Hunza uya ka timhaka ta kona

Tlhela ka xaxameto wa tihloko ta mhaka

Timboni ta Jehovha

Select language ciTshwa

Tlhatlhambuto 43: Joxua A Maha Murangeli

Tlhatlhambuto 43: Joxua A Maha Murangeli

MOSI wa zi lava ku enghena Kanani ni vaIsraeli. Hizalezo yena i kombela aku: ‘Jehova, nzi vumele nzi tlhatuka a Congo wa Jordani nzi ya wona a tiko go saseka.’ Kanilezi Jehova aku: ‘Zi ku enele! U nga engeti u kumbuka a mhaka leyo!’ Wa zi tiva a ku hikuyini Jehova a wulileko lezo?

Hi mhaka ya lezi zi nga maheka a xikhati lexi Mosi a ngaba a ribye. Khumbula, yena na Aroni a va dzunzangi Jehova. A va tlhamuselangi a vanhu a ku ku wa hi Jehova a nga wa humesa mati hi laha ribyeni. Hi xigelo lexo Jehova i te ngalo i wa nga ta va tsika va enghena Kanani.

Zonake loku ku hunzile tihweti titsongwani na Aroni a file, Jehova i byela Mosi aku: ‘Teka Joxua, u mu yimisa mahlweni ka mupristi Eliazare ni ka vanhu. Kwalaho mahlweni ka vona vontlhe, va byele uku Joxua hi yena murangeli wa muswa.’ Mosi i maha khwatsi hi lezi Jehova a wulako, kota lezi u zi wonako laha ka mufananiso.

Mosi na a tivisa lezaku Joxua murangeli

Makunu Jehova i byela Joxua aku: ‘Tiya, u nga chavi. U ta rangela vaIsraeli kala tikweni ga Kanani legi nzi va tsumbisileko gona, nzi tava zinwe na wena.’

Anzhako Jehova i byela Mosi a ku kanziha le hehla ka Xitsunga xa Nebo le tikweni ga Moabi. Hi kwale hehla Mosi wa zi kota ku cuwuka tlhatuko wa Congo wa Jordani a wona a tiko go saseka ga Kanani. Jehova aku: ‘Legi hi gona a tiko nzi tsumbisileko ku gi nyika ka vana va Abrahama, Isaka na Jakobe. Nzi ku tsikile u gi wona, kanilezi nzi nga ta ku tsika u enghena ka gona.’

Mosi ifa kwale hehla ka Xitsunga xa Nebo. Yena i wa hi ni tanga ya 120 wa malembe. I wa ha tiyile, ni mahlo yakwe ma wa ha wona khwatsi. A vanhu va bayiseka nguvu va tlhela va rila hi lezi Mosi a fileko. Kanilezi va tsakile hakuva va na na Joxua kota murangeli wabye wa muswa.

Mitsengo 27:12-23; Deuteronome 3:23-29; 31:1-8, 14-23; 32:45-52; 34:1-12.



Ziwutiso

  • Laha mufananisweni, hi vamani a vavanuna lava va vambiri va yimileko zinwe na Mosi?
  • Zini lezi Jehova a byelako Joxua?
  • Hikuyini Mosi a kanzihako le hehla ka Xitsunga xa Nebo, niku zini lezi Jehova a wulako ka yena?
  • I na ni tanga muni Mosi a xikhati lexi a fako?
  • Hikuyini a vanhu va bayisekako, kanilezi xigelo muni va nga naxo xa kuva va tsaka?

Ziwutiso zo engetela

  • Gonza Mitsengo 27:12-23.

    Xiavelo muni xo binza lexi Joxua a xi amukeleko hi ka Jehova, niku ku kombisiwa hi ndlela muni a kukhatala ka Jehova hi vanhu Vakwe inyamutlha? (Mitse. 27:15-19; Miti. 20:28; Maheb. 13:7)

  • Gonza Deuteronome 3:23-29.

    Hikuyini Jehova a nga vumelangiko Mosi na Aroni a kuva va tlhatuka va ya tikweni ga xitsumbiso, niku xigonzo muni hi zi kotako ku xi kuma hi lezo? (Deut. 3:25-27; Mitse. 20:12, 13)

  • Gonza Deuteronome 31:1-8, 14-23.

    Xana a magezu ya Mosi ya ku salisa Israeli ma kombisa kuyini a ku yena i vumele a kutsayisa ka Jehova hi kutitsongahata? (Deut. 31:6-8, 23)

  • Gonza Deuteronome 32:45-52.

    Xana a Mhaka ya Nungungulu yi fanele ku khumbisa kuyini wutomi ga hina? (Deut. 32:47; Levi 18:5; Maheb. 4:12)

  • Gonza Deuteronome 34:1-12.

    Hambulezi Mosi a nga tshukangiko a wona Jehova hi wutsumbu Gakwe, zini lezi zi kombiwako hi Deuteronome 34:10 xungetano hi kuzwanana kakwe na Jehova? (Ekso. 33:11, 20; Mitse. 12:8)