Hunza uya ka timhaka ta kona

Tlhela ka xaxameto wa tihloko ta mhaka

Timboni ta Jehovha

Select language ciTshwa

Tlhatlhambuto 29: Hikuyini Mosi A Tsutsumileko

Tlhatlhambuto 29: Hikuyini Mosi A Tsutsumileko

CUWUKA Mosi na a kari a tsutsuma hi le Gipite. Wa zi kota ku wona vavanuna lava va mu hlongolisako? Wa zi tiva a ku hikuyini va lavako ku daya Mosi? A hi woneni a ku xana hi nga zi pola.

Mosi na a tsutsuma hi le Gipite

Mosi i kulele ndlwini ya Faro, a mufumeli wa Gipite. Yena i lo maha munhu wo tlhariha nguvu ni wa hombe. Mosi i zi tivile a ku yena i wa nga hi muGipite, kanilezi a vapswali vakwe va lisine va wa hi vaIsraeli va nga hi tikhumbi.

Siku go kari, laha a nga hi ni 40 wa malembe, Mosi i lo alakanyela ku ya wona lezi a va ka kabye va nga hanyisa zona. Zi wa chavisa lezi va nga kari va hlayisiswa zona. Yena i lo wona a muGipite na a kari aba khumbi ya muIsraeli. Mosi i lo cuwuka seno ni seno, laha a nga wona lezaku ku wa nga hi kona munhu a nga mu wona i loba a muGipite, ni muGipite i lofa. Zonake Mosi i lo tumbeta a xirumbi xakwe vunyeni.

Ka siku gi nga lanzela Mosi i lo huma a ku ya wona a va ka kabye kambe. Yena i wa pimisa lezaku i wa ta va vuna kasi va nga ha mahi tikhumbi kambe. Kanilezi i lo wona vavanuna vambiri va vaIsraeli na va kari valwa, hizalezo Mosi i te ngalo ka loyi a nga hoxisile: ‘U mu bela yini nakuloni?’

Ni wanuna i te ngalo: ‘Himani a ku vekileko akuva mufumeli ni mulamuli wa hina? U lava ku nzi daya kota lezi u nga daya a muGipite gayani ke?’

Mosi i lo chava makunu. Yena i lo zi tiva a ku vanhu va wa zi polile lezi a nga wa mahile muGipite. Faro yenawu i wa zi zwile, hizalezo i lo rumela vavanuna kasi ku daya Mosi. Lezo hi zona zi nga maha Mosi a tsutsuma hi le Gipite.

Loku Mosi a sukile Gipite, i loya kule le tikweni ga Midiani. Kwaseyo yena i lo tiva a ngango wa Jetro, kasike a chada ni munwe wa vanhanyana vakwe a vitwako Zipora. Mosi i lo maha murisi loyi a nga hlayisa tiyivu ta Jetro. Yena i hanyile 40 wa malembe le tikweni ga Midiani. Yena i wa hi ni tanga ya 80 wa malembe makunu. Zonake ka siku go kari, loku Mosi a kari a hlayisa a tiyivu ta Jetro, ku lo humelela nchumu wo hlamalisa lowu wu nga cica gontlhe wutomi ga Mosi. A hi woneni a ku xini a nchumu lowo wo hlamalisa.

Eksodusi 2:11-25; Mitiro 7:22-29.



Ziwutiso

  • Xana i kulele kwihi Mosi, kanilezi i wa tiva yini hi vapswali vakwe?
  • Zini a mahileko Mosi a xikhati lexi a nga hi ni tanga ya 40 wa malembe?
  • Zini lezi Mosi a byelileko wanuna wa muIsraeli a nga kari alwa, niku i hlamulo muni a mu nyikileko wanuna loye?
  • Hikuyini Mosi a tsutsumileko hi le Gipite?
  • Xana i tsutsumele kwihi Mosi, niku i tivanile na mani kwaseyo?
  • Zini lezi Mosi a mahileko nzeni ka 40 wa malembe anzhako ka kuva a tsutsumile hi le Gipite?

Ziwutiso zo engetela

  • Gonza Eksodusi 2:11-25.

    Hambulezi a nga hi ni malembe ya zigonzo za wutlhari ga vaGipite, xana Mosi i kombisile kuyini a kutsumbeka kakwe ka Jehova ni ka va ka kabye? (Ekso. 2:11, 12; Maheb. 11:24)

  • Gonza Mitiro 7:22-29.

    Xigonzo muni hi xi kumako kuzameni ka Mosi ka ku tlhatlhisa vaIsraeli wukhumbini ga le Gipite hi wutsumbu gakwe? (Miti. 7:23-25; 1 Ped. 5:6, 10)