Mitiro 9:1-43

  • Sawule ndleleni ya kuya Dhamasku (1-9)

  • Ananiyasi a rumelwa ku ya vhuna Sawule (10-19a)

  • Sawule a chumayela ha Jesu le Dhamasku (19b-25)

  • Sawule a endza aya Jerusalema (26-31)

  • Pedro a hanyisa Eneyasi (32-35)

  • Dhorkasi, a wasati wo hana, a vhuxiwa hi ka vafileko (36-43)

9  Kanilezvi Sawule, na a ha kukutela* hi zanga kasi ku dzukisa ni ku daya a vapizani va Hosi, i noya ka mupristi wa hombe  a ya mu kombela mapapilo ya kuya hi wona masinagogeni ya le Dhamasku, lezvaku a ya khoma vontlhe lava va lumbako A Ndlela,* a vavanuna ni vavasati, a famba navo Jerusalema na va bohilwe.  Laha a nga kari a famba, na a tshinela Dhamasku, hi citshuketi ku no woneka a kuhatima hi le tilweni ku woninga hehla kakwe.  I nowa lahasi, azwa gezu giku kakwe: “Sawule, Sawule, u ndzi xanisela yini?”  I no wutisa aku: “Hi wena mani bava?” Aku: “Hi mina Jesu loyi u mu xanisako.  Kanilezvi suka u nghena dhoropeni, u ta ya byeliwa lezvi u faneleko ku maha.”  A vavanuna lava va nga famba naye va no nyima va vhumala ni co wula; a gezu va gi zwile kanilezvi a va wonangi munhu.  Sawule i no suka a yima. Hambu lezvi a nga vhululile matihlo i wa nga zvi koti ku wona nchumu. Hikwalaho, va no mu khometela hi woko va nghena naye Dhamasku.  I no tshama masiku manharu na a nga zvi koti ku wona, na a ngagi, ne kunwa. 10  Le Dhamasku ku wa hi ni mupizani a nga vitaniwa ku hi Ananiyasi. A Hosi yi no mu vitana lomu muwonisweni yiku: “Ananiyasi!” Yena aku: “Hi mina loyi, Hosi.” 11  A Hosi yiku kakwe: “Suka uya ruweni gi vitaniwako ku Go Lulama, u ya lava wanuna a vitaniwako ku hi Sawule wa le Tarsusi, mutini wa Judhasi, hakuva ka cikhati leci o khongela, 12  niku lomu muwonisweni i wonile wanuna a vitaniwako ku hi Ananiyasi, na ata kakwe a ta mu tlhateka mandla kasi a tlheliselwa kuwona.” 13  Kanilezvi Ananiyasi i no hlamula, aku: “Hosi, ndzi zwile votala na va wulawula hi wanuna loyi, xungetano hi kubiha kontlhe loku a ku maheleko vobasa va wena le Jerusalema. 14  Ni kwalaha i nyikilwe ntamu hi vapristi lava va tihosana kasi ku khoma* vontlhe lava va khongelako vitweni ga wena.” 15  Kanilezvi a Hosi yi te ngalo kakwe: “Famba, hakuva ka mina, a wanuna loyi cibya ci hlawulilweko kasi ku yisa vito ga mina ka vamatiko, ni ka tihosi, ni ka vana va ka Izrayeli. 16  Hakuva ndzi ta mu komba khwatsi a tixanisa to tala leti a to kumana nato hi kota ya vito ga mina.” 17  Hikwalaho, Ananiyasi i no ya nghena mutini, a mu tlhateka mandla, aku kakwe: “Sawule makabye, Hosi Jesu loyi a wonekileko ka wena ruweni legi u ngata hi gona, i ndzi rumile kasi u tlheliselwa kuwona, u tlhela u tala hi moya wo basa.” 18  Zvalezvo ku nowa zvilo zvo khwatsi magwaru hi matihlweni yakwe, a se tlhela a wona. I no suka a bhabhatiswa, 19  aga zvakuga, a kuma ntamu. I no tshama masiku yo kari ni vapizani le Dhamasku, 20  a tekela ku sangula ku chumayela hi Jesu lomu masinagogeni, lezvaku i N’wana wa Nungungulu. 21  Kanilezvi vontlhe lava va nga muzwa va no hlamala vaku: “A hi yena a wanuna loyi a nga hlasela lava va nga hi le Jerusalema, va nga khongela vitweni legi ke? A nga nota laha kasi ku ta va khoma a famba navo* ka vapristi lava va tihosana ke?” 22  Kanilezvi Sawule i no simama ku endzeleka hi ntamu, ni vaJudha lava va nga hanya Dhamasku va no vhumala ni co wula hi lezvi a nga va komba zviku dlunya lezvaku Jesu hi Kristu. 23  Laha ku nga hundzile masiku yo tala, a vaJudha va no xuxa cikungo kasi ku mu daya. 24  Hambulezvo, Sawule i no zvi tiva lezvaku va mu xuxele cikungo. Va wa tlhela va lavelela kambe a tinyangwa, mumu ni wusiku, kasi va mu daya. 25  Hikwalaho a vapizani vakwe va no mu teka ni wusiku va mu relelisa hi cindzala* hi laha janeleni ga khurisi. 26  A cikhati leci a nga chikela Jerusalema, i no lava ku ti patsa ni vapizani, kanilezvi vontlhe va no mu chava hakuva va wa nga kholwi lezvaku mupizani. 27  Hikwalaho Bharnabhasi i no ta mu vhuna, a famba naye ka vapostoli a ya va hlawutela zviku dlunya lezvi Sawule a nga yi wonisa zvona Hosi laha ruweni, ni lezvi a Hosi yi nga wulawulisa zvona naye, ni lezvi Sawule a nga wulawulisa zvona hi kutiya hi vito ga Jesu le Dhamasku. 28  Hikwalaho i no tshama navo, a fambafamba hi kutlhatlheka* le Jerusalema na a wulawula hi kutiya vitweni ga Hosi. 29  I wa wulawula ni ku kanetisana ni vaJudha va wulawulako ciGreki, kanilezvi vona va no hlota tindlela ta ku mu daya. 30  Laha a vamakabye va nga tiva mhaka leyi, va no relela naye kala Khezariya va gumesa va mu rumela Tarsusi. 31  A bandla tikweni gontlhe ga Judhiya, ni Galileya, ni Samariya gi nova ni kurula, gi tiyiswa; niku kota lezvi gi nga chava Jehovha na gi tangaliswa hi moya wo basa, gi no simama ku andza. 32  Laha Pedro a nga fambafamba matlhelweni wontlhe, i no relela kala a chikela ni ka vobasa lava va nga hanya Lidha. 33  I no ya kuma wanuna a nga vitaniwa ku hi Eneyasi, loyi a nga tshama na a etlele mubhedhini wakwe a 8 wa malembe, hakuva i wa nga zvi koti ku famba. 34  Pedro aku ngalo kakwe: “Eneyasi, Jesu Kristu wa ku hanyisa. Suka u longisela a mubhedhi wa wena.” Zvalezvo i no sekeleka. 35  Laha vontlhe lava va nga hanya le Lidha ni le Xaroni va nga mu wona, va no kholwa ka Hosi. 36  Le Jopa ku wa hi ni mupizani a nga vitaniwa ku hi Tabhita, zvi wulako ku “Dhorkasi.”* I wa maha mitiro yo tala ya yi nene ni ku vhuna zvisiwana. 37  Kanilezvi masikwini lawo, i no babya, afa. Hikwalaho va no mu hlambisa va ya mu lata kwarutwini ya le hehla. 38  Kota lezvi Lidha ku nga gamekene ni Jopa, a cikhati leci a vapizani va ngazwa lezvaku Pedro i wa hi dhoropeni lego, va no ruma vavanuna vambiri va ya mu kombela vaku: “Hatlisa uta seno ka hina.” 39  Zvalezvo Pedro i no suka a famba navo. Laha a nga chikela, va no kandziha naye vaya kwarutwini ya le hehla; a vavasati vontlhe vo felwa hi vanuna va nota kakwe na va rila, va ta mu komba a tinguwo ni mabhaji lawa Dhorkasi a nga rungile na a ha hanya. 40  Pedro i no humesa vontlhe lahandle, a khizama a khongela. I no hundzuluka a cuwuka cirumbi, aku: “Tabhita, vhuka!” Laha a nga vhulula matihlo a wona Pedro, i no vhuka a tshama. 41  Pedro i no mu khoma hi woko a mu yimisa, a guma a vitana vobasa ni vavasati lava vo felwa hi vanuna a ta mu nyikela kabye na a hanya. 42  A mhaka leyi yi no hangalaka tikweni gontlhe ga Jopa, ni votala va no kholwa ka Hosi. 43  Pedro i no tshama masiku yo tala le Jopa zvin’we ni mufuki wa mabhebhe a vitaniwako ku hi Simoni.

Mitlhamuselo ya lahasi

Kutani: “fukufela; thukuthela”.
A Ndlela leyi, ku wuliwa a mahanyela ni tigondzo ta wuKristu.
Hi kukongoma: “boha; boha hi machini”.
Hi kukongoma: “a famba navo na va bohilwe”.
Kutani: “cirundzu”.
Hi kukongoma: “a nghena ni ku huma”.
A vito ga ciGreki ga ku Dhorkasi ni ga ciAramaiko ga ku Tabhita, wontlhe ma wula ku “Mhuti”.