Va Le Galatiya 6:1-18

  • Rwalelanani a mindzhwalo (1-10)

    • U tshovela leci u byalako (7, 8)

  • A wukwera a hi ga nchumu (11-16)

    • Civangwa ciswa (15)

  • Magezu yo gumesa (17, 18)

6  Vamakabye, loku a wokari a tshuka a hambuka, hambu loku yena n’winyi a nga se zvi wona, n’wina lava mu buvhileko hi ka moya, wuyisani a munhu loye ndleleni hi moya wa kurula. Kanilezvi a mun’we ni mun’wani wa n’wina i wa ti wonele kasi yenawu a nga ringiwi.  Rwalelanani a mindzhwalo ya n’wina. Loku mu maha lezvo mu ta tatisa a nayo wa Kristu.  Hakuva loku a wokari a alakanya lezvaku wa nchumu kuveni a hi wa nchumu, wa ti kalavela.  Kanilezvi a mun’we ni mun’wani i wa hlole mitiro yakwe, hi kona a to kuma cigelo ca ku ti dzundza hi zva yena n’winyi, na a nga ti fananisi ni mun’wani munhu.  Hakuva a mun’we ni mun’wani i ta rwala a ndzhwalo wakwe yena n’winyi.  Loyi a gondzisiwako a mhaka i wa mu avele a zvilo zvontlhe zvo saseka loyi a mu gondzisako.  Mu nga ti kanganyisi: Nungungulu a nga kalavelwi. Hakuva leci a munhu a ci byalako, i ta tshovela caleco;  hakuva loyi a byalelako nyama, hi ka nyama i ta tshovela kubola, kanilezvi loyi a byalelako moya, hi ka moya i ta tshovela wutomi ga pindzukelwa.  Hikwalaho, hi nga karali a ku maha zva zvi nene, hakuva loku hi nga rereki,* hi ta tshovela hi cikhati ca kona. 10  Makunu kota lezvi hi nga ni cikhati, a hi maheni zva zvi nene ka vanhu vontlhe, kanilezvi nguvhunguvhu ka va laha ngangweni wa kukholwa. 11  Hi nga wonani lezvi ma nga kulisa zvona a maletela ya papilo legi ndzi nga mu tsalela hi mandla ya mina! 12  Vontlhe lava va lavako ku ti maha va va nene ka van’wani, va mu kurumeta ku maha wukwera.* Va maha lezvo hi ku chava ku xanisiwa hi kota ya mhandze ya hlomulo* ya Kristu. 13  Hakuva hambu lava va mahilweko wukwera* a va hlayisi Nayo, kanilezvi va lava lezvaku mu mahiwa wukwera kasi va kuma ca ku ti dzundza hi cona nyameni ya n’wina. 14  Kanilezvi mina ndzi nga ta tshuka ndzi ti dzundza hi lezvo, ndzi ta ti dzundza basi hi mhandze ya hlomulo* ya Hosi Jesu Kristu. Ka mina, a tiko gi file* hi kota ya yena, na minawu ndzi file ka tiko hi kota ya yena. 15  Hakuva a ku mahiwa wukwera* kutani ku nga mahiwi wukwera a hi zva nchumu, a ca hombe kuva civangwa ciswa. 16  A kurula ni wuxinji a zvive ka vontlhe lava va fambako hi nayo lowu, ina, a zvive ka Izrayeli wa Nungungulu. 17  Kusukela lezvi, a ndza ha lavi munhu wa ku ndzi karata, hakuva mirini wa mina ndzi na ni zvifungo* zvi kombako lezvaku ndzi nandza ga Jesu. 18  A tipswalo ta Hosi ya hina Jesu Kristu a tive ni moya lowu n’wina vamakabye mu wu kombisako. Amen.

Mitlhamuselo ya lahasi

Kutani: “tsukuli”.
Kutani: “kina ngoma; sirkusizawu; tlula ngoma”.
Wona Tlhamuselo wa magezu ya Bhibhiliya.
Kutani: “kinisilweko ngoma; sirkusizawu; tlulisilweko ngoma”.
Wona Tlhamuselo wa magezu ya Bhibhiliya.
Kutani: “gi delwe mhandzeni”.
Kutani: “kinisiwa ngoma; sirkusizawu; tlulisiwa ngoma”.
Kutani: “timarka”.