Seta screen reader

Hlawula ririmi

Yana enxaxamelweni wa vumbirhi

Nghena endzeni

Timbhoni Ta Yehovha

Xitsonga

Xana Timbhoni Ta Yehovha Ti Cince Bibele Leswaku Yi Fambisana Ni Leswi Ti Pfumelaka Eka Swona?

Xana Timbhoni Ta Yehovha Ti Cince Bibele Leswaku Yi Fambisana Ni Leswi Ti Pfumelaka Eka Swona?

Doo, a hi yi cincanga. Ku hambana ni sweswo, loko hi ta va hi xiye leswaku leswi hi pfumelaka eka swona a swi nga fambisani hi ku helela ni Bibele, hi cince leswi a hi pfumela eka swona.

Loko hi nga si sungula ku kandziyisa Vuhundzuluxeri Bya Misava Leyintshwa Bya Matsalwa Yo Kwetsima hi 1950, hi kambisise Bibele. Hi tirhise vuhundzuluxeri byin’wana ni byin’wana lebyi a byi kumeka hi nkarhi wolowo naswona hi sungule ku fambisana ni leswi Bibele yi swi vulaka. Xiya swikombiso swo hlayanyana swa leswi Timbhoni ta Yehovha ku nga khale ti pfumela eka swona kutani u endla xiboho loko leswi ti pfumelaka eka swona swi fambisana ni leswi Bibele yi swi dyondzisaka.

  1. Leswi hi swi pfumelaka: Xikwembu a hi Vunharhu-un’we. Nkandziyiso wa Zion’s Watch Tower ya July 1882 wu te: “Vahlayi va hina va swi xiya leswaku ha pfumela eka Yehovha, Yesu ni Moya lowo kwetsima kambe a hi pfumeli nikatsongo eka dyondzo ya leswaku swilo leswi i Swikwembu swinharhu eka munhu un’we kumbe i Xikwembu xin’we eka vanhu vanharhu.

    Leswi Bibele yi swi vulaka: “Yehovha Xikwembu xa hina i Yehovha un’we.” (Deteronoma 6:4) “Ku ni Xikwembu xin’we ntsena, a nga Tatana, swi nga leswi hinkwaswo swi humaka ka xona, na hina hi ri ka xona; kambe hi ni Hosi yi ri yin’we ntsena, a nga Yesu Kriste, loyi hinkwaswo swi endliweke hi yena, na hina hi tumbuluxiwe hi yena.” (1 Vakorinto 8:6, Bibele Ya Xitsonga) Yesu u te: “Tatana i nkulukumba ku tlula mina.”—Yohane 14:28, Bibele—Mahungu Lamanene.

  2. Leswi hi swi pfumelaka: A ku na ku xanisiwa hilaha ku nga heriki endzilweni wa tihele. Nkandziyiso wa Zion’s Watch Tower ya June 1882 a wu ri ni nhloko-mhaka leyi nge, “Hakelo Ya Xidyoho I Rifu” leyi tshahiweke eka Varhoma 6:23 eka Bibele ya King James Version, wu te: “Hakunene mhaka leyi ya olova yi tlhela yi twisiseka. Kambe swa hlamarisa leswi vo tala lava vulaka leswaku Bibele i Rito ra Xikwembu va hambetaka va kanetana ni leswi yi swi vulaka kambe hi hala tlhelo va vula leswaku yi dyondzisa leswaku hakelo ya xidyoho i ku xanisiwa hilaha ku nga heriki.”

    Leswi Bibele yi swi vulaka: “Moya-xiviri lowu dyohaka—wona wu ta fa.” (Ezekiyele 18:4, 20) Vanhu lava kanetanaka ni Xikwembu, nxupulo wa vona wo hetelela ku ta va “ku loviseriwa makumu” ku nga ri ku xanisiwa hilaha ku nga heriki.—2 Vatesalonika 1:9, King James Version.

  3. Leswi hi swi pfumelaka: Mfumo wa Xikwembu i mfumo wa xiviri ku nga ri xiyimo xa mbilu. Malunghana ni Mfumo wa Xikwembu, nkandziyiso wa Zion’s Watch Tower ya December 1881 wu te: “Ku simekiwa ka mfumo lowu, swi katsa ku susiwa ka mimfumo hinkwayo ya laha misaveni.”

    Leswi Bibele yi swi vulaka: “Eminkarhini ya tihosi leti, Xikwembu xa le matilweni xi ta simeka mfumo lowu wu nga ta ka wu nga wisi hi munhu, naswona vuhosi bya wona a byi nga nyikiwi vanhu van’wana. Mfumo lowu wu ta wisetela mimfumo leyin’wana hinkwayo, wu yi herisela makumu; kutani wona wu ta va kona hilaha ku nga heriki.”—Daniyele 2:44, Bibele—Mahungu Lamanene.

Xana Timbhoni ta Yehovha ti titshege hi Vuhundzuluxeri Bya Misava Leyintshwa ku seketela leswi ti pfumelaka eka swona?

Nikatsongo, hi hambeta hi tirhisa Tibibele ta vuhundzuluxeri byo hambana-hambana entirhweni wa hina wo chumayela. Entiyisweni, loko hi nyika munhu kopi ya Vuhundzuluxeri Bya Misava Leyintshwa mahala tanihi nongonoko wa hina wa dyondzo ya Bibele ya mahala, hi tlhela hi tsakela ku dyondza ni lava hlawulaka ku tirhisa vuhundzuluxeri byin’wana.

DYONDZA SWO TALA

Xana Dyondzo Ya Vunharhu-un’we Yi Kona eBibeleni?

Tikereke to tala ti dyondzisa leswaku Xikwembu i Vunharhu-un’we. Xana hi swona leswi Bibele yi swi dyondzisaka?

Tihele I Yini? Xana I Ndhawu Leyi Vanhu Va Xanisiwaka Eka Yona Hilaha Ku Nga Heriki?

Xana vanhu vo biha va xanisiwa endzilweni wa tihele? Xana i hakelo ya rifu? Twana tinhlamulo leti kumekaka eMatsalweni.

Ntiyiso Wa Bibele Wu Tlhele Wu Kumiwa Njhani?

Hi nga tiyiseka njhani leswaku hi swi twisisa kahle leswi Bibele yi swi dyondzisaka?