Nghena endzeni

Yana enxaxamelweni wa vumbirhi

Timbhoni Ta Yehovha

Xitsonga

Xana Timbhoni Ta Yehovha I Maziyoni?

Xana Timbhoni Ta Yehovha I Maziyoni?

Doo, a hi Maziyoni. Timbhoni ta Yehovha i Vakreste lava ripfumelo ra vona ri sekeriweke eMatsalweni. Vukhongeri byin’wana byi dyondzisa leswaku ku hlengeletiwa ka Vayuda le Palestina swi fambisana ni vuprofeta bya Matsalwa kambe Timbhoni ta Yehovha a ti pfumeli eka sweswo. A ti tshembi leswaku xiendlakalo lexi xa vupolitiki xi profetiwe hi ku kongoma eMatsalweni. Entiyisweni, Matsalwa a ma tlakusi mfumo wo karhi wa vanhu, rixaka kumbe ku teka vanhu van’wana va ri va nkoka ku tlula van’wana. Magazini wa Timbhoni ta Yehovha wa Xihondzo xo Rindza, wu swi veke erivaleni wu ku: “A ku [na] Matsalwa lama seketelaka mhaka ya politiki ya Vuziyoni.”

Encyclopædia Britannica yi hlamusela Vuziyoni tanihi “Xiendlakalo xo karhi xa Vayuda lexi pakani ya kona a ku ri ku simeka ni ku seketelaka tiko ra Vayuda ePalestina.” Ndhavuko wa vona a wu katsa vukhongeri ni politiki. Timbhoni ta Yehovha a ti seketeli Vuziyoni tanihi dyondzo ya vukhongeri naswona ti va nkanyi wa le ndzilakaneni loko swi ta etimhakeni ta Vuziyoni.

Nhlengeletano ya Timbhoni ta Yehovha i vukhongeri naswona a yi seketeli timhaka ta politiki leti nga ha katsaka Vuziyoni. Timbhoni ta Yehovha ta tiviwa leswaku ti va nkanyi wa le ndzilakaneni loko swi ta etimhakeni ta tipolitiki naswona ematikweni man’wana ti xanisiwile swinene hikwalaho ka leswi ti nga seketeliki tipolitiki. Ha tiyiseka leswaku Mfumo wa Xikwembu wa le matilweni hi wona ntsena lowu nga ta tisa ku rhula hilaha ku nga heriki emisaveni leyi; a ku na hulumendhe yo karhi kumbe mfumo wa munhu lowu nga ta endla tano.

Nawu wa xisekelo lowu Timbhoni ta Yehovha ti pfumelaka eka wona ku nga khathariseki leswaku titshama kwihi, i ku yingisa milawu ya tihulumendhe. A ti va xandzukeli valawuri va tiko kumbe ku hoxa xandla etimhakeni ta tinyimpi.