Hunza uya ka timhaka ta kona

Tlhela ka xaxameto wa tihloko ta mhaka

Timboni ta Jehovha

Select language ciTshwa

Tlhatlhambuto 25: A Ngango Wu Rura Wuya Gipite

Tlhatlhambuto 25: A Ngango Wu Rura Wuya Gipite

JOSEFA a nga ha zi kotangi ku ti khoma. Yena i lo byela malanza yakwe wontlhe a ku huma lomu ndlwini. Laha a nga hi yece ni vanakulobye, Josefa i lo sangula ku rila. Ha zi kota ku alakanyela lezi vanakulobye va nga hlamalisa zona, hakuva va wa nga zi tivi lezi a nga rilela zona. Hi kugumesa yena aku ngalo: ‘Hi mina Josefa. Wa ha hanya dadani wa mina?’

A vanakulobye va lo hlamala nguvu laha ko kala va nga zi koti ni ku wulawula. Vona va lo chava. Kanilezi Josefa aku ngalo: ‘Tshinelani ka mina.’ Laha va nga maha lezo, yena aku ngalo: ‘Hi mina Josefa, nakuloni, loyi mu nga mu xavisela Gipite.’

Josefa i lo simama ku wulawula hi ndlela yi nene: ‘Mu nga tizwi nanzu hi lezi mu nga nzi xavisela seno. Hi Nungungulu hakunene a nga nzi rumela Gipite kasi ku ponisa wutomi ga vanhu. Faro i nzi mahile mufumeli wa tiko gontlhe. Makunu hatlisani mu tlhela ka dadani wa mina mu ya mu byela lezo. Kambe mu byeleni lezaku i wate a ta hanya seno.’

Anzhako ka lezo Josefa i lo tlhateka mawoko hehla ka vanakulobye vontlhe, a va angarela ni ku va pswopswa. Laha Faro a ngazwa lezaku ku tile vanakulobye va Josefa, i te ngalo ka Josefa: ‘Va wa teke tikareta va ya teka raru wabye ni mingango yabye va wuya seno. Nzi ta va nyika tiko ga gi nene nguvu ga lomu Gipite.’

Hi zona va nga maha. Wa zi kota ku wona Josefa laha a kumanako ni raru wakwe loku yena a chikele Gipite ni ngango wakwe wontlhe.

A ngango wa Jakobe wu wa kulile nguvu. Vontlhe va wa hi 70 laha va nga rura vaya Gipite, kusukela Jakobe, vana vakwe kala ka vazukulu. Kanilezi ku wa hi ni vasati vabye kambe, kuzilava ni malanza yo tala. Vontlhe va lo ya tshama Gipite. Va lo vitwa a ku hi va ka Israeli, hakuva Nungungulu i wa hunzulusile vito ga Jakobe a ku hi Israeli. A va ka Israeli va lo maha vanhu vo hlawuleka nguvu ka Nungungulu, kota lezi hi to zi wona le mahlweni.

Genesisi 45:1-28; 46:1-27.

Josefa ni ngango wakwe


Ziwutiso

  • Zini zi humelelako a xikhati lexi Josefa a byelako vanakulobye a ku hi yena mani?
  • Zini lezi Josefa a tlhamuselako vanakulobye hi wunene?
  • Zini lezi Faro a wulako a xikhati lexi a zwako mahungu xungetano hi vamakabye va Josefa?
  • Xana wu wa kulisile kuyini a ngango wa Jakobe a xikhati lexi a nga rura aya Gipite?
  • Xana a ngango wa Jakobe wu zile wu vitaniswa kuyini, niku hikuyini?

Ziwutiso zo engetela

  • Gonza Genesisi 45:1-28.

    Xana a tlhatlhambuto wa Biblia xungetano hi Josefa wu kombisa kuyini a ku Jehova wa zi kota ku hunzulusa lezi zi kongomako ku maha kubiha malanza yakwe zi maha magumo ma nene? (Gen. 45:5-8; Isa. 8:10; Fil. 1:12-14)

  • Gonza Genesisi 46:1-27.

    Kutiyisa muni loku Jehova a nyikileko Jakobe ndleleni yakwe ya kuya Gipite? (Gen. 46:1-4)