Hunza uya ka timhaka ta kona

Tlhela ka xaxameto wa tihloko ta mhaka

Timboni ta Jehovha

Select language ciTshwa

Tlhatlhambuto 44: Rahabi A Fihla Tihloli

Tlhatlhambuto 44: Rahabi A Fihla Tihloli

A VAVANUNA lava va lomu mhangweni. Va fanele ku tsutsuma, loku va nga mahi lezo va ta dawa. A vavanuna lava tihloli ta Israeli, ni wasati loyi a va vunako hi Rahabi. Rahabi i hanya kwalaha ka yindlu leyi yi nga laha khurisini ga doropa ga Jeriko. A hi poleni a ku hikuyini a vavanuna lava va hi lomu mhangweni.

A vaIsraeli va ti longisele ku tlhatuka a Congo wa Jordani kasi ku ya enghena tikweni ga Kanani. Kanilezi na va nga se maha lezo, Joxua i rumela tihloli timbiri. Yena i ti byela lezi: ‘Fambani mu ya hlola a tiko ni doropa ga Jeriko.’

Rahabi ni tihloli timbiri ta vaIsraeli

Laha a tihloli ti enghenako Jeriko, tiya mutini wa Rahabi. Kanilezi a munhu wo kari i byela a hosi ya Jeriko: ‘Ku nghenile vaIsraeli vambiri lomu a wusiku legi kasi ku ta hlola a tiko.’ Laha a hosi yi zwako lezo, yi rumela vavanuna a kuya ka Rahabi, vona va laya: ‘Humesa vavanuna lava va nga lomu ndlwini ya wena!’ Kanilezi Rahabi i fihlile tihloli laha ka langwa ga yindlu yakwe. Makunu yena aku: ‘Hakunene ku tile vavanuna vo kari mutini wa mina, kanilezi a nzi tivi a ku va wata hi kwihi. Neti gi nga sangula ku phuma va lo suka, na nyangwa ya doropa yi nga se valiwa. Loku mu hatlisa, ma zi kota ku va kuma!’ Hizalezo a vavanuna lavo va suka a ku va lanza.

Anzhako ka ku va sukile, Rahabi i hatlisa a kanziha aya le langweni. Yena i byela tihloli aku: ‘Nza zi tiva lezaku Jehova i ta mu nyika a tiko legi. Hi zwile hi lezi yena a womisileko zona a Bimbi go Pswhuka a xikhati lexi mu nga kari mu suka Gipite, ni lezi mu nga dayisisa zona a tihosi Sihoni na Ogi. Nzi mu mahele kusasa, makunu mahani wuxinji, mu nzi tsumbisa lezaku mu ta nzi mahelawu kusasa. Ponisani a raru wa mina na mamani, ni vanakulori va xinuna ni va xisati.’

A tihloli ti tsumbisa lezaku ti ta maha lezo, kanilezi Rahabi i fanele ku maha xo kari. A tihloli tiku: ‘Teka a ngoti leyi yo pswhuka u yi boha laha njhaneleni ya wena u tlhela u tlhanganyisa a maxaka ya wena wontlhe lomu ndlwini ya wena zinwe na wena. Ni loku hina hontlhe hi wuya a ku ta teka Jeriko, hi ta wona a ngoti leyi laha njhaneleni ya wena kasi hi nga dayi ni munwe lomu ndlwini ya wena.’ Loku tihloli ti tlhela ka Joxua, ti mu hlawutela zontlhe lezi zi nga humelela.

Joxua 2:1-24; Maheberu 11:31.



Ziwutiso

  • I hanya kwihi Rahabi?
  • Hi vamani a vavanuna lava va vambiri va nga mufananisweni, niku hikuyini va nga laha Jeriko?
  • Zini lezi a hosi ya Jeriko yi layako Rahabi a kuva a zi maha, niku i hlamulo muni a wu nyikako Rahabi?
  • Xana Rahabi i vunisa kuyini a vavanuna lava va vambiri, niku wuxinji muni a kombelako ku mahelwa?
  • Xitsumbiso muni xi mahelwako Rahabi hi tihloli ta timbiri?

Ziwutiso zo engetela

  • Gonza Joxua 2:1-24.

    Xana xi tatisekisile kuyini a xitsumbiso xa Jehova xi tsalilweko lomu ka Eksodusi 23:28 a xikhati lexi a vaIsraeli va tileko ku ta vukela Jeriko? (Jox. 2:9-11)

  • Gonza Maheberu 11:31.

    Xana a xikombiso xa Rahabi xi dlunyatisisa kuyini a lisima la kukholwa? (Rom. 1:17; Maheb. 10:39; Jak. 2:25)