kuva hosi.’

Makunu Jese i vitana n’wana wakwe Abinadaba a mu neha ka Samueli. Kanilezi Samueli aku: ‘Ahihi, yenawu loyi Jehova a nga mu hlawulangi.’ Hi kulanzela, Jese i neha n’wana wakwe Xama. Samueli aku ngalo: ‘Ahihi, yenawu loyi Jehova a nga mu hlawulangi.’ Xikari ka vana vakwe, Jese i neha ka Samueli a ntlhanu ni vambiri, kanilezi Jehova a nga hlawuli ni munwe wabye. Samueli a wutisa aku: ‘Xana lava hi vona vontlhe vafana?’

Jese aku ngalo: ‘Ka ha hi ni loyi wa nzisana. Kanilezi yena i le handle a risa tiyivu.’ Laha Davida a nehiwako, Samueli i wona lezaku mufana wo saseka. Jehova aku: ‘Hi yaloyi. Chulula mafura hehla ka yena.’ Lezo hi zona a mahako Samueli. Ku tata xikhati laha Davida a to maha hosi ya Israeli.

1 Samueli 17:34, 35; 16:1-13.



Ziwutiso

  • Hi gihi a vito ga mufana loyi a nga laha mufananisweni, niku hi zi tivisa kuyini a ku yena i nhenha?
  • I hanya kwihi Davida, niku hi gihi a vito ga raru wakwe ni ga kokwani wakwe wa xinuna?
  • Hikuyini Jehova a byelako Samueli a ku famba mutini wa Jese le Betlehema?
  • Zini zi mahekako a xikhati lexi Jese a nehako vana vakwe va ntlhanu ni vambiri ka Samueli?
  • Laha Davida a nehiwako, zini lezi Jehova a byelako Samueli?

Ziwutiso zo engetela

  • Gonza 1 Samueli 17:34, 35.

    Xana a zimaho lezi zi dlunyatisisa kuyini a ku Davida munhu wa ku tiya-hlana ni wa ku khegela Jehova? (1 Sam. 17:37)

  • Gonza 1 Samueli 16:1-14.

    Xana a magezu ya Jehova ma nga ka 1 Samueli 16:7 ma hi vunisa kuyini a ku ngavi ni xihlawulela zinwe ni ku potsa a ku lamula hi nghohe? (Miti. 10:34, 35; 1 Tim. 2:4)

    Xana a xikombiso xa Saule xi kombisa kuyini a ku loku Jehova a susa a moya wakwe wa ku basa hehla ka munhu, a wutshamu lego ga phanga gi nga tatiswa hi moya wa ku biha, kutani hi kubyekelela ka yena kumaheni ka kubiha? (1 Sam. 16:14; Mat. 12:43-45; Gal. 5:16)