Hunza uya ka timhaka ta kona

Tlhela ka xaxameto wa tihloko ta mhaka

Timboni ta Jehovha

Select language ciTshwa

Tlhatlhambuto 14: Nungungulu A Ringa Kukholwa Ka Abrahama

Tlhatlhambuto 14: Nungungulu A Ringa Kukholwa Ka Abrahama

WA ZI wona lezi Abrahama a mahako laha? I na ni mukwana, kambe ko khwatsi i lava ku daya n’wana wakwe. I wa ta maha lezo hikuyini? Kusangula a hi woneni lezi Abrahama na Sara va nga kumisa zona n’wana.

Abrahama na a nyikela Isaka kota muphahlelo

Khumbula, Nungungulu i wa va tsumbisile lezaku va wa tava ni n’wana. Kanilezi, lezo zi wa ku khwatsi zi wa nga ta koteka, hakuva Abrahama na Sara va wa khosahele nguvu. Hambulezo, Abrahama i wa kholwa lezaku Nungungulu wa zi kota ku maha lezi zi ngo khwatsi a zi koteki. Kasike zini zi nga maheka?

Ku hunzile lembe na Nungungulu a mahile xitsumbiso xakwe. Kasi laha Abrahama a nga hi ni 100 wa malembe na Sara a hi ni 90 wa malembe, va lova ni n’wana wa mufana a vitwako Isaka. Nungungulu i wa hlayisile xitsumbiso xakwe!

Kanilezi, laha Isaka a nga kulile, Jehova i lo ringa kukholwa ka Abrahama. Yena i lo vitana: ‘Abrahama!’ Abrahama i lo hlamula: ‘Nzi laha!’ Anzhako Nungungulu aku ngalo: ‘Teka n’wana wa wena, n’wana wa wena wa munwe, Isaka, uya ka xitsunga lexi nzi ta nga ku komba. Kwaseyo u ta daya n’wana wa wena u mu nyikela kota muphahlelo.’

A timhaka leto ti wa karata nguvu Abrahama, hakuva Abrahama i wa ranza nguvu n’wana wakwe. Kambe khumbula, Nungungulu i wa tsumbisile lezaku a vana va Abrahama va wa ta hanya tikweni ga Kanani. Kasi zi wa ta mahekisa kuyini lezo na Isaka a file? Abrahama i wa nga zi pimi, kanilezi i lo simama a ingisa Nungungulu.

Loku a chikele xitsungeni, Abrahama i lo boha Isaka a mu tlhateka alatini a nga gi mahile. Anzhako i lo humesa mukwana kasi ku daya n’wana wakwe. Hi xalexo xikhati a ngelosi ya Nungungulu yi lo vitana: ‘Abrahama, Abrahama!’ Abrahama i lo hlamula: ‘Nzi laha!’

Nungungulu aku ngalo: ‘U nga tlhavi mufana hambu ku mu maha nchumu. Makunu nza zi tiva lezaku wa kholwa ka mina, hakuva a wu nzi alelangi n’wana wa wena, n’wana wa wena wa munwe.’

Hi nga wona kukholwa ka hombe loku Abrahama a nga hi nako ka Nungungulu! Yena i wa kholwa lezaku a ku na nchumu wu tsanzako Jehova, niku Jehova i wa ta vuxa Isaka hi ka vafileko. Nungungulu hakunene i wa nga lavi lezaku Abrahama a daya Isaka. Hizalezo Nungungulu i lo maha lezaku a hamba yo kari yi khwekela likwareni li nga hi kusuhani, a byela Abrahama a ku tlhava yona wutshanwini ga n’wana wakwe.

Genesisi 21:1-7; 22:1-18.



Ziwutiso

  • Xitsumbiso muni lexi Nungungulu a maheleko Abrahama, niku Nungungulu i hlayisisile kuyini a xitsumbiso xakwe?
  • Kota lezi zi kombiwako laha mufananisweni, xana Nungungulu i ringisile kuyini a kukholwa ka Abrahama?
  • Zini lezi a mahileko Abrahama, hambulezi ku ngaku i wa nga xi tivi a xigelo xa lezi Nungungulu a nga mu layile ku maha?
  • Zini zi mahekileko a xikhati lexi Abrahama a nga humesa mukwana kasi ku daya a n’wana wakwe?
  • Ku wa tiyisile kuyini a kukholwa ka Abrahama hi Nungungulu?
  • Xini lexi Nungungulu a nyikileko Abrahama lezaku a maha hi xona a munyikelo, niku i xi kumekisile kuyini Nungungulu a xinyikiwo lexo?

Ziwutiso zo engetela

  • Gonza Genesisi 21:1-7.

    Hikuyini Abrahama a enghenisileko wukwera a n’wana wakwe hi siku ga wuntlhanu ni manharu? (Gen. 17:10-12; 21:4)

  • Gonza Genesisi 22:1-18.

    Xana i kombisile kuyini Isaka a kutitsongahata mahlweni ka raru wakwe, Abrahama, niku lezo zi kombisile kuyini na ka ha hi mahlweni ku ngalo ku wa tava ni ximaho xa ha tako xi nga ni tlhamuselo wa hombe a ku hunza lowo? (Gen. 22:7-9; 1 Kor. 5:7; Fil. 2:8, 9)