Hunza uya ka timhaka ta kona

Tlhela ka xaxameto wa tihloko ta mhaka

Timboni ta Jehovha

Select language ciTshwa

Tlhatlhambuto 3: Wanuna Ni Wasati Vo Sangula

Tlhatlhambuto 3: Wanuna Ni Wasati Vo Sangula

WU HAMBANA hi yini a mufananiso lowu? Ina, hi vanhu va nga ka wona. Hi vona a wanuna ni wasati vo sangula. Va mahilwe hi mani? Hi Nungungulu. Wa gi tiva vito gakwe? Hi Jehova. A wanuna ni wasati va lo vitwa a ku hi Adamu na Eva.

Adamu na Eva sinwini ga Edeni

Jehova Nungungulu i mahile Adamu hi ndlela leyi. Yena i lo teka a ntshuri wa misava a wumba hi wona a miri wo mbhelela, miri wa wanuna. Anzhako i lo pupuxela tinhovini ta wanuna, zonake Adamu i lo hanya.

Jehova Nungungulu i wa hi ni ntiro wa ku nyika Adamu. Yena i lo byela Adamu a ku chula mavito ka tixaka tontlhe ta zihari. Za koteka ku ngha Adamu a cuwukisele zihari hi xikhati xo leha kasi ku nyika a mavito ya ma nene ka zontlhe. Laha Adamu a nga kari a chula mavito ka zihari i lo sangula ku wona nchumu wo kari. Wa xi tiva a ku xini?

Zontlhe zihari zi wa hi ni vanghana. I wa hi kona dadani ndlovu na mamani ndlovu, i wa hi kona dadani nghala na mamani nghala. Kanilezi Adamu i wa nga hi na munghana. Hizalezo Jehova i lo maha Adamu a etlela wurongo ga hombe, a mu susa linwe la timbambu laha tlhelweni gakwe. Hi limbambu lelo, Jehova i lo maha wasati a nyika Adamu.

A hi kutsaka a nga hi nako Adamu makunu! Kambe alakanyela kutsaka ka Eva hi kuva a vekilwe sinwini lego go saseka kasi ku hanya kona! Makunu va wa zi kota kuva ni vana va tlhela va hanya vontlhe hi kutsaka.

Jehova i wa lava lezaku Adamu na Eva va hanya kala kupinzuka. I wa lava lezaku vona va maha lezaku a misava yontlhe yi saseka ku fana ni simu ga Edeni. Kutsaka muni Adamu na Eva va nga hi nako laha va nga alakanyela hi ku maha lezo! A wu ta tsakela ku hlengela ku maha lezaku a misava yiva simu go saseka? Kanilezi a kutsaka ka Adamu na Eva a ku simamangi. A hi tiveni lezaku hikuyini.

Tisimu 83:18; Genesisi 1:26-31; 2:7-25.



Ziwutiso

  • Wu hambanisile kuyini a mufananiso wa Tlhatlhambuto 3 ni lowu wa Tlhatlhambuto 2?
  • Himani a mahileko a wanuna wo sangula, niku gi wahi gihi a vito ga wanuna loye?
  • I ntiro muni lowu Nungungulu a wu nyikileko Adamu a ku wu maha?
  • Hikuyini Nungungulu a mahileko Adamu a etlela a wurongo ga hombe?
  • Xikhati muni lexi Adamu na Eva va nga wa ta zi kota ku hanya, niku i ntiro muni lowu Nungungulu a nga lava lezaku vona va wu maha?

Ziwutiso zo engetela

  • Gonza Tisimu 83:18.

    Hi gihi a vito ga Nungungulu, niku hi xihi a xikhundla lexi xi nga xa yena yece hehla ka misava? (Jer. 16:21; Dan. 4:17)

  • Gonza Genesisi 1:26-31.

    Xini xi ngave xa lisima nguvu kuvangeni ka Nungungulu ka siku ga wuntlhanu ni ginwe, niku ku wa hambanisile kuyini ni zihari a kuvanga loko? (Gen. 1:26)

    Malulamiselo muni lawa Jehova a ma maheleko vanhu ni zihari? (Gen. 1:30)

  • Gonza Genesisi 2:7-25.

    Zini zi nga kari zi patseka xiavelweni xa Adamu xa ku chula mavito ka zihari? (Gen. 2:19)

    Xana hi vuniwa hi ndlela muni hi Genesisi 2:24 a ku pima a mawonela ya Jehova xungetano hi kutekana, kuhambana, ni kutlhatlha wukati? (Mat. 19:4-6, 9)