Hunza uya ka timhaka ta kona

Tlhela ka xaxameto wa tihloko ta mhaka

Timboni ta Jehovha

Select language ciTshwa

Tlhatlhambuto 12: Vanhu Va Aka Likhokhola La Hombe

Tlhatlhambuto 12: Vanhu Va Aka Likhokhola La Hombe

KU HUNZILE malembe yo tala. A vana va Noa va lova ni vana vanyingi. Ni vana lavo va lo kula vave ni vana vo tala. Hi xikhatanyana ku lova ni vanhu vo tala misaveni.

Munwe wa vanhu lavo ku wa hi zukulu-xinguwo wa Noa a nga vitwa Nimrode. I wa hi munhu wo biha a nga hlota ni ku daya zihari ni vanhu. Kambe Nimrode i lo ti maha hosi kasi ku fumela vanwani vanhu. Nungungulu i wa nga mu ranzi.

Xikhatini lexo vontlhe vanhu va wa wulawula lirimi linwe. Nimrode i wa lava lezaku va aka wutshamu ginwe kasi a zi kota ku va fumela. Wa zi tiva lezi a nga maha? I lo byela vanhu lezaku va aka doropa ni likhokhola la hombe nzeni ka gona. Va wone laha ka mufananiso na va maha zitini.

Jehova Nungungulu a nga xalaliswangi hi kuaka loko. Nungungulu i wa lava lezaku a vanhu va hangalaka va aka misaveni yontlhe. Kanilezi a vanhu vaku ngalo: ‘Ngonani! A hi akeni doropa ni likhokhola lo leha nguvu, leli a xixungwe xa lona xi ta nga chikela tilweni. Hizalezo hi tava ni ndhuma!’ A vanhu va wa ti lavela wudzundzo, ahandle ka ku gi lavela Nungungulu.

Hizalezo, Nungungulu i lo va nyimisa ku aka likhokhola. Wa zi tiva a ku i zi mahisile kuyini? I lo maha lezaku hi xitshuketi a vanhu va sangula ku wulawula tirimi to hambana, wutshanwini ga linwe ntsena. Makunu a vaaki a va ha zwananangi. Hizalezo a doropa gabye gi lo vitwa a ku Babeli kutani Babuloni, zi wulako ku ngalo “Pfilupfilu.”

Makunu a vanhu va lo sangula ku hangalaka hi le Babeli. Mitlawa ya vanhu va nga wulawula lirimi linwe yi lo ya aka zinwe ka manwani matshamu ya misava.

Genesisi 10:1, 8-10; 11:1-9.

Vatiri va akako likhokhola la hombe


Ziwutiso

  • Ku wa hi mani Nimrode, niku xana i wa ti zwisa kuyini Nungungulu hi yena?
  • Xana va wa mahela yini zitini a vanhu lava va nga laha mufananisweni?
  • Hikuyini Jehova a nga kala ku xalala hi ntiro lowo wa kuaka?
  • Xana Nungungulu i nyimisisile kuyini a kuaka ka likhokhola?
  • Gi wa vitaniswa kuyini a doropa lego, niku gi wa wula yini a vito lego?
  • Zini zi nga maheka ka vanhu anzhako ka kuva Nungungulu a hakasile a tirimi tabye?

Ziwutiso zo engetela

  • Gonza Genesisi 10:1, 8-10.

    Matshamela muni lawa Nimrode a ma kombisileko, niku lezo zi hi nyika xitlharihiso muni? (Mav. 3:31)

  • Gonza Genesisi 11:1-9.

    Xivangelo muni xi mahileko vanhu va aka a likhokhola, niku hikuyini a ntiro lowo wu nga yimelwe hi kungahumeleli? (Gen. 11:4; Mav. 16:18; Joh. 5:44)