Hunza uya ka timhaka ta kona

Tlhela ka xaxameto wa tihloko ta mhaka

Timboni ta Jehovha

Select language ciTshwa

Tlhatlhambuto 32: A Mintungu Ya 10

Tlhatlhambuto 32: A Mintungu Ya 10

WONA a mifananiso leyi. A wunwe ni wunwani wu komba a ntungu lowu Jehova a nga wu tisa Gipite. Ka mufananiso wo sangula wa zi kota ku wona Aroni na aba a Congo wa Nilo hi nhonga yakwe. Loku a mahile lezo, a mati ya congo ma lo hunzuka ma maha nkhata. A zidluwani zi lofa, ni congo wu lo sangula ku nuha.

Mintungu yi welako vaGipite

Hi kulanzela, Jehova i lo tisa makhele hi le Congweni wa Nilo. Wona ma wahi matshanwini wontlhe—lomu makhombarini, ka zibya za ku vuvela ka zona zibaba, mibhedini ya vanhu—ni ka gihi wutshamu. Loku a makhele ma file a vaGipite va lo ma wungeletela ma maha tinhulu ta hombe, ni tiko gi lo nuha hi wona.

Makunu Aroni i loba misava hi nhonga yakwe, ni ntshuri wu lo hunzuka wu maha zidudu. A zidudu ziharana zo haha zi lumako. Zona zi wa hi ntungu wa wunharu tikweni ga Gipite.

A mintungu leyi yi nga lanzela yi khumbile vaGipite ntsena, a yi khumbangi a vaIsraeli. Lowu wa wumune wu wa hi ntungu wa tinhongani ta hombe leti ti nga ya pomela tiyindlu ta vaGipite vontlhe. A ntungu wa wuntlhanu wu lo wela zihari. A tihomu to tala ni tiyivu zinwe ni timbuti ta vaGipite zi lofa.

Hi kulanzela, Mosi na Aroni va lo teka a khuma va gi xwanyela hehla. Gona gi lo vanga zidlayi ka vanhu ni zihari. Lowo wu wa hi ntungu wa wuntlhanu ni wunwe.

Anzhako ka lezo Mosi i lo tlakusa a canja gakwe le hehla, makunu Jehova i lo tisa kudzinza ni maralala. Ku wa hi vula ya maralala ya ku cima yi wa nga sena Gipite.

A ntungu wa wuntlhanu ni yinharu wu wa hi xidlemo xa hombe xa humbi. Mahlweni ka xikhati lexo cima yi wa nga seva kona a humbi yo tala nguvu yo khwatsi hi leyo tikweni legiya. Yona yi loga zontlhe lezi zi nga kala ku onhiwa hi maralala.

A ntungu wa wuntlhanu ni mune wu wa hi munyama. Hi masiku manharu a tiko gi lo fenengetiwa hi munyama wa ntima wo phu, kanilezi a vaIsraeli va wa hi ni kuwonekela lomu va nga hanya kona.

Hi kugumesa, Nungungulu i lo leletela a vanhu vakwe a ku nwatsekela a nkhata wa ximbutana kutani yivana timhanzeni tabye ta laha nyangweni. Makunu a ngelosi ya Nungungulu yi lo hunza hi Gipite. Loku a ngelosi yi wonile a nkhata, a yi dayangi munhu mutini lowo. Kanilezi lomu mitini yontlhe leyi ku nga hi hava nkhata timhanzeni ta laha nyangweni, a ngelosi ya Nungungulu yi lo daya a matewula ya vanhu zinwe ni ya zihari. Lowo wu wa hi ntungu wa wukhume.

Anzhako ka ntungu lowu wo gumesa, Faro i lo tlhatlha vaIsraeli. A vanhu va Nungungulu va wa ti longisele ku famba, hizalezo, ka wusiku galego va lo sangula a pfhumba gabye ga ku huma Gipite.

Eksodusi zipimo 7 kala 12.



Ziwutiso

  • Tirisa a mifananiso yi kombiwako laha, u hlawutela a mintungu yo sangula ya yinharu leyi Jehova a yi tisileko Gipite.
  • Kuve kwihi kuhambana ka mintungu yo sangula ya yinharu ni mintungu yinwani leyi yi tileko hi kulanzela?
  • Kuve wihi a ntungu wa wumune, wa wuntlhanu, wa wuntlhanu ni wunwe?
  • Hlawutela a ntungu wa wuntlhanu ni mimbiri, wa wuntlhanu ni yinharu, ni wa wuntlhanu ni mune.
  • Zini lezi Jehova a leleteleko vaIsraeli ku maha na wu nga seta a ntungu wa wukhume?
  • Wuve wihi a ntungu wa wukhume, niku zini zi mahekileko anzhako ka wona?

Ziwutiso zo engetela

  • Gonza Eksodusi 7:19- 8:23.

    Hambulezi a tin’anga ta Gipite ti zi kotileko ku wuyeta kumbiri a mintungu yo sangula ya mimbiri ya Jehova, zini lezi tona ti kurumetilweko ku vumela anzhako ka ntungu wa wunharu? (Ekso. 8:18, 19; Mat. 12:24-28)

    Xana a ntungu wa wumune wu kombisisile kuyini a wuzikoti ga Jehova ga ku vikela vanhu vakwe, niku a ku tiva lezo ku khumbisa kuyini vanhu va Nungungulu laha ku tshinelako a ‘kuxaniseka ka hombe’ loku ku tivisilweko na ka ha hi mahlweni? (Ekso. 8:22, 23; Kuv. 7:13, 14; 2 Kro. 16:9)

  • Gonza Eksodusi 8:24; 9:3, 6, 10, 11, 14, 16, 23-25; ni 10:13-15, 21-23.

    Hi yihi a mitlawa mimbiri ya vanhu leyi a Mintungu ya 10 yi mahileko lezaku yi poleka a ku a yi na ntamu wa hombe, niku lezo zi khumbisa kuyini lezi hina hi yi wonisako zona mitlawa leyo inyamutlha? (Ekso. 8:10, 18, 19; 9:14)

    Xana hi vunisiwa kuyini hi Eksodusi 9:16 a ku pima a xigelo xa ku Jehova a vumelela Satani lezaku a simama ave kona kala lezi? (Rom. 9:21, 22)

  • Gonza Eksodusi 12:21-32.

    Xana a Pasika gi mahile lezaku a kuhanyiswa ku koteka ka votala hi ndlela muni, niku gona a Pasika gi wa komba a ximaho muni? (Ekso. 12:21-23; Joh. 1:29; Rom. 5:18, 19, 21; 1 Kor. 5:7)