Hunza uya ka timhaka ta kona

Tlhela ka xaxameto wa tihloko ta mhaka

Timboni ta Jehovha

Select language ciTshwa

Tlhatlhambuto 22: Josefa A Ngheniswa Paxweni

Tlhatlhambuto 22: Josefa A Ngheniswa Paxweni

JOSEFA i wa hi ni 17 wa malembe ntsena laha a nga yiswa Gipite. Kwaseyo i lo xaviswa ka wanuna a vitwako Potifare. Potifare i wa tirela hosi ya Gipite, yi vitwako Faro.

Josefa lomu paxweni

Josefa i wa tirela nguvu a nwinyi wakwe, Potifare. Laha Josefa a nga kulile, Potifare i lo mu veka kota muhlayisi wa muti wakwe wontlhe. Kanilezi hikuyini Josefa a nga ngheniswa paxweni? Lezo zi mahekile hi kota ya sati wa Potifare.

Josefa i lo kula a maha wanuna wo saseka nguvu, hizalezo a sati wa Potifare i lo navela ku etlela naye. Kanilezi Josefa i wa zi tiva a ku lezo zi wa bihile, hikwalaho i lo ala ku maha lezo. A sati wa Potifare i lo zangara nguvu. Hizalezo, loku nuna wakwe a wuyile kaya i lo mu hembela aku ngalo: ‘Josefa gayani wo biha i lo zama ku etlela na mina!’ Potifare i lo ingisa sati wakwe, hizalezo a zangarela nguvu Josefa. Hikwalaho i lo mu hoxa paxweni.

Hi xikhatanyana a wanuna a nga wonelela paxo i lo wona lezaku Josefa munhu wa mu nene. Hizalezo i lo mu yimisa hehla ka tontlhe tinwani tiperesu. Anzhako ka xikhati Faro i lo zangarela mucheleteli wakwe wa zakunwa ni mubhaki wakwe wa tipawu, a va nghenisa paxweni. Hi wusiku go kari munwe ni munwani i lova ni noro wo hlamalisa, kanilezi va wa nga wu tivi a tlhamuselo wa miloro yabye. Loku gi cile Josefa i te ngalo: ‘Nzi byeleni miloro ya nwina.’ Kasike loku va mahile lezo, Josefa, hi ku vuniwa hi Nungungulu, i lo va tlhamusela miloro yabye.

A ka mucheleteli wa zakunwa Josefa i te ngalo: ‘Anzhako ka masiku manharu u ta humesiwa paxweni, u tlhela u maha mucheleteli wa Faro wa zakunwa.’ Hizalezo Josefa i lo engeta: ‘Loku u huma, bhulela Faro ha mina, u nzi vunawu ku huma hi ka legi wutshamu.’ Kanilezi a ka mubhaki wa tipawu, Josefa i te ngalo: ‘Anzhako ka masiku manharu Faro i ta tsema hloko ya wena.’

Anzhako ka masiku manharu ku lo maheka kota lezi Josefa a nga wulile. Faro i lo tsema a hloko ya mubhaki wa tipawu. Ni mucheleteli wa zakunwa i lo humesiwa paxweni a tlhela a sangula ku nyika zakunwa a hosi. Kanilezi a mucheleteli wa zakunwa i lo rivala ha Josefa! Yena a nga byelangi Faro ha Josefa, hizalezo Josefa i lo simama lomu paxweni.

Genesisi 39:1-23; 40:1-23.



Ziwutiso

  • I na ni tanga muni Josefa a xikhati lexi a yiswako Gipite, niku zini zi mahekako laha a chikelako kwaseyo?
  • Xana Josefa iza a nghenisa kuyini paxweni?
  • Wutihlamuleli muni a nyikwako Josefa lomu paxweni?
  • Lomu paxweni, zini lezi Josefa a mahelako mucheleteli wa zakunwa ni mubhaki wa tipawu va Faro?
  • Zini zi mahekako anzhako ka kuhumeswa ka mucheleteli wa zakunwa hi lomu paxweni?

Ziwutiso zo engetela

  • Gonza Genesisi 39:1-23.

    Kota lezi ku nga hi hava a nayo wa Nungungulu wu tsalilweko wu nga kari wu kona a wubhayi masikwini ya Josefa, zini zi nga mu susumeta a ku tsutsuma a sati wa Potifare? (Gen. 2:24; 20:3; 39:9)

  • Gonza Genesisi 40:1-23.

    Hi kukomisa, hlawutela a noro wa mucheleteli wa zakunwa zinwe ni tlhamuselo lowu Jehova a nyikileko Josefa. (Gen. 40:9-13)

    I noro muni wu ngave ni mubhaki wa tipawu, niku wu wa wula yini? (Gen. 40:16-19)

    Xana a ntlawa wa nanza gi tsumbekileko ni go tlhariha gi pimanyisisa kuyini a matshamela ya Josefa inyamutlha? (Gen. 40:8; Tis. 36:9; Joh. 17:17; Miti. 17:2, 3)

    Xana Genesisi 40:20 gi nyikisa kuyini a kuwonekela xungetano hi mawonela ya wuKristu maringano ni kuhlayisa a masiku ya kubelekwa? (Mutsh. 7:1; Mar. 6:21-28)