Nghena endzeni

Yana enxaxamelweni wa vumbirhi

Timbhoni Ta Yehovha

Xitsonga

Xana Timbhoni Ta Yehovha Ti Aka Mindyangu Kumbe Ta Yi Hahlula?

Xana Timbhoni Ta Yehovha Ti Aka Mindyangu Kumbe Ta Yi Hahlula?

Tanihi Timbhoni ta Yehovha, hi ringeta ku aka mindyangu ya hina swin’we ni ya vaakelani va hina. Hi xixima Xikwembu tanihi Musunguri wa lunghiselelo ra ndyangu. (Genesa 2:21-24; Vaefesa 3:14, 15) EBibeleni, xi dyondzisa tidyondzo leti pfuneke vanhu emisaveni hinkwayo leswaku va va ni vukati lebyi tiyeke ni lebyi tsakisaka.

Ndlela Leyi Timbhoni Ta Yehovha Ti Pfunaka Ha Yona Ku Tiyisa Mindyangu

Hi ringeta hi matimba ku tirhisa ndzayo ya Bibele tanihi leswi yi hi pfunaka leswaku hi va vavanuna, vavasati ni vatswari lavanene. (Swivuriso 31:10-31; Vaefesa 5:22–6:4; 1 Timotiya 5:8) Vutlhari lebyi kumekaka eBibeleni byi pfuna ni mindyangu leyi nga ni swirho leswi nga ni vukhongeri lebyi hambaneke leswaku yi humelela. (1 Petro 3:1, 2) Twana leswi vuriweke hi vanhu lava nga riki Timbhoni lava vanghana va vona va vukati va veke Timbhoni ta Yehovha:

  • “Malembe ya tsevu yo sungula hi tshama swin’we, a hi tshamela ku holova ni ku khunguvanyisana. Endzhaku ka loko Ivete a ve un’wana wa Timbhoni ta Yehovha, a ndzi rhandza swinene ni ku ndzi lehisela mbilu. Ku cinca loku a ku endleke ku sirhelele vukati bya hina.”—Clauir, la humaka eBrazil.

  • “A ndzi nga swi tsakeli loko nuna wa mina Chansa a sungula ku dyondza Bibele ni Timbhoni ta Yehovha hikuva a ndzi ehleketa leswaku ti hahlula mindyangu. Ku sukela hi nkarhi wolowo, ndzi xiye leswaku Bibele yi sirhelela vukati bya hina.”—Agness, la humaka eZambia.

Entirhweni wa hina wo chumayela, hi komba vaakelani va hina ndlela leyi ku hanya hi milawu leyi kumekaka eBibeleni ku nga va pfunaka ha yona ku

Xana ku cinca ku vanga ku avana evukatini?

Minkarhi yin’wana ka ku vanga. Hi xikombiso, hi 1998 khampani ya vulavisisi ya Sofres yi vike leswaku vukati byin’we eka bya 20 byi ve ni swiphiqo leswikulu loko munghana un’we wa vukati a va un’wana wa Timbhoni ta Yehovha.

Yesu u vule ka ha ri emahlweni leswaku lava va hanyaka hi tidyondzo takwe minkarhi yin’wana va ta va ni swiphiqo endyangwini. (Matewu 10:32-36) N’wamatimu Will Durant u xiye leswaku ehansi ka Mfumo wa Rhoma, “Vakreste a va hehliwa hi ku hahlula mindyangu,” * leswi namuntlha tin’wana ta Timbhoni ta Yehovha ti hehliwaka ha swona. Xana leswi swi vula leswaku Timbhoni ti vanga ku avana evukatini?

Huvo ya Matiko ya Yuropa ya Timfanelo ta Vanhu

Loko Huvo ya Matiko ya Yuropa ya Timfanelo ta Vanhu yi teka xiboho xa yona eka nandzu wa leswaku Timbhoni ta Yehovha ti hahlula mindyangu, yi vule leswaku swirho swa mindyangu leswi nga riki Timbhoni hi swona leswi vangaka swiphiqo, swi tlhela swi ala ku xixima ntshunxeko ni mfanelo ya Timbhoni yo gandzela hi ku ntshunxeka.” Huvo yi tlhele yi vula leswi: “Mhaka leyi yi tolovelekile eka vukati lebyi nga ni vukhongeri lebyi hambaneke naswona swi tano hi Timbhoni ta Yehovha.” * Niloko ti langutana ni ku xungetiwa hikwalaho ka vukhongeri bya tona, Timbhoni ta Yehovha ti ringeta hi matimba ku landzela ndzayo ya Bibele leyi nge: “Mi nga tlheriseli swo biha hi swo biha hambi eka mani. . . Loko swi koteka, swi titshege hi n’wina, vanani ni ku rhula ni vanhu hinkwavo.”—Varhoma 12:17, 18.

Xivangelo xa ku va Timbhoni ta Yehovha ti tekana ni Timbhonikulobye

Timbhoni ti tirhisa xileriso lexi humaka eBibeleni xa ku teka “eHosini ntsena,” leswi vulaka ku tekana ni munhu la nga ni ripfumelo leri fanaka ni ra tona. (1 Vakorinto 7:39) Xileriso lexi xi huma eBibeleni naswona xa pfuna. Hi xikombiso, xihloko xin’wana lexi kandziyisiweke hi 2010 xa magazini wa Journal of Marriage and Family xi vule leswaku “mimpatswa leyi nga ni ripfumelo leri fanaka, leyi hanyaka hi ku pfumelelana na rona ni hi leswi yi swi pfumelaka” yi va ni vukati lebyinene. *

Hambiswiritano, Timbhoni a ti khutazi Timbhonikulobye leswaku ti tshika munghana wa tona wa vukati la nga riki Mbhoni. Bibele yi ri: “Loko makwerhu a ri ni nsati loyi a nga pfumelangiki, kambe yena a tiyimisele ku tshama na yena, a nga n’wi tshiki; ni wansati loyi a nga ni nuna loyi a nga pfumelangiki, kambe nuna loyi a tiyimisele ku tshama na yena, a nga n’wi tshiki nuna wa yena.” (1 Vakorinto 7:12, 13) Timbhoni ta Yehovha ti hanya hi xileriso lexi.

^ ndzim. 17 Hlaya Caesar and Christ, tluka 647.

^ ndzim. 18 Hlaya hi xiboho lexi nga tekiwa eka nandzu wa Timbhoni ta Yehovha ta le Moscow ni Tin’wana leti nga mangalela tiko ra Rhaxiya, matluka 26-27, ndzima 111.

^ ndzim. 20 Hlaya magazini wa Journal of Marriage and Family, Vholumo 72, Ndzima 4, (August 2010), tluka 963.