Hunza uya ka timhaka ta kona

Tlhela ka xaxameto wa tihloko ta mhaka

Timboni ta Jehovha

Select language ciTshwa

Tlhatlhambuto 16: Isaka A Kuma Sati Wa Mu Nene

Tlhatlhambuto 16: Isaka A Kuma Sati Wa Mu Nene

WA MU tiva wasati loyi laha ka mufananiso lowu? A vito gakwe hi Rebeka. A wanuna loyi a mu khingako hi Isaka. Rebeka i ta maha sati wa Isaka. Zi mahekisile kuyini lezo?

Ina, Abrahama, raru wa Isaka, i wa lava ku tekela n’wana wakwe a sati wa mu nene. Yena i wa nga lavi lezaku Isaka a teka munwe wa vavasati va Kanani, hakuva vanhu lavo va wa khozela vanungungulu va mawunwa. Hizalezo, Abrahama i lo vitana nanza gakwe aku ngalo: ‘Nzi lava lezaku u tlhela lomu ku hanyako kona maxaka ya mina, le Harani, u ya tekela n’wana wa mina Isaka a sati.’

A nanza ga Abrahama gi lo tekela ku suka gi teka khume ga makameli gi maha pfhumba lego ga hombe. Loku gi chikele kusuhani ni wutshamu legi ku nga hanya maxaka ya Abrahama, gi lo nyima laha hlobyeni. Ku wa hi xikhati xa gambo, laha a vavasati va doropa va humako kasi ku takha mati hlobyeni. Hizalezo, a nanza ga Abrahama gi lo khongela ka Jehova: ‘Ngha na wasati loyi a ta nga nzi nyika mati a tlhela a nwisa makameli ave yena loyi u mu hlawuleko kasi kuva sati wa Isaka.’

Rebeka na a kumana na Isaka

Hi xalexo xikhati Rebeka i lo relela kasi ku takha mati. Laha a nanza gi nga kombela kunwa, i lo gi nyika. Yena kambe i lo tlhela akha mati yo enela kasi ku nyika makameli ma nga hi ni tora. Lowo wu wa hi ntiro wo binza hakuva a makameli manwa mati yo tala nguvu.

Loku Rebeka a mbhetile ku maha lezo, a nanza ga Abrahama gi lo mu wutisa a vito ga raru wakwe. Kambe a nanza gi lo mu wutisa a ku xana zi wa koteka a ku gi etlela kaya kabye ke. Rebeka aku ngalo: ‘Raru wa mina hi Betueli, kambe gi kona wutshamu ga ku hi nga ku amukela.’ A nanza ga Abrahama gi lo tiva a ku Betueli i wa hi n’wana wa Nahori, nakulobye wa Abrahama. Hizalezo, yena i lo khizama a bonga Jehova hi ku mu yisa ka maxaka ya Abrahama.

Gona wusiku galego a nanza ga Abrahama gi lo byela Betueli na Labani, makabye wa Rebeka, a xigelo xa ku va enzela. Vona va lo vumela a ku Rebeka a famba ni nanza lego kasi a maha sati wa Isaka. Zini a nga wula Rebeka loku a wutisilwe? Yena i te ngalo, ‘Ina,’ hakuva i wa zi lava ku famba. Hi manziko wa kona vona va lo khilela makameli va sangula pfhumba ga hombe go tlhela Kanani.

Vona va chikele laha gambyeni. Rebeka i lo wona wanuna na a kari a fambafamba masinwini. Ku wa hi Isaka. Isaka i lo tsaka hi ku wona Rebeka. Ku wa hunzile malembe manharu na Sara, mamani wa Isaka, a file, kambe Isaka i wa ha xaniseka hi lezo. Makunu Isaka i lo ranza nguvu Rebeka, a tlhela ave ni kutsaka kambe.

Genesisi 24:1-67.



Ziwutiso

  • Himani a wanuna loyi ni wasati loyi va nga mufananisweni?
  • Zini a nga maha Abrahama kasi ku tekela n’wana wakwe a sati, niku hikuyini?
  • Wu hlamulisilwe kuyini a mukhongelo wa nanza ga Abrahama?
  • Zini lezi Rebeka a nga hlamula a xikhati lexi a wutisilweko ku ngalo i wa zi lava ku tekana na Isaka ke?
  • Zini lezi zi nga maha Isaka a tlhela ave ni kutsaka kambe?

Ziwutiso zo engetela

  • Gonza Genesisi 24:1-67.

    Matshamela muni ya ma nene lawa Rebeka a ma kombisileko a xikhati lexi a nga tlhangana ni nanza ga Abrahama le hlobyeni? (Gen. 24:17-20; Mav. 31:17, 31)

    Lezi Abrahama a lulamiseleko Isaka zi nyika xikombiso muni xa xi nene ka maKristu inyamutlha? (Gen. 24:37, 38; 1 Kor. 7:39; 2 Kor. 6:14)

    Hikuyini hi faneleko ku kuma xikhati xa ku alakanyela, kota lezi Isaka a mahileko? (Gen. 24:63; Tis. 77:12; Fil. 4:8)