Nghena endzeni

Yana enxaxamelweni wa vumbirhi

Timbhoni Ta Yehovha

Xitsonga

Ha Yini Mi Nga Yi eNyimpini?

Ha Yini Mi Nga Yi eNyimpini?

Timbhoni ta Yehovha a ti yi enyimpini hikwalaho ka swivangelo leswi landzelaka:

  1. Ku yingisa Xikwembu. Bibele yi vula leswaku malandza ya Xikwembu ma ta “fula mabanga ya vona ma va swikomu” naswona “a va nge he dyondzi nyimpi.”—Esaya 2:4.

  2. Ku yingisa Yesu. Yesu u byele muapostola Petro a ku: “Vuyisela banga ra wena endhawini ya rona, hikuva hinkwavo lava khomaka banga va ta lova hi banga.” (Matewu 26:52) Xisweswo Yesu u kombise leswaku valandzeri vakwe a va fanelanga va khoma matlhari va ya enyimpini.

    Vadyondzisiwa va Yesu va yingisa xileriso xakwe xo ka va nga vi “xiphemu xa misava,” hi ku va ni vukala tlhelo etimhakeni ta politiki. (Yohane 17:16) A va lwisani ni swiboho swa vusocha kumbe ku nghenelela eka lava hlawulaka ku ya enyimpini.

  3. Ku rhandza van’wana. Yesu u lerise vadyondzisiwa vakwe a ku, “rhandzanani.” (Yohane 13:34, 35) Xisweswo a va ta vumba vamakwerhu va le misaveni hinkwayo laha xirho a xi nga ta lwa ni makwerhu wa xona.—1 Yohane 3:10-12.

  4. Xikombiso xa Vakreste vo sungula. Encyclopedia of Religion and War yi ri: “Valandzeri va Yesu vo sungula va ale ku ya enyimpini ni le vusocheni,” hikuva a va teka mintirho yoleyo yi nga “fambisani ni rirhandzu leri Yesu a dyondziseke ha rona ni xileriso xa leswaku munhu u fanele a rhandza valala vakwe.” Hilaha ku fanaka, Mufundhisi wa le Jarimani, Peter Meinhold u vule leswi malunghana ni vadyondzisiwa va Yesu vo sungula: “Ku va Mukreste tlhelo socha a swi langutiwa swi nga hlangani nikatsongo.”

Ndlela leyi hi pfunaka vanhu ha yona

Timbhoni ta Yehovha i swirho leswi pfunaka swinene eka ndhawu leyi swi tshamaka eka yona naswona a swi na khombo etikweni leri swi tshamaka eka rona. Ha va xixima vafumi va misava, hi ku landza swileriso leswi swa Bibele:

  • “Tiveke ehansi ka valawuri lava tlakukeke.”—Varhoma 13:1.

  • “Hikokwalaho, tlheriselani swilo swa Khezari eka Khezari, kambe swilo swa Xikwembu eka Xikwembu.”—Matewu 22:21.

Xisweswo, hi yingisa nawu, hi hakela swibalo naswona hi khomisana ni hulumendhe eka matshalatshala lawa yi ma endlaka ya vuhlayiseki eka vanhu.