Nghena endzeni

Yana enxaxamelweni wa vumbirhi

Timbhoni Ta Yehovha

Xitsonga

Ha Yini Timbhoni Ta Yehovha Ti Nga Tlangeli Masiku Ya Ku Velekiwa?

Ha Yini Timbhoni Ta Yehovha Ti Nga Tlangeli Masiku Ya Ku Velekiwa?

Timbhoni ta Yehovha a ti tlangeli masiku ya ku velekiwa hikuva ti tshemba leswaku minkhuvo yoleyo a yi xi tsakisi Xikwembu. Hambileswi Bibele yi nga swi yirisiki hi ku kongoma ku tlangela masiku ya ku velekiwa, yi hi pfuna ku vona langutelo ra Xikwembu hi mhaka leyi. Xiya tinhla leti landzelaka ta mune ni milawu ya Bibele leyi vulavulaka hi swona.

  1. Ku tlangela masiku ya ku velekiwa swi fambisana ni vungoma. Hi ku ya hi Funk & Wagnalls Standard Dictionary of Folklore, Mythology, and Legend, minkhuvo leyi ya ku tlangela masiku ya ku velekiwa yi huma eka dyondzo ya leswaku siku leri munhu a nga velekiwa ha rona, “mimoya yo homboloka ni minkucetelo yo biha swa n’wi hlasela” naswona “swilo leswinene leswi vanghana vakwe va n’wi navelelaka swona swa n’wi sirhelela eka mimoya yoleyo.” Buku leyi nge The Lore of Birthdays yi vula leswaku eminkarhini ya khale ku hlayisiwa ka masiku ya ku velekiwa a ku ri ka “nkoka hi leswi a ku vhumbhiwa vumundzuku bya munhu” hi ku tirhisa “vungoma bya swilo swa le mpfhukeni.” Buku leyi yi tlhela yi vula leswaku “hi ku ya hi ntsheketo, makhandlhela ya siku ra ku velekiwa ma ni moya wo hlawuleka lowu nyikaka mikateko.”

    Hambiswiritano, Bibele yi yirisa ku tirhisa masalamusi, ku hlahluva, vungoma, kumbe “nchumu lowu fanaka ni leswi.” (Deteronoma 18:14; Vagalatiya 5:19-21) Kahlekahle, lexi endleke leswaku Xikwembu xi sola muti wa khale wa Babilona hileswi vaaki va wona a a va endla vungoma bya swilo swa le mpfhukeni, ku nga ku hlahluva. (Esaya 47:11-15) Timbhoni ta Yehovha a ti kandziyisi xin’wana ni xin’wana malunghana ni ndhavuko wo karhi kambe loko Matsalwa ma vula swo karhi ha wona a ti swi bi hi makatla.

  2. Vakreste va khale a va ma tlangelanga masiku ya ku velekiwa. The World Book Encyclopedia yi vula leswaku “a va teka ku tlangela siku ra ku velekiwa ka munhu wihi na wihi ku ri mukhuva wa vuhedeni.” Bibele yi kombisa leswaku vaapostola ni vadyondzisiwa van’wana va Yesu va sungule ndlela leyi Vakreste hinkwavo va faneleke va hanya hi yona.—2 Vatesalonika 3:6.

  3. Vakreste va fanele va tlangela rifu ra Yesu ntsena. (Luka 22:17-20) Leswi swi tolovelekile hikuva Bibele yi vula leswaku ‘siku ra ku fa ra antswa ku ri ni siku leri munhu a velekiweke ha rona.’ (Eklesiasta 7:1) Loko Yesu a fa, se a a tiendlele vito lerinene ni Xikwembu, leswi endlaka leswaku siku ra ku fa ka yena ri va ra nkoka ku tlula siku ra ku velekiwa kakwe.—Vaheveru 1:4.

  4. Ku hava nandza wa Xikwembu eBibeleni loyi a tlangeleke masiku ya ku velekiwa. Bibele yi vulavula hi minkhuvo yimbirhi ya ku tlangela masiku ya ku velekiwa leyi endliweke hi vanhu lava a va nga ri malandza ya Xikwembu. Hinkwayo minkhuvo yoleyo yi ve ni vuyelo byo biha.—Genesa 40:20-22; Marka 6:21-29.

Xana vana va Timbhoni va titwa va tsoniwa swo karhi hi leswi va nga tlangeliki masiku ya ku velekiwa?

Ku fana ni vatswari lavanene, Timbhoni ti komba vana va tona rirhandzu lembe hinkwaro, ti va xavela tinyiko ni ku va endlela swinkhubyana leswi tsakisaka. Ti ringeta ku tekelela xikombiso lexinene xa Xikwembu, lexi nyikaka vana va xona tinyiko letinene handle ko hlawula. (Matewu 7:11) Vana va Timbhoni va twa va nga tsoniwi nchumu hi ku ya hi leswi vuriwaka laha:

  • “Swa tsakisa ku kuma nyiko u nga swi langutelanga.”—Tammy, la nga ni malembe ya 12.

  • “Hambileswi ndzi nga kumiki tinyiko hi siku ra ku velekiwa ka mina, vatswari va mina va ndzi xavela tinyiko hi nkarhi wa swiendlakalo swin’wana. Ndza swi tsakela sweswo hikuva ndzi va ndzi nga swi langutelanga.”—Gregory, la nga ni malembe ya 11.

  • “U ehleketa leswaku timinete ta 10, swikhekhani ni risimu swi nga endla nkhuvo? Tana ka hina ni ta ku komba leswaku nkhuvo i yini!”—Eric, la nga ni malembe ya 6.

     

DYONDZA SWO TALA

MAHUNGU LAMANENE LAMA HUMAKA EKA XIKWEMBU!

Milawu Ya Xikwembu Yi Hi Pfuna Njhani?

Yesu u hlamusele leswaku ha yini hi lava nkongomiso ni leswaku hi yihi milawu ya Bibele leyi nga ya nkoka.