Kuvhululelwa 10:1-11

  • Ngilozi ya ntamu yi nga ni cibhukwana (1-7)

    • “A cikhati ca kurindzela ci mbhelile” (6)

    • A cihundla co basa ci ta tatiseka (7)

  • Johani aga cibhukwana (8-11)

10  Ndzi no wona a ngilozi yin’wani ya ntamu na yi relela hi le tilweni na yi ambele* refu, ni wura ga nyazimu hlokweni ya yona; a nghohe ya yona yi wa fana ni gambo, ni minenge* ya yona yi wa ku khwatsi maziki* ya ndzilo.  Yi wa hi ni cibhukwana canjeni ga yona ci nga vhululilwe. Yi no kandzihela bimbi hi nkondzo wa yona wa cinene kanilezvi hi lowu wa cibhabha yi no kandzihela misava.  Yi no banguleka hi gezu ga hombe a ku khwatsi i nghala loku yi bhonga. A cikhati leci yi nga banguleka, ndzi nozwa a magezu ya 7 wa zvingwalangwandla.  Makunu, a cikhati leci a 7 wa zvingwalangwandla zvi nga wulawula, ndzi wa lava ku tsala, kanilezvi ndzi nozwa a gezu hi le tilweni, giku: “Lema a timhaka leti ti wulilweko hi 7 wa zvingwalangwandla, u nga ti tsali.”  A ngilozi leyi ndzi nga yi wona na yi yimile bimbini ni laha misaveni yi no tlakusela a woko ga yona ga cinene tilweni,  yi hlambanya hi Loyi a hanyako kala kupindzuka ni kupindzuka, loyi a vangileko tilo ni lezvi zvi nga ka gona, ni misava ni lezvi zvi nga ka yona, ni bimbi ni lezvi zvi nga ka gona, yiku: “A cikhati ca kurindzela ci mbhelile.  Kanilezvi masikwini lawa a ngilozi ya wu 7 yi to lava kuba a mpundzu wa yona, hakunene ku ta tatiseka a cihundla co basa leci Nungungulu a ci kaneleko kota mahungu ya ma nene ka malandza yakwe, ku nga vaphrofeti.”  Ndzi nozwa gezu hi le tilweni na gi wulawula kambe na mina, giku: “Famba u ya teka a cibhukwana ci vhululilweko leci ci nga canjeni ga ngilozi leyi yi yimileko bimbini ni laha misaveni.”  Ndzi noya ka ngilozi ndzi ya yi byela lezvaku yi ndzi nyika a cibhukwana. Yiku ka mina: “Teka uga, ci ta bava ndzeni ka wena, kanilezvi lomu kanwini ka wena ci ta tsombela a ku fana ni wulombe.” 10  Ndzi no teka a cibhukwana canjeni ga ngilozi ndziga. Lomu kanwini ka mina ci wa tsombela a ku fana ni wulombe, kanilezvi laha ndzi nga mbhetile kuga, lomu ndzeni ka mina ku no bava. 11  Va no ndzi byela, vaku: “Phrofeta kambe xungetano hi vanhu, ni matiko, ni tirimi, ni tihosi to tala.”

Mitlhamuselo ya lahasi

Kutani: “ti tsondzele”.
Hi kukongoma: “mikondzo”.
Kutani: “timhandze; tisika”.