Hunza uya ka timhaka ta kona

Tlhela ka xaxameto wa tihloko ta mhaka

Timboni ta Jehovha

Select language ciTshwa

Tlhatlhambuto 31: Mosi Na Aroni Va Wonana Na Faro

Tlhatlhambuto 31: Mosi Na Aroni Va Wonana Na Faro

LOKU Mosi a tlhelele Gipite, i lo byela zontlhe xungetano hi zihlamaliso ka nakulobye Aroni. Ni loku Mosi na Aroni va kombile a zihlamaliso lezo, a vanhu vontlhe va lo vumela lezaku Jehova i wa hi na vona.

Zonake Mosi na Aroni va lo ya wonana na Faro. Va mu byelile lezi: ‘Jehova Nungungulu wa ka Israeli i ngalo, “Tsika a vanhu va mina va ya nzi khozela le xiwuleni, hi masiku manharu.”’ Kanilezi Faro i lo hlamula: ‘A nzi mu tivi Jehova. Niku nzi nga ta tsika Israeli a famba.’

Faro i wa zangarile, hakuva a vanhu va wa lava ku humula ka ntiro wabye kasi ku ya khozela Jehova. Hikwalaho yena i lo va kurumeta a ku tira hi ntamu nguvu. A vaIsraeli va lo sola Mosi hi lezi va nga hlayisiswa zona, na Mosi i lo bayiseka. Kanilezi Jehova i lo mu tangalisa. Jehova i te ngalo: ‘Nzi ta maha lezaku Faro a tsika a vanhu va mina va famba.’

Mosi na Aroni mahlweni ka Faro

Mosi na Aroni va lo tlhela va ya wonana na Faro. A khati legi va lo maha xihlamaliso. Aroni i lo hoxa a nhonga yakwe lahasi, yona yi hunzuka yi maha a nyoka ya hombe. Kanilezi a titlhari ta Faro tonawu ti lo hoxa tinhonga lahasi, ku humelela tinyoka. Kanilezi, hi nga wona! A nyoka ya Aroni yo mita a tinyoka ta titlhari. Hambulezo Faro a nga tsikangi a vaIsraeli va famba.

Makunu ku lota xikhati laha Jehova a nga nyika Faro a xigonzo. Wa zi tiva lezi a nga mahisa zona? I lo neha a 10 wa mintungu, kutani zixaniso za hombe, Gipite.

Anzhako ka mintungu yo tala, Faro i lo vitanisa Mosi, aku: ‘Nyimisa a ntungu, nzi ta tsika Israeli a famba.’ Kanilezi laha a ntungu wu nga nyima, Faro i lo cica a mapimo yakwe. A nga va tsikangi va famba. Kanilezi, hi kugumesa, anzhako ka ntungu wa wu 10, Faro i lo tlhatlha vaIsraeli.

Wa wu tiva a ntungu wunwe ni wunwani wa leyi ya 10? Hunzulusa a phajina kasi hi gonza hi yona.

Eksodusi 4:27-31; 5:1-23; 6:1-13, 26-30; 7:1-13.



Ziwutiso

  • Va khumbisilwe kuyini a vaIsraeli hi zihlamaliso lezi Mosi na Aroni va zi mahileko?
  • Zini lezi Mosi na Aroni va byelileko Faro, niku kuve wihi a hlamulo wa Faro?
  • Kota lezi zi kombiwako mufananisweni, zini zi nga maheka a xikhati lexi Aroni a hoxileko nhonga yakwe lahasi?
  • Xana Jehova i nyikisile kuyini xigonzo Faro, niku i hlamulisile kuyini Faro?
  • Zini zi mahekileko anzhako ka ntungu wa wukhume?

Ziwutiso zo engetela

  • Gonza Eksodusi 4:27-31 ni 5:1-23.

    Xana Faro i wa lava ku wula yini a xikhati lexi a ngaku: “Jehova a nzi mu tivi”? (Ekso. 5:2; 1 Sam. 2:12; Rom. 1:21)

  • Gonza Eksodusi 6:1-13, 26-30.

    Xana Jehova a nga ti tivekisangi ka Abrahama, Isaka, na Jakobe hi ndlela muni? (Ekso. 3:13, 14; 6:3; Gen. 12:8)

    Xana hi ti zwisa kuyini hi ku tiva lezaku Jehova i simamile a tirisa Mosi, hambulezi yena Mosi a ti zwileko na a nga fanelwi hi ntiro wakwe lowu a nga avelwe? (Ekso. 6:12, 30; Lu. 21:13-15)

  • Gonza Eksodusi 7:1-13.

    A xikhati lexi Mosi na Aroni va yisileko kulamula ka Jehova ka Faro hi kutiya-hlana, xikombiso muni va xi vekeleko malanza ya Nungungulu inyamutlha? (Ekso. 7:2, 3, 6; Miti. 4:29-31)

    Xana Jehova i kombisile kuyini kutlakuka kakwe ku hunzeleleko hehla ka vanungungulu va Gipite? (Ekso. 7:12; 1 Kro. 29:12)