Matewu 3:1-17

  • Johani Mubhabhatisi a chumayela (1-12)

  • Jesu a bhabhatiswa (13-17)

3  Andzhako ka cikhati, Johani Mubhabhatisi, i no ta chumayela ciwuleni ca Judhiya,  aku: “Ti soleni hakuva a Mufumo wa matilo wu tshinele.”  Kunene, loyi hi yena a nga wuliwa hi muphrofeti Isaya a cikhati leci a ngaku: “Ku zwala gezu ga loyi a huwelelako ciwuleni, aku: ‘Longiselani ndlela ya Jehovha! Lulametani maruwa yakwe.’”  Johani i wa boha tinguwo ta woya ga kameli ni libhandi la cikhumba ciwunwini cakwe. I waga humbi* ni wulombe ga khwati.  A vanhu va Jerusalema ni Judhiya gontlhe ni va matlhelo wontlhe ya Jordhani va waya kakwe,  va ya wulela zviwonho zvabye, a va bhabhatisa* Congweni wa Jordhani.  A cikhati leci a nga wona a vaFarisi ni vaSadhusi* vo tala na vata lezvaku va ta bhabhatiswa, i te ngalo kabye: “N’wina vana va tinyoka, mu byelilwe hi mani lezvaku mu nga tsutsuma a zanga yi tako?  Pswalani mihandzu yi kombako ku ma ti sola.  Mu nga ti byeli muku: ‘Hina hi vana va Abrahama.’ Hakuva ndza mu byela lezvaku Nungungulu wa zvi kota ku mu humesela vana Abrahama hi ka maribye lawa. 10  A bhewula* gi longile ku tsema tisinya hi le mitswini. Hikwalaho, a tisinya tontlhe ti nga pswaliko mihandzu ya yi nene ti ta tsemiwa ti hoxiwa ndzilweni. 11  Mina ndzi mu bhabhatisa hi mati hi kota ya kutisola ka n’wina, kanilezvi loyi a tako ndzhako ka mina i na ni ntamu wa ku hundza mina, ne a ndzi ringanelwi hi ku tlhatlha zvilato* zvakwe. Yena i ta mu bhabhatisa hi moya wo basa ni ndzilo. 12  I khomile foxola go hehera hi gona, niku i ta swiyela wutshamu gakwe go hulela kona gi basa khwatsi, a hlengeletela trigo yakwe tshaleni, kanilezvi, a mungu* i ta wu hisa hi ndzilo wu nga timekiko.” 13  Andzhako ka lezvo, Jesu i nota ka Johani na a sukela Galileya kasi ku ta bhabhatiswa hi yena Congweni wa Jordhani. 14  Kanilezvi Johani i no zama ku ala, aku: “Hi mina ndzi faneleko ku bhabhatiswa hi wena, hikuyini wena u tako ka mina ke?” 15  Jesu i no mu hlamula, aku: “U nga ali, hakuva hi ku maha lezvo hi tatisa kontlhe kululama.” Johani i no vhumela. 16  Zvalezvi Jesu a nga bhabhatiswa i no huma hi lomu matini, a tilo gi vhululeka, a wona a moya wa Nungungulu na wu relela kakwe na wu ku khwatsi i tuva. 17  Ku no zwala gezu kambe na gita hi le tilweni, giku: “Loyi i N’wana wa mina ndzi mu randzako, loyi ndzi xalalako hi yena.”

Mitlhamuselo ya lahasi

Zviharana zvo fana ni bhandzala.
Kutani: “nyupeta”.
A vaFarisi ni vaSadhusi yi wa hi mintlawa yimbiri yo tiveka nguvhu ya varangeli va wukhongeli masikwini ya Jesu. Wona Tlhamuselo wa magezu ya Bhibhiliya.
Kutani: “chapo”.
Hi kukongoma: “masandalya”.
A mungu hi lezvi zvi humako a cikhati leci va tsutsutako timbewu.