Seta screen reader

Hlawula ririmi

Yana enxaxamelweni wa vumbirhi

Nghena endzeni

Timbhoni Ta Yehovha

Xitsonga

Xana Timbhoni Ta Yehovha Ti Sindzisa Vanhu Ku Cinca Tikereke Ta Vona?

Xana Timbhoni Ta Yehovha Ti Sindzisa Vanhu Ku Cinca Tikereke Ta Vona?

Ee, a hi va sindzisi. Hi swi veke erivaleni eka magazini wa hina wa Xihondzo xo Rindza: “Ku sindzisa vanhu leswaku va tshika vukhongeri bya vona swi hoxile.” * Hi papalata ku sindzisa vanhu hikwalaho ka swivangelo leswi:

  • Yesu a nga va sindzisanga vanhu leswaku va pfumela leswi a swi dyondzisa. A a swi tiva leswaku a va talanga lava a va ta swi pfumela. (Matewu 7:13, 14) Loko vadyondzisiwa van’wana va yena va khunguvanyisiwe hi leswi a va byeleke swona, u va tshike va famba ematshan’weni yo va sindzisa ku sala.—Yohane 6:60-62, 66-68.

  • Yesu u dyondzise valandzeri vakwe leswaku va nga sindzisi vanhu ku cinca vukhongeri bya vona. Ematshan’weni yo sindzisa vanhu ku amukela mahungu lamanene ya Mfumo, vadyondzisiwa vakwe a va fanele va lava vanhu lava a va ta ma yingisa hi mbilu hinkwayo.—Matewu 10:7, 11-14.

  • Ku cinca vukhongeri hi ku sindzisiwa a swi pfuni nchumu hikuva Xikwembu xi amukela ntsena vugandzeri lebyi humaka embilwini.—Deteronoma 6:4, 5; Matewu 22:37, 38.

Xana ntirho wa hina wo chumayela wu cincisa vanhu tikereke ta vona?

I ntiyiso leswaku hi chumayela rungula ra Bibele “endhawini ya le kule swinene ya misava” ni ku “dyondzisa erivaleni ni hi yindlu ni yindlu” hilaha Bibele vuleke hakona. (Mintirho 1:8; 10:42; 20:20) Ku fana ni Vakreste vo sungula, minkarhi yin’wana hi hehliwa hi ku cincisa vanhu tikereke. (Mintirho 18:12, 13) Hambiswiritano, swihehlo sweswo a hi ntiyiso. A hi sindzisi munhu leswaku a cinca kereke yakwe. Ematshan’weni ya sweswo, hi pfumela leswaku vanhu va fanele va va ni vutivi leswaku va ta tiendlela xiboho.

A hi sindzisi vanhu leswaku va cinca tikereke ta vona naswona a hi tirhi ku fana ni vanhu va tipolitiki kumbe hi nyika vanhu minkandziyiso leswaku hi kuma swirho leswi engetelekeke. Kambe van’wana lava tivulaka Vakreste a va n’wi xiximi Kreste hi ku endla swilo swo tano. *

Xana munhu u na yona mfanelo yo cinca kereke yakwe?

Muprofeta Abrahama u tshike vukhongeri bya maxaka yakwe

Ina, Bibele yi vula leswaku vanhu va ni mfanelo yo cinca vukhongeri bya vona. Yi vulavula hi vanhu vo tala lava ti hlawuleleke ku gandzela Xikwembu xa ntiyiso ematshan’weni yo nghena tikereke leti ngheniwaka hi maxaka ya vona. Van’wana va vona i Abrahama, Rhuti ni vaaki van’wana va le Atena na muapostola Pawulo. (Yoxuwa 24:2; Rhuti 1:14-16; Mintirho 17:22, 30-34; Vagalatiya 1:14, 23) Ku engetela kwalaho, Bibele a yi aleli munhu leswaku a ti endlela xiboho xo tshika vukhongeri lebyi amukelekaka eka Xikwembu hambileswi xiboho xexo xi hoxeke.—1 Yohane 2:19.

Vumbiwa bya Misava Hinkwayo bya Timfanelo ta Vanhu, leyi Nhlangano wa Matiko yi wu vulaka “xihlovo xa timfanelo ta vanhu,” yi seketela mfanelo yo cinca vukhongeri.” Nawu wolowo wu vula leswaku munhu un’wana ni un’wana u ni “ntshunxeko wo cinca vukhongeri byakwe” ni “ku lava, ku kuma rungula ni ku byela van’wana rungula rero” ku katsa ni mavonelo ya vukhongeri. * Nilokoswiritano, timfanelo leti ti lava leswaku vanhu va xixima timfanelo ta van’wana to khomelela eka leswi va swi pfumelaka ni ku ala mavonelo lama va nga pfumelelaniki na wona.

Xana ku cinca kereke swi vula ku nga xiximi mikhuva ya ndyangu?

A swi tano. Bibele yi khutaza leswaku hi xixima vanhu va mixaka hinkwayo, ku nga khathariseki vukhongeri bya vona. (1 Petro 2:17) Ku engetela kwalaho, Timbhoni ta Yehovha ti tirhisa xileriso xa le Bibeleni xo xixima vatswari va tona hambiloko va nga ngheni tikereke to fana.—Vaefesa 6:2, 3.

Hambiswiritano, a hi vanhu hinkwavo lava pfumelelanaka ni leswi Bibele yi swi vulaka. Wansati un’wana la kuleleke eZambia u ri: “Endhawini leyi a ndzi tshama eka yona, loko u cinca kereke . . . a wu tekiwa u nga tshembeki naswona u ri muxandzuki endyangwini ni le ka vaakatiko.” Wansati loyi swi n’wi humelerile, loko a ha ri nhwanyana u sungule ku dyondza Bibele ni Timbhoni ta Yehovha kutani endzhakunyana a teka xiboho xo cinca kereke yakwe. U ri: “Vatswari va mina a va tshamela ku ndzi byela leswaku leswi ndzi swi endleke a va swi tsakeli naswona ndzi va khomisa tingana. Leswi swi ndzi twise ku vava tanihi leswi a ndzi lava ku tsakeriwa hi vatswari va mina. . . . Loko ndzi tshembeka eka Yehovha hi ku ka ndzi nga landzeli ndhavuko wa vukhongeri a swi vuli swona leswaku a ndzi wu xiximi ndyangu wa ka hina.” *

^ ndzim. 2 Hlaya Xihondzo xo Rindza xa January 1, 2002, tluka 12, ndzimana 15.

^ ndzim. 8 Hi xikombiso, kwalomu ka lembe ra 785 C.E., Charlemagne u humese xitiviso xa leswaku lava a va ala ku khuvuriwa tanihi Vakreste eSaxony a va fanele va gweviwa rifu. Nakambe ku Rhula ka Augsburg, ku nga ntwanano lowu nga sayiniwa hi ku lwa nyimpi ni Mfumo wo Kwetsima wa Rhoma hi 1555 C.E, wu vule leswaku mufumi un’wana ni un’wana wa xifundzha u fanele a va xirho xa Kereke ya Rhoma Khatoliki kumbe ya Lutere nileswaku vanhu hinkwavo lava a va ri ehansi ka mfumo wakwe a va fanele va va swirho swa tikereke teto. Lava a va ala ku landzelela swileriso sweswo a va fanele va rhurhela etikweni rin’wana.

^ ndzim. 11 Timfanelo leti yelanaka ta kumeka eka African Charter on Human and Peoples’ Rights, American Declaration of the Rights and Duties of Man, Arab Charter on Human Rights leyi nga huma hi 2004, ASEAN (Association of Southeast Asian Nations) Human Rights Declaration, European Convention on Human Rights na International Covenant on Civil and Political Rights. Hambiswiritano, hambi matiko lama vulaka leswaku ma tirhisa timfanelo teto a ma endli matshalatshala leswaku vanhu va tirhisa timfanelo leti.

^ ndzim. 14 Bibele yi vula leswaku vito ra Xikwembu xa ntiyiso i Yehovha.

DYONDZA SWO TALA

Xana Timbhoni Ta Yehovha Ti Aka Mindyangu Kumbe Ta Yi Hahlula?

Timbhoni ta Yehovha minkarhi yin’wana ti hehliwa hi ku hahlula mindyangu. Kambe xana Timbhoni hi tona leti vangaka ku avana?

Hi Wahi Mahungu Lamanene Hi Vukhongeri?

Xana wu ta kala wu va kona nkarhi lowu vanhu hinkwavo va nga ta gandzela Xikwembu xi ri xin’we xa ntiyiso hi vun’we