Hunza uya ka timhaka ta kona

Tlhela ka xaxameto wa tihloko ta mhaka

Timboni ta Jehovha

Select language ciTshwa

Tlhatlhambuto 45: Ku Tsemakanya Congo Wa Jordani

Tlhatlhambuto 45: Ku Tsemakanya Congo Wa Jordani

HI NGA wona! A vaIsraeli vo tsemakanya a Congo wa Jordani! Kasi a mati ma kwihi? Kota lezi ku nako nguvu tivula ka xikhati lexi xa lembe, a congo wu wa tele nguvu timeneti titsongwani ntsena mahlweni. Kanilezi a xikhati lexi a mati wontlhe a ma ha hi kona! Ni vaIsraeli vo tsemakanya misaveni yi womileko a ku kota lezi va nga tsemakanyisa zona a Bimbi go Pswhuka! Ma yile kwihi a mati wontlhe ke? A hi woneni.

Vaisraeli na va tsemakanya a Congo wa Jordani

Loku ku chikele xikhati xa ku vaIsraeli va tsemakanya a Congo wa Jordani, Jehova i leletele Joxua a ku byela vanhu ku ngalo: ‘A vapristi va ta teka a nghaxa ya xivumelwano va ranga mahlweni ka hina. Loku va peta mikonzo yabye lomu matini ya Congo wa Jordani, makunu a mati ma ta nyima ku khulunga.’

Hizalezo a vapristi va rwala a nghaxa ya xivumelwano, va ranga nayo mahlweni ka vanhu. Loku va chikela Jordani, a vapristi va enghena matini. Wona ma koka hi ntamu niku ma etile. Kanilezi zalezo va khumbako mati hi mikonzo yabye, a mati ma sangula ku nyima a ku khulunga! Lexo xihlamaliso! Jehova i nyimisile mati hi kwase ma tako hi kona. Hikwalaho, hi xikhatanyana a ka ha hi na mati lomu congweni!

A vapristi va rwalako a nghaxa ya xivumelwano va famba kala xikari ka congo wu womileko. Wa zi kota ku va wona laha ka mufananiso? Na va yimile laho, a vaIsraeli vontlhe va tsemakanya a Congo wa Jordani misaveni yo woma!

Loku vontlhe va tsemakanyile, Jehova i leletela Joxua a ku byela lezi a 12 wa vavanuna va ntamu: ‘Nghenani congweni muya laha a vapristi va yimileko kona ni nghaxa ya xivumelwano. Tekani 12 wa maribye, mu ya ma yimisa laha mu ta nga tshama kona wusiku legi. Kasike, xikhatini xi tako, loku a vana va nwina va mu wutisa a ku ma wula yini maribye lawa, mu ta va byela lezaku a mati ma lo nyima ku khulunga a xikhati lexi a nghaxa ya xivumelwano ya Jehova yi nga tsemakanya Jordani. A maribye ma ta mu alakanyisa hi xihlamaliso lexi!’ Joxua i vekawu 12 wa maribye laha a vapristi va nga yimile kona xikari ka congo.

Joxua

Hi kugumesa Joxua i byela vapristi va rwalako a nghaxa ya xivumelwano aku: ‘Humani lomo Jordani.’ Ni zalezo va humako, a congo wu tlhela wu sangula ku khulunga.

Joxua 3:1-17; 4:1-18.



Ziwutiso

  • Xihlamaliso muni a xi mahako Jehova kasi ku a vaIsraeli va zi kota ku tsemakanya a Congo wa Jordani?
  • Xana a vaIsraeli va fanele ku kombisisa kuyini a kukholwa kabye kasi ku tsemakanya a Congo wa Jordani?
  • Hikuyini Jehova a leletelako Joxua a ku teka a 12 wa maribye ya hombe ya lomu xikari ka congo?
  • Zini zi mahekako ka xalexo xikhati a vapristi va humako hi lomu Jordani?

Ziwutiso zo engetela

  • Gonza Joxua 3:1-17.

    Kota lezi zi kombiwako hi tlhatlhambuto lowu, ku laveka a ku hi maha yini kasi ku amukela a xivuno ni makatekwa hi ka Jehova? (Jox. 3:13, 15; Mav. 3:5; Jak. 2:22, 26)

    Wu wa hi ka matshamela muni a Congo wa Jordani a xikhati lexi a vaIsraeli va wu tsemakanyileko va ya Tikweni gi Tsumbisilweko, niku xana lezo zi kulisisile kuyini a vito ga Jehova? (Jox. 3:15; 4:18; Tis. 66:5-7)

  • Gonza Joxua 4:1-18.

    Xana a maribye lawa ya 12 ma tekilweko Jordani ma ya yimiswa Gilgale ma tirele khungo muni? (Jox. 4:4-7)