Seta screen reader

Hlawula ririmi

Yana enxaxamelweni wa vumbirhi

Nghena endzeni

Timbhoni Ta Yehovha

Xitsonga

Xana Mi Ringeta Ku Ponisiwa Hi Ku Chumayela Hi Yindlu Ni Yindlu?

Xana Mi Ringeta Ku Ponisiwa Hi Ku Chumayela Hi Yindlu Ni Yindlu?

E-e. Hambilesw nkarhi hinkwawo hi chumayelaka hi yindlu ni yindlu, a hi pfumeli leswaku sweswo swi ta endla hi ponisiwa. (Vaefesa 2:8) Ha yini?

Ehleketa hi xifananiso lexi: Anakanya hi wanuna lonene la tshembiseke ku nyika munhu un’wana ni un’wana nyiko yo durha loko munhu wa kona a fika endhawini yo karhi hi siku leri a ri vekeke. Loko a wu n’wi tshemba hakunene, xana a wu nga ta endla leswi a swi vulaka? Swi le rivaleni leswaku a wu ta swi endla. Swi nga ha endleka leswaku a wu ta byela vanghana ni ndyangu wa wena hi mhaka leyi, leswaku na vona va ta kota ku yi kuma nyiko leyi. Hambiswiritano, a wu nga ta yi kuma hileswi u endlaka leswi a swi vulaka. U yi kuma hi leswi wanuna yoloye a swi lavaka ku ku nyika yona.

Hilaha ku fanaka, Timbhoni ta Yehovha ta xi tshemba xitshembiso xa Xikwembu xa leswaku vanhu lava va xi yingisaka va ta hanya va nga ha fi. (Varhoma 6:23) Hi ringeta hi matimba ku avelana ni van’wana leswi hi swi pfumelaka, hi ri karhi hi tshemba leswaku va ta vuyeriwa eka switshembiso swa Xikwembu. Kambe a hi pfumeli leswaku loko hi chumayela hi ta ponisiwa. (Varhoma 1:17; 3:28) Loko a ku nga ri tintswalo ta Xikwembu, kahle-kahle, a xi kona lexi munhu a nga xi endlaka leswaku a faneleka ku kuma nkateko wolowo lowukulu swinene. “Xi hi ponisile. A ku nga ri hi mhaka ya mintirho leyo lulama leyi hi hexe hi yi endleke, kambe xi hi ponisile hi tintswalo ta xona.”—Tito 3:5, Bibele—Mahungu Lamanene.