Nghena endzeni

Yana enxaxamelweni wa vumbirhi

Timbhoni Ta Yehovha

Xitsonga

Ntirho Wa N’wina Wu Seketeriwa Njhani Hi Timali?

Ntirho Wa N’wina Wu Seketeriwa Njhani Hi Timali?

Ntirho wa hina wo chumayela wu seketeriwa hi minyikelo leyi Timbhoni ta Yehovha ti yi nyikelaka swi huma embilwini. A ku humesiwi minhlengo eminhlanganweni ya hina naswona swirho swa kona a swi humesi vukhume. (Matewu 10:7, 8) Kambe laha hi hlanganaka kona ku ni mabokisi ya minyikelo leswaku un’wana ni un’wana la tsakelaka ku nyikela a nga nyikela. A ku tivisiwi leswaku ku nyikele mani.

Leswi ku nga riki ni lava va titekaka va ri vafundhisi lava lavaka ku hakeriwa, mali ya hina hi yi tirhisa hi vutlhari. Ku engetela kwalaho, hina Timbhoni ta Yehovha a hi hakeriwi loko hi chumayela hi yindlu ni yindlu naswona hi gandzela eka miako leyi tolovelekeke.

Minyikelo yin’wana ni yin’wana leyi rhumeriwaka erhavini ra Timbhoni ta Yehovha yi tirhiseriwa ku phalala lava hlaseriweke hi timhangu ta ntumbuluko, ku pfuna varhumiwa ni vatirheli lava endzelaka mavandlha, ku pfuna leswaku ku akiwa tindhawu to gandzela eka matiko lama ha hluvukaka ni ku pfuna leswaku ku kandziyisiwa ku tlhela ku rhumeriwa Tibibele ni minkandziyiso yin’wana ya Vukreste.

Un’wana ni un’wana wa hlawula leswaku a nga tsakela ku nyikelela swilaveko swo hlayisa laha hi gandzelaka kona, ntirho wa misava hinkwayo kumbe ha swimbirhi. Vandlha rin’wana ni rin’wana ri endla xiviko xa timali nkarhi ni nkarhi leswaku ri tivisa swirho swa rona.