Seta screen reader

Hlawula ririmi

Yana enxaxamelweni wa vumbirhi

Nghena endzeni

Timbhoni Ta Yehovha

Xitsonga

Ku Heta Ntirho Hi Nkarhi Lowu Vekiweke Wa Masiku Ya 60

Ku Heta Ntirho Hi Nkarhi Lowu Vekiweke Wa Masiku Ya 60

Hi Ravuntlhanu, July 5, 2013, ndyangu wa Bethele ya le United States wu tsake swinene loko Anthony Morris, loyi a nga xirho xa Huvo leyi Fumaka, a hlaya xitiviso lexi nge: “Ku tekiwe xiboho xo xavisa miako ya tsevu leyi katsaka lowu nga le 117 Adams Street ni le 90 Sands Street eBrooklyn. * Ku xavisiwa ka Muako 1 ku ya eka 5 swi lava leswaku hi huma eka yona exikarhi ka August wa lembe leri.”

A swi ri erivaleni leswaku lowu a ku ta va ntirho lowukulu swinene. Ndhawu hinkwayo ya swithezi swa miako leyi ya ntlhanu a swi ringana ni timbala ta 11 ta bolo ta mpimo lowu tirhisiwaka loko ku tlangiwa mintlangu ya misava! Nakambe a ku vekiwe masiku ya 60 leswaku ku humiwa eka miako leyi!

Ku ringana makume ya malembe, michini yo gandlisa ni yo hlanganisa tibuku a yi ri eka Muako 1 ku ya eka 5, kambe hi 2004 michini leyi yi rhurhiseriwe endhawini leyintshwa eWallkill, le New York.

Ku sukela hi nkarhi wolowo, miako leyi a yi tirhisiwa tanihi ndhawu ya vuhlayiselo ni ya ku lunghisa swilo naswona a yi tele hi swilo swo aka, fanichara ya tihofisi ni michini leyi tirhiseriwaka ku seketela mintirho yo aka eUnited States ni le matikweni man’wana.

Swilo a swi lava ku hleriwa hi vukheta leswaku ku humiwa eka miako leyi hi nkarhi lowu vekiweke. Xo sungula, ku tsariwe nxaxamelo wa swilo leswi nga endzeni ka miako leswaku ku ta tiviwa swilo leswi lavaka ku xavisiwa, leswi lavaka ku lahliwa kumbe leswi lavaka ku hlayisiwa. Kutani ku endliwe malunghiselelo yo endla ntirho lowu hi ndlela leyi sirhelelekeke ni leyi nga dyiki nkarhi.

Ndyangu wa Bethele wu tirhe hi matimba leswaku wu seketela ntirho lowu. Ku engetela kwalaho, vatirhi va nkarhinyana va ku tirhandzela va 41 va rhambiwile eBethele leswaku va ta pfuna. Vatirhi va ku tirhandzela a va huma etindhawini to tala ta United States. Vo tala va vona a ku ri majaha lama tiyeke lama nga tekangiki. Va amukele xirhambo xa ku ta tirha mavhiki ya tsevu ku ya eka ya khume, va siya mindyangu ya ka vona, vanghana ni mintirho ya vona leswakau va ta tirha eBethele. Va titwe njhani hi ntirho lowu?

Jordan, la nga ni malembe ya 21 la humaka eWashington, u te: “Ndzi navela onge a ndzi hoxe xikombelo xa mina khale.”

Steven, la nga ni malembe ya 20 la humaka eTexas, u te: “Ndzi titwa ndzi ri xirho xa ndyangu lowukulu, lowu tirhaka hi matimba ni lowu tsakeke.”

Justin, la nga ni malembe ya 23, u tsale a ku: “Ndzi titwa ndzi ri ekaya laha Bethele. Bya hlamarisa vutlhari byo tala bya moya, rirhandzu ni vunghana lebyi nga laha Bethele.”

Adler, la nga ni malembe ya 20 la humaka ePuerto Rico, u te: “A swi tika ku pfuna nimixo, kambe ndzi ake xinghana lexi nga ta tshama hi masiku.”

William, la nga ni malembe ya 21, u te: “Ku sukela loko ndza ha ri ntsongo a ndzi navela ku ya eBethele. A ndzi ehleketa leswaku ndzi ta va ni xivundza, kambe a swi vanga tano. Ku ya eBethel ku ve nkarhi wo tsakisa swinene evuton’wini bya mina! Ku hava nchumu wun’wana wo antswa ku tlula ku va laha.”

Xana ntlawa lowu wa vatirhi va ku tirhandzela va swi kotile ku heta ntirho hi nkarhi lowu vekiweke? Ina, va swi kotile—hi masiku ya 55.

^ ndzim. 2 Muako wo tshama eka wona lowu nga le 90 Sands Street ku ta humiwa eka wona hi lembe ra 2017.

DYONDZA SWO TALA

Bethele I Yini?

Bethele i ndhawu yo hlawuleka leyi nga ni xikongomelo xa nkoka. Dyondza leswi engetelekeke malunghana ni lava tirhaka kona.