Nghena endzeni

Yana enxaxamelweni wa vumbirhi

Timbhoni Ta Yehovha

Xitsonga

Ku Thwasa Ka Ntlawa Wa Vu-135 Wa Xikolo Xa Bibele Xa Giliyadi Xa Watchtower

Ku Thwasa Ka Ntlawa Wa Vu-135 Wa Xikolo Xa Bibele Xa Giliyadi Xa Watchtower

Hi September 14, 2013, vanhu va 10 500 a va te eka nkhuvo wa ku thwasa ka ntlawa wa vu-135 wa Xikolo xa Bibele xa Giliyadi xa Watchtower entsindza wa dyondzo wa Timbhoni ta Yehovha ePatterson le New York. Xikolo lexi, xi letela malandza ya Yehovha lama nga ni ntokoto leswaku ma tirha hi ndlela leyi humelelaka swinene eswiavelweni swa wona.

Guy Pierce la nga xirho xa Huvo leyi Fumaka ya Timbhoni ta Yehovha, loyi a a ri mutshama-xitulu eka nongonoko lowu, u sungule hi xingheniso lexi a xi sekeriwe eka Matewu 28:19, 20, leyi nge: “Hikokwalaho fambani mi ya endla vanhu va matiko hinkwawo va va vadyondzisiwa, . . . mi va dyondzisa ku hlayisa swilo hinkwaswo leswi ndzi mi leriseke swona.”

Makwerhu Pierce u vule leswaku marito wolowo ya Yesu ma ha tirha ni le nkarhini wa hina. Loko hi ri karhi hi endla vanhu leswaku va va vadyondzisiwa, hi va dyondzisa leswaku va endla hinkwaswo leswi Yesu a swi leriseke. Leswi swi katsa xileriso xakwe xa ku chumayela “mahungu lamanene lawa ya mfumo.” (Matewu 24:14) Hi ndlela leyi, mudyondzisiwa lontshwa u va muchumayeri ni ku va mudyondzisi wa Mfumo. Xana leswi swi va ni vuyelo byihi? Makwerhu Pierce u te: “Nhlayo ya Timbhoni ta Yehovha yi ya yi andza.”

“Va Nyikele Hi Leswi A Swi Ri Ehenhla Ka Vuswikoti Bya Vona Bya Xiviri.” Thomas Cheiky, xirho xa Komiti ya Rhavi ra le United States, u vulavule hi nhloko-mhaka leyi a yi sekeriwe eka 2 Vakorinto 8:1-4. Ku nga khathariseki ndlela leyi a va ri evusiwaneni lebyikulu ha yona, vamakwerhu va le Makedoniya va kombele ku pfuna vamakwerhu va le Yerusalema lava a va pfumala. Swichudeni swa le Giliyadi swi kombise ndlela leyi fanaka yo hanana ni ya ku tinyiketela.

Hilaha ku fanaka, vamakwerhu va le Makedoniya a va tirhisa vutlhari loko va nyika, ku endlela leswaku mindyangu ya vona yi nga sali yi hlupheka kumbe va sala va nga ha swi koti ku nyikela eka Xikwembu. Makwerhu Cheiky u khutaze swichudeni leswaku swi tekelela vamakwerhu va le Makedoniya hi ku ringanisela eka ndlela leyi swi hananaka ha yona.

“Xikolo Xi Fike Emakumu.” Samuel Herd la nga xirho xa Huvo leyi Fumaka, u kandziyise xivangelo xa leswaku swichudeni swi fanele swi tsundzuka dyondzo leyi swi yi kumeke eXikolweni xa Giliyadi. Ku fana ni miloti yo tsakisa leyi twalaka nimixo ivi yi tshama emianakanyweni ya munhu siku hinkwaro, loko swichudeni swi hambeta swi ehleketisisa hi dyondzo yo hlawuleka ya le Giliyadi yi nga swi pfuna leswaku swi yima swi tiyile.

Makwerhu Herd u tsundzuxe swichudeni leswaku miehleketo ya Xikwembu a yi pimeki. Tinyeleti ta ntsandza-vahlayi leti nga evuakweni hinkwabyo Xikwembu xi ti thye mavito naswona ku hava na yin’we leyi xi nga yi rivalaka. (Pisalema 147:4) Ku tlula kwalaho, a xi nge ma rivali matshalatshala lawa swichudeni swi ma endleke leswaku swi kuma dyondzo ya le Giliyadi! Swi tihlayisele “xuma etilweni” naswona ku hava loyi a nga tekelaka swichudeni sweswo dyondzo leyi Yehovha a swi dyondziseke yona.—Matewu 6:20.

Tanihi leswi Xikwembu xi tsundzukaka rirhandzu leri swichudeni swi ri kombisaka eka xona ni mintirho leyi swi yi endlaka, i swa nkoka leswaku swi tlangela dyondzo leyi swi yi kumeke eGiliyadi. Makwerhu Herd u te: “Loko dyondzo leyi u yi kumeke exikolweni lexi yi ku endla u va ni ntsako siku hinkwaro, u nga rivali ku khensa Yehovha. Minkarhi hinkwayo u ta vuyeriwa loko u hambeta u tsundzuka leswi u swi dyondzeke.”

“Tshemba Matimba Lamakulu Ya Yehovha.” Sam Roberson, muleteri wa xikolo xa Giliyadi u khutaze swichudeni leswaku swi tshemba matimba ya Yehovha loko swi langutane ni swiphiqo ematshan’weni yo va swi titshemba. Vaefesa 3:20 yi kombisa leswaku Xikwembu xi nga “endla swo tala swinene ku tlula leswi hi swi kombelaka kumbe leswi hi swi ehleketaka.” Matimba ya xona i makulu ku tlula ya hina lerova ni marito lama nge, ‘xi endla swo tala swinene ku tlula leswi hi swi ehleketaka’ a ma swi koti ku hlamusela matimba ya xona hi ku helela hikuva ndzimana leyi yi vula leswaku xi nga endla swo “tala” ku tlula sweswo.

Yehovha u nyika Mukreste un’wana ni un’wana matimba yakwe lamakulu. Yehovha u ni “matimba lamakulu” kumbe u fana ni “Nhenha ya matimba” leyi kutsulaka vanhu lava nga emaxangwini. (Yeremiya 20:11; Bibele—Mahungu Lamanene) Makwerhu Roberson u tsundzuxe swichudeni leswaku Yehovha u ta swi pfuna ku langutana ni swiphiqo hinkwaswo kumbe maxangu.

“Hlayisa Xindzhuti Xa Wena Entirhweni Wa Mfumo.” William Samuelson la nga muleteri wa xikolo xa Giliyadi, u hlamusele leswaku swichudeni swi kume xindzhuti entirhweni wa Mfumo hi tindlela timbirhi. Yo sungula, hi ku xiximiwa hikwalaho ka ntirho wa swona lowu swi wu endlaka ni lowu a swi wu endla etlilasini. Ya vumbirhi, swi hambeta swi xiximeka hi ku yimela hulumendhe leyi tlakukeke evuakweni hinkwabyo ku nga Mfumo wa Xikwembu.

Swichudeni swi nga xi hlayisa njhani xindzhuti xa swona? Makwerhu Samuelson u khutaze swichudeni leswaku swi yisa ku dzuneka eka Yehovha ni ku xixima van’wana hilaha Yesu a xiximeke lava a va ri na yena, hambi loko a fanele ku va lulamisa kumbe ku va nyika ndzayo. Vuyelo byi ta va byihi? Ku fana ni muapostola Pawulo, swichudeni swi ta kurisa xindzhuti xa swona ni ku vangamisa ntirho wa swona ematshan’weni yo ti vangamisa.—Varhoma 11:13.

“Matimba Ya Tihanci Ma Le Milon’wini . . . Ya Tona.” Michael Burnett un’wana wa muleteri wa xikolo xa Giliyadi, u kombise ndlela leyi hi tirhaka ha yona tanihi leyi fambisanaka ni ku hetiseka ka Nhlavutelo 9:19 hi ku tirhisa leswi hi swi dyondzeke eminhlanganweni ya Vukreste leswaku hi vulavula ni van’wana handle ko chava loko hi va chumayela. U burisane ni swichudeni leswi a swi hlamusela mintokoto leyi swi yi kumeke ensin’wini loko swa ha ri exikolweni xa Giliyadi. Hi xikombiso, xichudeni xin’wana xi endle leswaku mutirhi wa le garaji yo chela petirolo a va ni ku tsakela hi ku n’wi vutisa xivutiso lexi nge, “Xana nkarhi lowu vekiweke wa matiko wu sungule ni ku hela rini?” (Luka 21:24) U tlhele a endzela mutirhi yoloye ku ya hlamula xivutiso xexo hi ku tirhisa Bibele eka Daniyele ndzima 4, a tlhela a tirhisa xiengetelo xa buku leyi nge, Xana Bibele Yi Dyondzisa Yini Hakunene?

“Timbilu Ta Vona Ti Tiyisiwile.” Adrian Fernandez, xirho xa Komiti ya Rhavi ra le United States u burisane ni mimpatswa yimbirhi leyi thwasaka. Makwerhu Helge Schumi u vule leswaku Bibele yi vulavula hi malandza man’wana ya Xikwembu lawa nkarhi wun’wana ma tikukumuxeke endzhaku ka loko ma kume malunghelo yo hlawuleka, exikolweni xa Giliyadi ku vulavuriwe ngopfu hi mhaka ya ku titsongahata minkarhi hinkwayo. (2 Tikronika 26:16) Hilaha ku fanaka, Makwerhu Peter Canning u tsundzuke xitsundzuxo xa vutlhari lexi a xi kumeke exikolweni xa Giliyadi malunghana ni ku dyondza ririmi rin’wana, u te: “U nga tikukumuxi. U nga vileli hambi wo hlekiwa.” Swichudeni hinkwaswo swa mune swi kombise ku tlangela ndlela leyi ndzetelo lowu wu swi nyikeke matimba ha yona leswaku swi lunghekela ntirho wa swona ni ku tlhela swi tiyisiwa timbilu.—Vaheveru 13:9.

“Tsakisisani Leswi Mavito Ya N’wina Ma Tsariweke eTilweni.” (Luka 10:20) Geoffrey Jackson la nga xirho xa Huvo leyi Fumaka, u nyikele nkulumo-nkulu. Mathwasana ya manguva lawa a ma nge fani ni lawa ya khale, hikuva yo tala ya wona a ma nge kumi swiavelo swo ya ematikweni man’wana kumbe ma tiphina hi mintokoto yo chumayela ensin’wini leyi nga riki na Timbhoni. Xana ma fanele ma titwa njhani hi swiavelo swa wona?

Loko vadyondzisiwa va 70 lava Yesu a a va rhumile va vuya eka tsima ra vona ro chumayela, va vuye ni mahungu yo tsakisaka ya leswaku va hlongole madimona hi vito rakwe. (Luka 10:1, 17) Yesu u pfumerile leswaku mahungu wolawo a ma tsakisa hakunene, kambe u te: “Nilokoswiritano, swi nga tshuki swi mi tsakisa leswi, leswaku mimoya ya titsongahata eka n’wina, kambe tsakisisani hileswaku mavito ya n’wina ma tsariwile etilweni.” (Luka 10:20) A a hlamusela leswaku a hi nkarhi hinkwawo va nga ta kuma vuyelo byo tano lebyi tsakisaka. A va fanele va tsakisiwa hi ku tshembeka ka vona eka Yehovha ni hi ku va mavito ya vona “ma tsariwile etilweni” ku nga ri hi mintokoto leyi va yi kumaka entirhweni wo chumayela.

Makwerhu Jackson u te: “Leswi Yesu a swi dyondziseke vadyondzisiwa vakwe va 70 swa ha tirha ni le ka hina.” Ntsako ni ku tshembeka ka hina a swi fanelanga swi titshega hi mintokoto leyi hi yi kumaka ensin’wini. Ematshan’weni ya sweswo, ntsako ni ku tshembeka ka hina hi swi kuma hi ku va hi hlayisa vuxaka bya hina na Yehovha ni ku hisekela ntirho wakwe.

Yesu na yena u langutane ni swiyimo leswi a swi ta n’wi heta matimba. Hi xikombiso, endzhaku ka loko a phamele vanhu va magidi hi singita, va sungule ku n’wi landzela. (Yohane 6:10-14, 22-24) Kambe swi nga si ya kule, vo tala va vona va khunguvanyisiwe hi leswi Yesu a a swi dyondzisa, lerova va tshike ku n’wi landzela. (Yohane 6:48-56, 60, 61, 66) Ku hambana ni sweswo, vaapostola va hambete va landzela Yesu. Va veke xikombiso lexinene hi ku dzikisa mianakanyo ya vona eka ku tshembeka ni le ka vuxaka bya vona na Yehovha kambe ku nga ri eka vuyelo lebyi a va byi kuma.—Yohane 6:67-69.

Mahetelelo. Endzhaku ka loko swichudeni swi nyikiwe tidiploma, xichudeni xin’wana xi hlaye papila ro kombisa ku tlangela. Makwerhu Pierce u hetelele hi ku vula leswaku vanhu va Xikwembu ku katsa ni mathwasana ya Giliyadi, a va fanelanga va titeka va ri vanhu lava hlawulekeke ngopfu. (Mintirho 4:13; 1 Vakorinto 1:27-31) Yehovha wa ku amukela ku tinyiketela ka hina naswona u hi nyika moya wakwe lowo kwetsima. Kambe a nga tsakisiwi hi vutivi lebyi hi nga na byona, makwerhu Pierce u te: “Yehovha u tsakisiwa hi ku tshembeka ni ku tinyiketela ka hina eka yena.”

 

DYONDZA SWO TALA

DOCUMENTARIES

Ku Ya Fika eMakumu Ka Misava

Xikolo xa Bibele xa Giliyadi xa Watchtower xi dyondzisa ndlela leyi ntirho wo chumayela wu nga wa nkoka ha yona. Vuyeriwa eka mintokoto ya varhumiwa lava yeke exikolweni lexi xo hlawuleka.