Hunza uya ka timhaka ta kona

Tlhela ka xaxameto wa tihloko ta mhaka

Timboni ta Jehovha

Select language ciTshwa

Tlhatlhambuto 33: Ku Tsemakanya A Bimbi Go Pswhuka

Tlhatlhambuto 33: Ku Tsemakanya A Bimbi Go Pswhuka

WONA lezi zi mahekako! Gayani hi Mosi a nawulutileko a nhonga yakwe hehla ka Bimbi go Pswhuka. Lava va nga zinwe naye kutshamisekeni laha mbhirini vaIsraeli. Kanilezi Faro ni butho gakwe gontlhe vo mbemba lomu bimbini. A hi woneni lezi zi nga mahekisa zona.

A butho ga vaGipite na gi mbemba

Kota lezi hi gonzileko, Faro i tlhatlhile vaIsraeli Gipite anzhako ka loku Nungungulu a nehile a ntungu wa wukhume hehla ka vaGipite. Xipimo xa 600.000 wa vavanuna va vaIsraeli va humile, zinwe ni vavasati ni vanana vo tala. Kambe, a vanwani vanhu vo tala, lava va nga kholwile ka Jehova, va fambile zinwe ni vaIsraeli. Vontlhe va lo teka a tiyivu, timbuti ni tihomu tabye.

Na va nga se suka, a vaIsraeli va lo kombela tinguwo ni zibya za nzalama ni za siliva ka vaGipite. A vaGipite va wa chava nguvu, hi kota ya ntungu wo gumesa lowu wu nga va wele. Hizalezo vona va lo nyika vaIsraeli zontlhe lezi va nga zi kombela.

Anzhako ka masikwanyana a vaIsraeli va lo chikela Bimbini go Pswhuka. Va lo humula laho. Nzeni ka xikhatanyana lexo, Faro ni vavanuna vakwe va lo sangula ku ti laya hi lezi va nga tlhatlhile vaIsraeli. Va te ngalo: ‘Hi tsikile tikhumbi ta hina ti famba!’

Hikwalaho Faro i lo cica mapimo yakwe kambe. Hi kuhatlisa yena i lo hloma a kareta yakwe ya yimpi zinwe ni butho gakwe. Makunu i lo sangula ku lanza vaIsraeli na a hi ni 600 wa tikareta to hlawuleka, zinwe ni tontlhe tikareta tinwani ta Gipite.

Laha a vaIsraeli va nga wona Faro ni butho gakwe na va va lanza, va lo chava nguvu. Ku wa nga hi na ndlela ya ku tsutsuma. A Bimbi go Pswhuka gi wa hi ka tlhelo ginwe, ni seno ku wata vaGipite hi ginwani tlhelo. Kanilezi Jehova i lo veka a refu xikari ka vanhu vakwe ni vaGipite. Hizalezo a vaGipite va wa nga zi koti ku wona vaIsraeli kasi ku va hlasela.

Jehova makunu i lo byela Mosi a ku nawuluta a nhonga yakwe hehla ka Bimbi go Pswhuka. Loku a mahile lezo, Jehova i lo maha mheho ya ntamu ya mutsuwuka-gambo yi pupuxa. A mati ya bimbi ma lo avanyeka, ma yima matlhelweni mambiri.

Makunu a vaIsraeli va lo sangula ku famba xikari ka bimbi misaveni yi womileko. Ku hunzile tihora kasi makume ya mazana ya makume ya mazana ya vanhu ni zihari zabye zontlhe va hunza hi kutshamiseka hi lomu bimbini kala ka yinwani mbhiri. Hi kugumesa a vaGipite va zi kotile ku tlhela va wona vaIsraeli. A tikhumbi tabye ti wa famba! Hizalezo va lo ghena hi kuhatlisa lomu bimbini va va lanza.

Laha va nga maha lezo, Nungungulu i lo maha lezaku a maroda ya tikareta tabye ma kunuka. A vaGipite va lo chava nguvu va sangula kuba huwa: ‘Jehova wa lwela a vanhu vakwe, ilwa na hina. A hi humeni lomu!’ Kanilezi va wa celwe nguvu.

Lezo hi xikhati lexi Jehova a nga byela Mosi a ku nawuluta a nhonga yakwe hehla ka Bimbi go Pswhuka, kota lezi u nga zi wona laha ka mufananiso. Ni loku Mosi a mahile lezo, a makhurisi ya mati ma lo sangula ku tlhela ma ya khubhunyeta vaGipite ni tikareta tabye. A butho gontlhe gi wa hi nzeni ka bimbi na gi lanza vaIsraeli. A ku humangi ni muGipite munwe na a hanya!

A hi kutsaka loku vontlhe vanhu va Nungungulu va nga hi nako hi ku ponisiwa! A vavanuna va lo yimbelela lisimu la kubonga ka Jehova, vaku: ‘Jehova i hlulile hi kuhlula ka hombe. Yena i hoxile mahaxi ni vakhileli va wona lomu bimbini.’ Miriamu, makabye wa Mosi i lo teka a mutandanda wakwe, ni vavasati vontlhe va lo mu lanzela ni mitandanda yabye. Va lo kina hi kutsaka, va yimbelela a lisimu la linwe leli li nga yimbeleliwa hi vavanuna, vaku: ‘Jehova i hlulile hi kuhlula ka hombe. Yena i hoxile mahaxi ni vakhileli va wona lomu bimbini.’

Eksodusi zipimo 12 kala 15.



Ziwutiso

  • Vavanuna vangani va vaIsraeli, zinwe ni vavasati ni vanana, va humileko hi le Gipite, niku hi vamani va humileko zinwe navo?
  • Xana i ti zwisisile kuyini Faro anzhako ka kuva a tsikile vaIsraeli va famba, niku zini lezi a nga maha?
  • Zini lezi a mahileko Jehova kasi ku valela vaGipite lezaku va nga hlaseli vanhu vakwe?
  • Zini zi nga maheka a xikhati lexi Mosi a nawulutileko a nhonga yakwe hehla ka Bimbi go Pswhuka, niku zini lezi va mahileko a vaIsraeli?
  • Zini zi nga maheka a xikhati lexi a vaGipite va nghenileko hi kuhatlisa lomu bimbini va lanza vaIsraeli?
  • Xana va kombisile kuyini a vaIsraeli a ku va wa tsakile niku va wa bonga Jehova hi lezi va ponisilweko?

Ziwutiso zo engetela

  • Gonza Eksodusi 12:33-36.

    Xana Jehova i mahisile kuyini lezaku a vanhu vakwe vava ni kutlheliselwa hi kota ya malembe yabye wontlhe ya wukhumbi mandleni ya vaGipite? (Ekso. 3:21, 22; 12:35, 36)

  • Gonza Eksodusi 14:1-31.

    Xana a magezu ya Mosi ma tsalilweko ka Eksodusi 14:13, 14 ma khumbisa kuyini malanza ya Jehova inyamutlha laha ku tshinelako a yimpi ya Har-Magedoni? (2 Kro. 20:17; Tis. 91:8)

  • Gonza Eksodusi 15:1-8, 20, 21.

    Hikuyini a malanza ya Jehova ma faneleko ku yimbelela tisimu ta ku mu dumisa? (Ekso. 15:1, 2; Tis. 105:2, 3; Kuv. 15:3, 4)

    Xikombiso muni xa ku dumisa Jehova xi vekilweko hi Miriamu ni vavasati lava va nga hi le Bimbini go Pswhuka ka vavasati va maKristu inyamutlha? (Ekso. 15:20, 21; Tis. 68:11)