Kuvhululelwa 4:1-11

  • Johani a wona muwoniso wa Jehovha le tilweni (1-11)

    • Jehovha i tshamile citshan’wini cakwe ca wuhosi (2)

    • 24 wa madhota ma nga zvitshan’wini zva wuhosi (4)

    • Mune wa zvivangwa zvi hanyako (6)

4  Andzhako ka lezvo, ndzi no wona a livati li nga vhululekile le tilweni. A gezu go sangula ndzi nga gizwa na gi wulawula na mina gi wa ku khwatsi i mpundzu, giku: “Tana seno ndzi ta ku komba a zvilo lezvi zvi to maheka.”  Zvalezvo ndzi no nyikwa ntamu hi moya wa Nungungulu, ndzi wona a citshamu ca wuhosi le tilweni ni wokari a nga tshamile ka cona.  Loyi a nga tshamile i wa hi ni nghohe yo hatimisa ku khwatsi i ribye ga jasperi, ni ga sardhisi;* a citshamu ca wuhosi ci wa rendzelekelwe hi wura ga nyazimu go hatimisa ku khwatsi i esmeraldha.*  A citshamu ca wuhosi ci wa randzelwe hi 24 wa zvitshamu zva wuhosi; ka zvitshamu lezvo zva wuhosi ku wa tshamile a 24 wa madhota ma nga bohile tinguwo to basa, ni zvidlodlo* zva ouro tihlokweni ta wona.  Laha citshan’wini ca wuhosi ku wa hatima, ku zwala magezu ni kudzindza. Ku wa hi ni 7 wa tikandiya ta ndzilo ti nga kari ti vhura phambeni ka citshamu ca wuhosi; a tikandiya leto ti yimela a 7 wa mimoya ya Nungungulu.  Laha phambeni ka citshamu ca wuhosi ku wa hi ni nchumu wo basa nguvhu wu tlhela wu vangamela a ku khwatsi i bimbi ga vhidro. Laha cikari* ka citshamu ca wuhosi ni lomu mareveni ya cona ku wa hi ni mune wa zvivangwa zvi hanyako zvi nga tele hi matihlo phambeni ni ndzhako.  A civangwa ci hanyako co sangula ci wa fana ni nghala; a civangwa ci hanyako ca wumbiri ci wa fana ni cihon’wana; a civangwa ci hanyako ca wunharu ci wa hi ni nghohe yo fana ni ya munhu; ni civangwa ci hanyako ca wumune ci wa fana ni gama gi purumako.  A cin’we ni cin’we ca mune wa zvivangwa lezvi zvi hanyako ci wa hi ni 6 wa tipapa, ti nga tele hi matihlo matlhelweni wontlhe ni lahasi ka tona. Mumu ni wusiku zvi wa tshama hi ku huwelela, zviku: “I basile, i basile, i basile Jehovha Nungungulu wa Ntamu Wontlhe, loyi a nga hi kona, loyi a nga kona, ni loyi a tova kona.”  Ni ka cihi cikhati leci a zvivangwa zvi hanyako zvi dzundzako, ni ku dhumisa, ni ku bonga Loyi a tshamileko citshan’wini ca wuhosi, ku nga Loyi a hanyako kala kupindzuka ni kupindzuka, 10  a 24 wa madhota mawa lahasi mahlweni ka Loyi a tshamileko citshan’wini ca wuhosi ma khozela loyi a hanyako kala kupindzuka ni kupindzuka, ma hoxa a zvidlodlo* zva wona mahlweni ka citshamu ca wuhosi, maku: 11  “Jehovha Nungungulu wa hina, wena wa ringanelwa hi ku amukela kudhumiswa ni wudzundzo ni ntamu, hakuva hi wena u nga vanga zvilo zvontlhe, hi kota ya kurandza ka wena zvi kona niku zvi vangilwe.”

Mitlhamuselo ya lahasi

Kutani: “ribye ga lisima ga muvala wo pswhuka”.
Kutani: “emeraldhi”.
Kutani: “tikorowa”.
Kutani: “cikari na cikari”.
Kutani: “tikorowa”.