Hunza uya ka timhaka ta kona

Tlhela ka xaxameto wa tihloko ta mhaka

Timboni ta Jehovha

Select language ciTshwa

Tlhatlhambuto 24: Josefa A Ringa Vanakulobye

Tlhatlhambuto 24: Josefa A Ringa Vanakulobye

JOSEFA i wa lava ku tiva lezaku tinhonzwa takwe ta 10 ti wa ha bihile kutani ahihi. Hizalezo yena aku ngalo ka tona: ‘Nwina mu tihloli. Mu tele ku ta wona matshamu ma nga tiyangiko ya tiko.’

Vona vaku ngalo: ‘Ahihi, hina a hi tihloli. Hi vanhu vo tsumbeka. Hontlhe hi va ka makabye. Hi wa hi 12. Kanilezi munwe a nga ha hi kona, ni loyi wa nzisana i le kaya ni raru wa hina.’

Josefa i lo ti maha ku khwatsi a nga kholwi. Yena i lo valela nakulobye a vitwako Simeoni lomu paxweni, a tsika vanwani va teka zakuga va tlhela kaya. Kanilezi i te ngalo kabye: ‘Loku mu wuya, mu fanele ku neha nzisana ya nwina.’

Loku vona va tlhelile kaya le Kanani, va lo ya hlawutela raru wabye Jakobe zontlhe lezi zi nga humelela. Jakobe i lo bayiseka nguvu. Aku ngalo: ‘Josefa a nga ha hi kona, lezi kambe Simeoni a nga kona. Nzi nga ta mu tsika mu teka xigumanzeni xa mina, Benjamini.’ Kanilezi laha a zakuga zi nga sangula ku mbhela, Jakobe i wa nga hi na yinwani ndlela ahandle ka ku va tsika va teka Benjamini vaya Gipite kasi ku ya kuma zinwani zakuga.

Makunu Josefa i lo wona vanakulobye na vata. Yena i lo tsaka nguvu hi ku wona nzisana yakwe Benjamini. Hi zinene, ni munwe wabye i wa nga zi tivi a ku munhu loyi wa hombe hi Josefa. Hizalezo Josefa i lo maha zo kari kasi ku ringa vanakulobye va 10.

A malanza yakwe ma lo tata tisakwa tabye hi zakuga. Na vona va nga zi tivi, ku lo cheliwa a gombe ga siliva go hlawuleka ga Josefa lomu sakweni ya Benjamini. Anzhako ka ku vontlhe va sukile va famba pfhukanyana, Josefa i lo rumela malanza yakwe a ku va lanza. Laha ma nga va kuma, a malanza ma te ngalo: ‘Mu yivele yini a gombe ga siliva ga hosi ya hina?’

A va ka makabye vaku ngalo: ‘A hi yivangi gombe gakwe. Loku mu gi kuma ka munwe wa hina, yaloye a dawe.’

Hikwalaho a malanza ma lo kamba lomu tisakweni tontlhe, ma kuma a gombe lomu sakweni ya Benjamini, kota lezi u zi wonako laha. A malanza maku ngalo: ‘Nwina vanwani ma zi kota ku famba, kanilezi Benjamini i fanele ku tlhela na hina.’ Va wa ta maha yini a va ka makabye va 10 makunu?

Vontlhe va lo tlhela na Benjamini mutini wa Josefa. Josefa a ya ku ngalo ka vanakulobye: ‘Nwina nwentlhe ma zi kota kuya kaya, kanilezi Benjamini i fanele ku sala laha kota khumbi ya mina.’

Hizalezo Juda i lo wulawula, aku ngalo: ‘Loku nzi tlhela kaya nzi nga hi na mufana loyi, raru wa mina i tafa hakuva wa mu ranza nguvu. Hikwalaho maha wuxinji, a ku sale mina laha kota khumbi ya wena, kanilezi tsika mufana loyi a tlhela kaya.’

Josefa i lo wona lezaku vanakulobye va wa hunzulukile. Vona va wa nga ha bihangi. Hizalezo a hi tiveni lezi Josefa a nga maha.

Genesisi 42:9-38; 43:1-34; 44:1-34.

Vamakabye va Josefa na va lumbetiwa


Ziwutiso

  • Hikuyini Josefa a lumbetako vanakulobye akuva tihloli?
  • Hikuyini Jakobe a vumelako lezaku a xigumanzeni xakwe, Benjamini, aya Gipite?
  • Gi nghenisile kuyini a gombe ga siliva ga Josefa lomu sakweni ya Benjamini?
  • Zini lezi Juda a ti nyiketelako ku maha kasi ku kuma a kutlhatlhiswa ka Benjamini?
  • Xana a vamakabye va Josefa va hunzulukile kala ka xiyimo muni?

Ziwutiso zo engetela

  • Gonza Genesisi 42:9-38.

    Xana a magezu ya Josefa ka Genesisi 42:18 xialakanyiso xa xi nene ka lava va nga ni wutihlamuleli hlengeletanweni ya Jehova inyamutlha hi ndlela muni? (Neh. 5:15; 2 Kor. 7:1, 2)

  • Gonza Genesisi 43:1-34.

    Hambulezi Rubeni a nga hi matewula, zi wonekisa kuyini a ku Juda i lo maha muwulawuli wa vanakulobye? (Gen. 43:3, 8, 9; 44:14, 18; 1 Kro. 5:2)

    Kota lezi zi nga te dlunya xana Josefa i ringisile kuyini vanakulobye, niku hikuyini? (Gen. 43:33, 34)

  • Gonza Genesisi 44:1-34.

    Kota xipanze xa pulani ya ku fihlela vanakulobye a ku hi yena mani, xana Josefa i ti kombisile kota yini? (Gen. 44:5, 15; Levi 19:26)

    Xana a vamakabye va Josefa va kombisile kuyini a ku a moya wa xiluse lowu va nga hi nawo kale hi nakulobye wu wa mbhelile makunu? (Gen. 44:13, 33, 34)