Hunza uya ka timhaka ta kona

Tlhela ka xaxameto wa tihloko ta mhaka

Timboni ta Jehovha

Select language ciTshwa

Tlhatlhambuto 38: A Tihloli Ta 12

Tlhatlhambuto 38: A Tihloli Ta 12
Tihloli ta vaIsraeli na ti pingile mihanzu

HI NGA wona a mihanzu leyi yi rwaliwako hi vavanuna lava. Wona lezi xi nga kulisa zona a xitata lexiya xa mauva. Xi lava vavanuna vambiri kasi ku xi rwala hi pingo. Tlhela u wona makuwu ni mapomegranada. Yi ta hi kwihi a mihanzu leyi yo saseka ke? Yi ta hi tikweni ga Kanani. Khumbula, le Kanani hi le Abrahama, Isaka na Jakobe va nga hanyile kona xikhati xo kari. Kanilezi hi kota ya ndlala, Jakobe ni ngango wakwe, i rurile lomo aya Gipite. Lezi, na ku hunzile xipimo xa 216 wa malembe, Mosi i rangela vaIsraeli a ku tlhelela Kanani. Va chikele ka wutshamu gi vitwako Kadexe lomu xiwuleni.

A tikweni ga Kanani ku hanya vanhu vo biha. Zonake Mosi i rumela a 12 wa tihloli, a ti byela lezi: ‘Fambani mu ya tiva a ku vanhu vangani va hanyako lomo, niku vanhu va ntamu ke. Tivani lezaku a misava yi nene kasi ku pfuna mihanzu ke. Tlhelani mu tiyiseka a ku wuya ni mihanzu yo kari.’

Loku a tihloli ti tlhela Kadexe, ti ngalo ka Mosi: ‘Hakunene a tiko gi nene.’ Zonake kasi ku tiyisa lezo, va komba Mosi a mihanzu yo kari. Kanilezi a 10 wa tihloli ti ngalo: ‘A vanhu va hanyako lomo zihotlovila. Hi ta dawa loku hi zama a ku teka tiko.’

Loku vazwa lezo a vaIsraeli vo chava. Vona vaku ngalo: ‘Ku wa tava chukwana a ku fela Gipite, hambu lomu xiwuleni. Hi ta dawa yimpini, niku a vasati va hina ni vanana va hina va ta khomiwa. A hi hlawuleni murangeli wa muswa wutshanwini ga Mosi, hi tlhela Gipite!’

Kanilezi a tihloli timbiri ti tsumba Jehova, ti tlhela ti zama a ku rulisa a vanhu. A mavito yabye hi Joxua na Kalebe. Tona tiku: ‘Mu nga chavi. Jehova i na hina. Zi nga ta karata a ku teka a tiko.’ Kanilezi a vanhu a va ingisi. Va tlhela va lava ni ku daya Joxua na Kalebe.

Lezo zi zangarisa nguvu Jehova, yena a byela Mosi lezaku: ‘A nga kona ni munwe wa tanga ya 20 wa malembe ni kuya mahlweni a ta nga enghena tikweni ga Kanani. Va wonile zihlamaliso lezi nzi nga zi maha le Gipite ni lomu xiwuleni, hambulezo a va nzi tsumbi. Hizalezo va ta nzulanzula lomu xiwuleni a 40 wa malembe kala a munhu wo gumesa afa. Ntsena Joxua na Kalebe hi vona va to enghena tikweni ga Kanani.’

Mitsengo 13:1-33; 14:1-38.



Ziwutiso

  • Zini u zi wonako xungetano hi xitata xa mauva xi nga laha mufananisweni, niku xi tile hi kwihi?
  • Hikuyini Mosi a rumelako a 12 wa tihloli a kuya tikweni ga Kanani?
  • Zini lezi ti wulako a tihloli ta 10 a xikhati lexi ti tlhelako ka Mosi?
  • Xana a tihloli timbiri ti kombisa kuyini a kutsumba ka Jehova, niku hi wahi a mavito ya tona?
  • Hikuyini a zangarileko Jehova, niku zini lezi a byelako Mosi?

Ziwutiso zo engetela

  • Gonza Mitsengo 13:1-33.

    Hi vamani lava va hlawulilweko a ku ya hlola a tiko, niku i lungelo muni ga lisima va ngave nago? (Mitse. 13:2, 3, 18-20)

    Xana a mawonela ya Joxua na Kalebe ma hambanisile kuyini ni lawa ya tinwani tihloli, niku zi hi gonzisa yini lezo? (Mitse. 13:28-30; Mat. 17:20; 2 Kor. 5:7)

  • Gonza Mitsengo 14:1-38.

    Xitlharihiso muni hi faneleko ku xi ingisa xungetano hi ku ngurangurela lava va yimelako Jehova misaveni? (Mitse. 14:2, 3, 27; Mat. 25:40, 45; 1 Kor. 10:10)

    Xana ku kombisiwa kuyini ka Mitsengo 14:24 a ku Jehova hi wutsumbu gakwe wa khatalela a munwe ni munwani wa malanza yakwe? (1 Tih. 19:18; Mav. 15:3)