Seta screen reader

Hlawula ririmi

Yana enxaxamelweni wa vumbirhi

Nghena endzeni

Timbhoni Ta Yehovha

Xitsonga

Ku Thwasa Ka Ntlawa Wa Vu-133 Wa Xikolo Xa Bibele Xa Giliyadi Xa Watchtower

Mugqivela, September 8, 2012

Ku Thwasa Ka Ntlawa Wa Vu-133 Wa Xikolo Xa Bibele Xa Giliyadi Xa Watchtower

Endzhaku ka tin’hweti ta ntlhanu ta dyondzo leyi dzikeke, swichudeni swa 48 swi thwasile eXikolweni xa Bibele xa Giliyadi xa Watchtower entsindza wa dyondzo wa Timbhoni ta Yehovha ePatterson le New York. Nongonoko wa ku thwasa wu yingiseriwe hi swirho swa ndyangu, vanghana ni vanhu van’wana lava ringanaka 9 694.

Ku sukela hi 1943, vatirheli lava nga ni ntokoto lava tlulaka 8 000 va leteriwile ku ya endla ntirho wa vurhumiwa. Leswi khoso leyi yi tirhisaka Bibele swinene, yi tiyisa ripfumelo ra swichudeni ni ku swi pfuna ku va ni timfanelo ta matsalwa leti swi ti lavaka leswaku swi kota ku hlula mintlhontlho yo hambana-hambana ya ntirho wa vurhumiwa.

“Xiyisisa Hi Vukheta Swilo Leswi Rhandzekaka.” Anthony Morris, xirho xa Huvo leyi Fumaka ya Timbhoni ta Yehovha tlhelo mutshama-xitulu wa nongonoko lowu, u seketele nkulumo yakwe yo sungula eka Vafilipiya 4:8 leyi nge: “Swilo swin’wana ni swin’wana leswi rhandzekaka, . . . hambetani mi xiya swilo leswi.”

Makwerhu Morris u vule leswaku ku xiyisisa swilo leswi rhandzekaka swi nga hi pfuna ku va ni langutelo lerinene emisaveni leyi nga riki na rirhandzu. U te: “Tshama u xalamukele swilo leswi rhandzekaka naswona u rhandzeka.”

Hi xikombiso, Tata wa hina wa le tilweni u veka xikombiso lexinene hi ku nga languti swihoxo swa hina. (Pisalema 130:3) Makwerhu Morrisi u te: “U nga languti swihoxo swa vamakwenu naswona vana la rhandzekaka.”

“Kuma Vutivi, Kambe U Nga Vi La Tlhariheke Ku Tlula Mpimo.” Harold Corkern, xirho xa Komiti ya Rhavi ra United States, u tlhuvutse nhloko-mhaka yakwe leyi sekeriweke eka Eklesiasta 7:16. Xikwembu xi lava leswaku hi tirhisa vutivi hi ndlela leyinene naswona hi nga pfumeleli vutivi bya hina byi “hi endla hi tikukumuxa.”

Makwerhu Corkern u tlhele a vula leswaku hi fanele hi kombisa rirhandzu loko hi nyikela switsundzuxo ni ndzayo. Hi fanele hi fana ni Xikwembu lexi nga languteriki swilo leswikulu eka van’wana. Makwerhu Corkern u te: “Byi tirhise kahle vutlhari, vutivi ni ku twisisa ka wena kutani vamakwenu va ta swi tsakela ku va na wena.”

“U Nga Rivali Swiendlo Swa Xikwembu.” (Pisalema 78:7) Guy Pierce wa Huvo leyi Fumaka u sungule nkulumo yakwe hi ku hlamusela leswaku mahanyelo ya n’wana, ku nga khathariseki leswaku i manene kumbe ma bihile, ma kombetela eka vatswari. (Swivuriso 20:11) Hilaha ku fanaka, mahanyelo ya hina ma kombetela eka Tatana wa hina wa le tilweni. “Vana va Xikwembu ni vana va Diyavulosi va vonaka hi leswi: Mani na mani la nga hambetiki a famba hi ku lulama a nga humi eka Xikwembu, hambi ku ri loyi a nga rhandziki makwavo.”—1 Yohane 3:10.

Makwerhu Pierce u vule leswaku swichudeni swi rhambiwe ku ta nghena Xikolo xa Giliyadi hikwalaho ka timfanelo ta swona letinene ta Vukreste, ku katsa ni ku titsongahata. Dyondzo ya swona a yi swi endlaka swi va leswi tlakukeke eka van’wana. Ematshan’weni ya sweswo, sweswi se swi nga swi kota ku kondletela vun’we eka vumakwerhu bya misava hinkwayo ni ku veka xikombiso lexinene emhakeni yo titsongahata. (Pisalema 133:1) Makwerhu Pierce u te: “Sweswi mi le xiyin’weni lexinene xo dyondza leswi engetelekeke ni ku hambeta mi n’wi tiva ni ku n’wi twisisa kahle Yehovha Xikwembu.”

“Leswi Hi Nga Swi Endla Hi Leswi A Hi Fanele Ku Swi Endla.” William Samuelson, mulanguteri wa Ndzawulo ya Swikolo swa Vutirheli bya le Tilweni, u vutise a ku: “Hi fanele hi endla yini loko ku navela ka hina, ku rhandza ka hina ni mintlhaveko ya hina swi lwisana ni ntirho lowu hi nyikiweke wona?” Hi nga dyondza swo karhi eka marito lama nga eka Luka 17:7-10 lama nge: “Loko mi endle swilo hinkwaswo leswi mi averiweke swona, vulani mi ku, ‘Hi mahlonga lama nga pfuniki nchumu. Leswi hi nga swi endla hi leswi a hi fanele ku swi endla.’” Loko hi pimanisiwa ni N’wini wa hina Yehovha, hakunene hi “mahlonga lama nga pfuniki nchumu.”

Swichudeni swi hete mavhiki swi ri eku dyondzeni etlilasini. Sweswo ku nga ha va ku ve ntlhontlho eka swichudeni swin’wana. Makwerhu Samuelson u te: “Kambe mi endle leswi a mi fanele mi swi endla naswona sweswi mi nga vona ndlela leyi swi mi pfuneke ha yona ku tiyisa ripfumelo ra n’wina.” Makwerhu Samuelson u gimete hi ku vula a ku: “Tanihi valanguteri lava tshembiwaka, onge minkarhi hinkwayo mi nga tlangela lunghelo leri mi nga na rona ro tirhela N’wini wa vuako hinkwabyo.”

“Tsundzuka Xitiyisekiso Xa Yehovha Loko U Hlangavetana Ni Mintlhontlho.” Sam Roberson, mupfuni wa mulanguteri wa Ndzawulo ya Swikolo swa Vutirheli bya le Tilweni, u lemukise swichudeni leswaku minkarhi yin’wana swi ta hela matimba. Hikwalaho, u swi khutaze leswaku swi tsundzuka swikombiso swo tala swa le Bibeleni swa switiyisekiso swa Xikwembu. Hi xikombiso, Muxe u tiyisekise Yoxuwa a ku: “Yehovha . . . a nge ku tshiki kumbe a ku siya hilaha ku heleleke.” (Deteronoma 31:8) Swi fanerile leswi Yoxuwa a vuleke marito lawa loko a ri ekusuhi ni ku fa: “A ri wanga ni rito rin’we eka marito hinkwawo lamanene lawa Yehovha Xikwembu xa n’wina a ma vuleke.”—Yoxuwa 23:14.

Yehovha Xikwembu u tshembisa malandza yakwe a ku: “Ndzi nga ka ndzi nga ku tshiki naswona ndzi nga ka ndzi nga ku fularheli.” (Hebrews 13:5) Wa hi tiyisekisa leswaku u ta endla hi ku landza nhlamuselo ya vito rakwe leri nge Yehovha (“U Endla Leswaku Swi Va Kona”), naswona u ta va nchumu wun’wana ni wun’wana leswaku a khathalela malandza yakwe. Kutani Makwerhu Roberson u khutaze a ku: “Mi nga tshuki mi hela matimba. Mi nga tshuki mi lan’wa. Tsundzukani, a nge pfuki a mi hete matimba.”

“Mpfumawulo Wa Vona Wu Twakale eMisaveni Hinkwayo.” (Varhoma 10:18) Hi ku pfuniwa hi Mark Noumair, muleteri wa Xikolo xa Giliyadi, swichudeni leswi humaka ematikweni yo hambana-hambana swi hlamusele kumbe swi encenyeta mintokoto leyi swi yi kumeke entirhweni wo chumayela endhawini ya le Patterson. Hi xikombiso, mpatswa lowu humaka eAfrika Dzonga wu tsake ngopfu loko wu hlangana ni vavasati vanharhu lava humaka etikweni ra rikwavo ni ku vulavula na vona hi Xizulu ni Xixhosa. Kasi mpatswa lowu humaka eSri Lanka wu hlangane ni wanuna wa Muindia loyi nsati wakwe ni n’wana wa vona wa xinhwanyetana va tshamaka eSri Lanka. Wanuna yoloye a a nga si tshama a vona Bibele, kutani mpatswa lowu wu n’wi nyike Bibele yin’wana ya wona.

“Ku Hlomiseriwa Ku Endla Ntirho Wun’wana Ni Wun’wana Lowunene.” Gene Smalley, mupfuni wa Komiti ya Vutsari, u vulavurisane ni mimpatswa yimbirhi ya vamathwasana. Mimpatswa yoleyo leyi humaka eSierra Leone yi hlamusele leswaku a yi boheka ku ya rhwala mati siku ni siku leswaku yi ma tirhisa emakaya ya wona. Kambe mintlhontlho yoleyo a yi nga nyawuli loko yi pimanisiwa ni ntsako lowu a yi va na wona wo fambisa tidyondzo ta Bibele ta 50 ni vanhu lava tsakelaka. Hinkwavo ka vona va tlangele ndlela leyi khoso leyi yi va hlomiseleke ha yona ku endla ntirho wun’wana ni wun’wana lowu va nga averiwaka wona enkarhini lowu taka.—2 Timotiya 3:16, 17.

“Tiyisela Ku Fika eMakumu Ni Le Ndzhaku Ka Wona.” Gerrit Lösch, xirho xa Huvo leyi Fumaka, xi sungule nkulumo-nkulu hi ku hlamusela ndlela leyi switsutsumi swa mphikizano wo leha swinene swi tsutsumaka hi rivilo leritsongo ha yona leswaku swi kota ku wu heta hi ndlela leyinene. Hambileswi mphikizano wa swa mintlango ku vaka ni xitsutsumi xin’we ntsena lexi hlulaka, eka mphikizano wa Vakreste, hinkwavo lava tiyiselaka ku fika emakumu va hlula.

Ku tiyisela swi vula ku tirhela Xikwembu nkarhi hinkwawo, u nga lahli ntshembo loko u hlangavetana ni swihinga, nxaniso, miringo kumbe ku hela matimba. Yesu u te: “Loyi a tiyiselaka ku fika hi yena la nga ta ponisiwa.” (Matewu 24:13) Hakunene swa chavelela ku tiva leswaku Yehovha na Yesu va ku xiya ku tiyisela ka hina! Kutani Makwerhu Lösch u vule tinhla to hlayanyana leti nga hi pfunaka leswaku hi tiyisela ku nga khathariseki swiphiqo leswi hi nga hlangavetanaka na swona. Hi leti tin’wana ta tona:

  • Khongelani eka Xikwembu, “lexi nyikaka ku tiyisela” ni lexi “hi rhwalelaka mpingu wa hina siku ni siku.”—Varhoma 15:5; Pisalema 68:19.

  • Tiyimiseleni ku nga mi nga lan’wi hikuva ma swi tiva leswaku “Xikwembu xa tshembeka, a xi nge mi tshiki mi ringiwa hi ndlela leyi tlulaka leswi mi nga swi tiyiselaka, kambe loko mi ringiwa xi ta mi nyika ndlela yo huma leswaku mi kota ku swi tiyisela.”—1 Vakorinto 10:13.

  • Mi nga rivali ntshembo wa n’wina wa Vukreste. “Hikwalaho ka ntsako lowu a wu vekiwe emahlweni ka [Yesu] u tiyisele mhandzi ya nxaniso.”—Vaheveru 12:2.

Makwerhu Lösch u kandziyise leswaku sweswi a hi nkarhi wo hela matimba hikuva hi le kusuhi ni ku heta mphikizano. “A hi tsutsumeni hi ku tiyisela eka mphikizano lowu vekiweke emahlweni ka hina.”—Vaheveru 12:1.

Un’wana wa vamathwasana u gimete nongonoko lowu wo tsakisa hi ku hlaya papila leri humaka eka vamathwasana-kulobye leri phofulaka ku tlangela ka vona ndzetelo lowu vuyerisa lowu va wu kumeke. Epapileni va tsale leswaku dyondzo leyi dzikeke ya Bibele a yi va endlaka leswaku va twisisa swikongomelo swa Xikwembu ntsena, kambe yi tlhele yi tiyisa ripfumelo ra vona swinene. Va tlhele va tsala va ku: “Hi tiyimisele ku tirhisa swilo leswinene leswi hi swi dyondzeke.”