Nghena endzeni

Yana enxaxamelweni wa vumbirhi

Timbhoni Ta Yehovha

Xitsonga

Ndzawulo Yo Hlantswa Ya Bethele: Ku Sukela Eka Malapi Ya Le Khixini Ku Ya Eka Tithayi Ta Silika

Ndzawulo Yo Hlantswa Ya Bethele: Ku Sukela Eka Malapi Ya Le Khixini Ku Ya Eka Tithayi Ta Silika

Majaha ni vanhwana erhavini ra Timbhoni ta Yehovha le United States, va nyikela hi nkarhi ni matimba ya vona leswaku va hlantswa swilo leswi ringanaka tithani ta kwalomu ka 1 800 lembe ni lembe emiakweni leyi tirhisanaka ya le Brooklyn, Patterson ni le Wallkill eNew York. Mpimo wolowo wu ri woxe wa swiambalo wa hlamarisa swinene. Kambe leswi endlaka ntirho lowu wu hlawuleka i swilo swo hambana-hambana leswi vatirhi va swi hlantswaka.

Siku rin’wana ni rin’wana ra ntirho, lava tshamaka emiakweni ya Bethele ya le United States va yisa swiambalo leswi tlulaka 11 000 eka tindzawulo to hlantswa ta le Bethele—tihembe ta 2 300, maburuku ya 650 swin’we ni masokisi, swirhangiso ni swikipa. Nakambe va yisa swilo swin’wana swa 900 leswi lavaka ku basisiwa hi tikhemikhali (dry-clean).

Ku tlhela ku tisiwa swilo swin’wana swo tala swo katsa malakani, mathawula, minkumba, tiyunifomo ta vaphameri ni malapi yo basisa. Hinkwaswo leswi swi lava ku hlantswiwa, ku omisiwa ni ku tlhela swi rhumeriwa etindhawini ta swona. Swilo swo tanihi malapi yo basisa swi hlantswiwa swi tele kasi tithayi ta silika ni tihembe ta vaxisati swi hlantswiwa ha xin’we-xin’we.

Vatirhi va le ndzawulweni leyi va kamba xiambalo xin’wana ni xin’wana ku vona loko xi handzukile kumbe xi suke tikunupu. Loko ku ri ni leswi lavaka tikunupu, va ti rhungela hi muchini kumbe hi voko. Loko xiambalo xi lava ku rhungiwa kumbe ku lulamisiwa, la tivaka ku rhunga u endla tano.

Leswaku swiambalo swa magidi leswi hlantswiwaka swi nga lahleki, muchini wun’wana wu nameketa nomboro yo hlawuleka eka xin’wana ni xin’wana. Nomboro yoleyo yi endla leswaku swiambalo swi hleriwa kahle leswaku swi rhumeriwa emuakweni wun’wana ni wun’wana wa ndyangu wa Bethele wa le United States.

Vatirhi lavantshwa endzawulweni leyi va leteriwa hi vatirhi-kulobye lava nga ni ntokoto. Loyi a dyondzaka a nga ha dyondzisiwa ku endla mintirho yo hambana-hambana ya kwalomu ka 20. Ntirho lowu vonakaka onge wa olova kambe swi tekaka nkarhi ku wu tiva kahle, i ku susa mavala eswiambalweni. Mutirhi lontshwa u fanele a ma tiva kahle malapi ni ndlela leyi ma angulaka ha yona loko ma hlantswiwa hi tindlela to hambana-hambana.

Tajh loyi a nga ni lembe ni hafu a tirha endzawulweni leyi u vula leswi hi vatirhi-kulobye: “Vun’we byi tisa ntsako lowukulu—ku tirha ni vanhu va mindhavuko yo hambana-hambana swa tsakisa.” Shelly mutirhi-kulorhi u ri: “I lunghelo ku pfuna ndyangu wa hina wa Bethele wu tshama wu sasekile.”