Hunza uya ka timhaka ta kona

Tlhela ka xaxameto wa tihloko ta mhaka

Timboni ta Jehovha

Select language ciTshwa

Tlhatlhambuto 36: A Role Ga Nzalama

Tlhatlhambuto 36: A Role Ga Nzalama

OHO! Zini va mahako a vanhu lava makunu? Vona vo khongela ka role! Hikuyini va mahako lezo?

Laha Mosi a hlwelako le hehla ka xitsunga, a vanhu ve ngalo: ‘A hi zi tivi lezi zi nga humelela Mosi. Makunu a hi maheni nungungulu loyi a to hi humesa ka tiko legi.’

Mosi na a hoxa a maribye lawa ya mambiri

Aroni a makabye wa Mosi i hlamula aku: ‘Hizona. Susani tiphera ta nwina ta nzalama lomu tindleveni, mu ti neha ka mina.’ Laha a vanhu va mahako lezo, Aroni i nyekisa a tiphera leto a maha a role ga nzalama hi tona. Ni vanhu vaku ngalo: ‘Loyi hi Nungungulu wa hina, loyi a hi humesileko hi le Gipite!’ Zalezo a vaIsraeli va maha a mubuzo wa hombe, va tlhela va khozela a role ga nzalama.

Loku Jehova a wona lezo, i zangara nguvu. Hizalezo aku ka Mosi: ‘Hatlisa u relela. A vanhu vo maha zo biha nguvu. Va rivakelwe milayo ya mina niku vo khizamela a role ga nzalama.’

Vanhu va khozelako role ga nzalama

Mosi i hatlisa ku relela hi le xitsungeni. Kasike loku a chikela kusuhani, yena i wona lezi. A vanhu va ranzele role ga nzalama na va yimbelela ni ku kina! Mosi i zangara nguvu laha ko kala a hoxa lahasi a timbila ta timbiri ta maribye leti ti nga ni milayo, hizalezo tona ti fayeka ti maha zipanze zo tala nguvu. Yena makunu i teka a role ga nzalama a gi nyekisa a tlhela a gi sila gi maha mapa.

A vanhu va mahile nchumu wo biha nguvu. Hikwalaho Mosi i byela vavanuna vo kari a ku teka tisupado tabye. Mosi aku: ‘A vanhu vo biha lava va nga khozela a role ga nzalama va fanele kufa.’ Hizalezo a vavanuna lavo va daya a 3.000 wa vanhu! Xana lezo a zi hi kombi a ku ku laveka lezaku hi khozela Jehova ntsena, na ku nga hi vanungungulu va mawunwa ke?

Eksodusi 32:1-35.



Ziwutiso

  • Zini lezi va mahako a vanhu lava laha mufananisweni, niku hikuyini?
  • Hikuyini a zangarileko Jehova, niku zini a mahako Mosi a xikhati lexi a wonako lezi a vanhu va mahako?
  • Zini lezi Mosi a byelako vavanuna vo kari ku maha?
  • Xigonzo muni hi faneleko ku nyikwa hi tlhatlhambuto lowu?

Ziwutiso zo engetela

  • Gonza Eksodusi 32:1-35.

    Xana a tlhatlhambuto lowu wu kombisa kuyini a mawonela ya Jehova xungetano hi ku patsela a wukhongeli ga mawunwa ni wukhozeli ga lisine? (Ekso. 32:4-6, 10; 1 Kor. 10:7, 11)

    Hi kwihi a kutiwonela loku a maKristu ma faneleko kuva nako kuhlawuleni ka zihungato, zo kota kuyimbelela ni kukina? (Ekso. 32:18, 19; Efe. 5:15, 16; 1 Joh. 2:15-17)

    Xana a lixaka la ka Levi li nyikile xikombiso xa xi nene xa ku yimela a kululama hi ndlela muni? (Ekso. 32:25-28; Tis. 18:25)