Nghena endzeni

Yana enxaxamelweni wa vumbirhi

Timbhoni Ta Yehovha

Xitsonga

JW.ORG Yi Pfuna Vanhu Leswaku Va Antswisa Vutomi Bya Vona

JW.ORG Yi Pfuna Vanhu Leswaku Va Antswisa Vutomi Bya Vona

Etindhawini hinkwato vanhu va vuyeriwa hi ku tirhisa jw.org. Twana man’wana ya marito yo khensa lawa vanhu va ma rhumeleke eNtsindza wa misava hinkwayo wa Timbhoni ta Yehovha ku sukela hi May 2014.

Vana

“Minkarhi yo tala, n’wana wa mina loko a vuya ekhirexe, a a vuya ni swilo swa vanghana vakwe swo tanihi tipensele, tithoyi ni manghilazi yo sirhelela dyambu. Hi ringete ko tala ku n’wi pfuna a xiya leswaku leswi a swi endlaka i ku yiva naswona ku yiva swi bihile. Matshalatshala ya hina a ma tirhanga ku fikela laha hi nga kopa vhidiyo leyi nge Ku Yiva Swi Bihile eka jw.org. Vhidiyo leyi yi hi pfunile swinene yi tlhela yi pfuna xifanyetana xa hina. Loko hi heta ku yi hlalela, xi vule leswaku xi lava ku tlherisela vanghana va xona swilo swa vona tanihi leswi sweswi xi swi tivaka leswaku Xikwembu xa swi venga ku yiva. Hakunene, website leyi yi hi pfunile!”—D. N, Afrika.

“Vhidiyo leyi nge Ku Yiva Swi Bihile leyi nga eka jw.org . . . yi hi pfunile swinene yi tlhela yi pfuna xifanyetana xa hina”

“Vana va mina va yi rhandza website leyi. Va kopa tivhidiyo to koma ta tipopayi leti va pfunaka ku tirhisa milawu ya Bibele emhakeni ya ku hemba ni ku yiva. Va tlhela va dyondza timfanelo tin’wana leti va nga ti tirhisaka evuton’wini bya vona, leswi va endlaka va va vanhu lavanene.”—O. W, West Indies.

Lava Nghenaka Xikolo

“A ndzi teka ku nghena xikolo ku ri ndzhwalo naswona a ndzi ehleketa hi ku xi tshika. Siku rin’wana, ndzi hlaye xihloko lexi nge ‘Xana Ndzi Fanele Ndzi Tshika Xikolo?’ eka website ya jw.org. Xi ndzi pfune ku va ni langutelo lerinene hi xikolo. Eka xihloko xolexo, ndzi xiye leswaku ku nghena xikolo swi ta ndzi letela ku va ni vumundzuku lebyinene ni ku ndzi pfuna ku va ni vutihlamuleri.”—N. F, Afrika.

“Switsundzuxo leswi tirhaka eka vantshwa leswi nga eka website leyi swi ndzi dyondzise ndlela ya ku va ni mahanyelo lamanene exikolweni”

“Switsundzuxo leswi tirhaka eka vantshwa leswi nga eka website leyi swi ndzi dyondzise ndlela ya ku va ni mahanyelo lamanene exikolweni. Ndzi dyondze ndlela ya ku tinyiketela eka tidyondzo ta mina ni ku papalata swilo leswi nga ndzi kavanyetaka.”—G, Africa.

“Mutirhikulobye a a vilela hi n’wana wakwe wa nhwanyana loyi a a xanisiwa hi nhwanyana un’wana exikolweni. Leswi swi endle leswaku a nga ha yi exikolweni masiku yo hlayanyana hileswi a a chava ku xanisiwa. Ndzi bule ni mutirhikulobye hi swiringanyeto swin’wana leswi kumekaka eka vhidiyo ya tipopayi leyi nge Hlula Munhu Wa Tinyimpi U Nga Kalanga U Lwa Na Yena leyi kumekaka eka jw.org. U tsakisiwe ngopfu hi xiringanyeto xo kombisa moya wo rhula ku hlula munhu loyi a xanisaka van’wana. U vulavule ni n’wana wakwe hi leswi a nga swi endlaka loko a hlangana ni munhu loyi a n’wi xanisaka. Eku heteleleni, nhwanyana loyi u titwe a ntshunxekile loko a ri exikolweni. Hi ku famba ka nkarhi, xiyimo xi cincile naswona nhwanyana loyi a a n’wi xanisa u ve munhu la rhuleke.”—V. K, Yuropa Vuxa.

Vantshwa

“Ndzi khensa swinene xihloko lexi nge ‘Ha Yini Ndzi Tixekelela?’ lexi nga eka website. Lexi i xiphiqo lexi ndzi karhateke nkarhi wo leha. A ndzi ehleketa leswaku ko va mina ntsena ndzi nga na xona nileswaku loko ndzo byela van’wana a va nga ta ndzi twisisa. Swikombiso leswi nga eka xihloko lexi swi ndzi pfunile. Eku heteleleni, ndzi kume leswaku u kona munhu loyi a ndzi twisisaka!”—Nhwanyana un’wana wa le Australia.

“Swikombiso leswi nga eka xihloko lexi swi ndzi pfunile. Eku heteleleni, ndzi kume leswaku u kona munhu loyi a ndzi twisisaka!”

“Website ya jw.org yi endle leswaku swi ndzi olovela ku kuma mpfuno eka swiphiqo leswi vantshwa va langutanaka na swona. Xihloko xin’wana xi ndzi pfune ku xiya tindlela ta ku xanisiwa hi timhaka ta masangu, ku vona leswaku a ndzi xanisiwa naswona ndzi dyondze tindlela letinene to langutana na kona.”—T. W, West Indies.

Vatswari

“N’wana wa mina wa mufana a a nga tshamiseki. Matikhomelo yakwe a ma ndzi karhata. Sweswo swi endle leswaku hi nga ha vulavurisani kahle. Siku rin’wana, ndzi nghene eka jw.org kutani ndzi hlawula xiyenge lexi nge mimpatswa ni vatswari. Ndzi kume swihloko swo tala leswi fambisanaka ni xiyimo lexi a ndzi ri eka xona naswona swi ndzi dyondzise ndlela leyinene yo vulavurisana ni n’wana wa mina wa mufana. Na yena yi n’wi pfunile website leyi. Sweswi u vulavula na mina xin’wana ni xin’wana.”—C. B, Afrika.

“Minkarhi yo tala eka jw.org ku humelela xihloko hi nkarhi lowunene leswaku xi hi pfuna ku langutana ni xiphiqo lexi vana va hina va langutanaka na xona”

“Tanihi vatswari, jw.org yi hi pfuna ku dyondzisa vana va hina. Hi xikombiso, vhidiyo ya tipopayi leyi kombisaka ndlela yo kuma munghana wa xiviri yi pfune vana va hina ku va ni langutelo lerinene hi ku va ni vanghana lavanene. Minkarhi yo tala eka jw.org ku humelela xihloko hi nkarhi lowunene leswaku xi hi pfuna ku langutana ni xiphiqo lexi vana va hina va langutanaka na xona. Yi ni switsundzuxo leswi tirhaka.”—E. L, Yuropa.

Vatekani

“Hi ni malembe ya tsevu hi tekanile ni nsati wa mina. Ku fana ni vatekani van’wana ni van’wana, hi langutane ni ntlhontlho wo twisisa tindlela leti hambaneke to vulavurisana, tindlela leti hi kurisiweke hi tona ni ku endla leswaku mavonelo ya hina ya swilo ma pfumelelana. Xihloko lexi nga eka jw.org lexi nge ‘Ku Yingisela Hi Ndlela Leyinene’ xi ndzi pfunile. Xi kombisa ndlela leyinene yo antswisa emhakeni ya ku yingisela. Ndzi xi hlayile kutani ndzi burisana ni nkatanga hileswi ndzi swi kumeke. Hi ringete ku tirhisa swiringanyeto leswi tirhaka leswi nga exihlokweni lexi.”—B. B, West Indies.

“Hakunene website leyi, yi sirhelele vukati bya hina”

“Se swi endla lembe ndzi ri karhi ndzi tihlanganisa ni Timbhoni ta Yehovha naswona ndzi ti khensa swinene hikwalaho ka website ya tona ya jw.org. Ndzi dyondze swilo swo tala eka website leyi, leswi katsaka ndlela leyi ndzi nga lawulaka ha yona ku hlundzuka ka mina ni ndlela ya ku va nuna tlhelo tatana lonene. Hakunene website leyi, yi sirhelele vukati bya hina.”—L. G, West Indies.

Lava Feke Tindleve

“Website ya jw.org yi ndzi pfune leswaku ndzi titwa ndzi ri wa nkoka. Ndzi kote ku antswisa ririmi ra mina ra mavoko hikwalaho ko hlalela tivhidiyo ta Ririmi ra Mavoko ra le Amerika. A ndzi tshamela ku titwa onge a ndzi nge swi koti ku tivekela tipakani letinene kambe loko ndzi hlalele vhidiyo leyi nge Ku Vona Rito Ra Xikwembu Hi Ririmi Ra Mina, yi ndzi khumbe mbilu ni ku ndzi tiyisa leswaku ndzi tiyiseka hi swilo swa nkoka evuton’wini.”—J. N, Afrika.

“Website ya jw.org yi ndzi pfune leswaku ndzi titwa ndzi ri wa nkoka”

“Hakunene website leyi i ya risima. Ndzi tirha hi ku tirhandzela ku pfuna vanhu lava feke tindleve ngopfungopfu vantshwa. Tivhidiyo to hambanahambana ta ririmi ra mavoko ti ndzi pfune leswaku ndzi antswisa ririmi ra mina ra mavoko. Website leyi yi ndzi pfune leswaku ndzi kota ku pfuna lava lavaka ku antswisa vutomi bya mindyangu ya vona ni vunghana bya vona.”—K. J, West Indies.

Lava Nga Voniki

“Website ya jw.org yi ndzi pfune swinene hambileswi ndzi nga voniki. Rungula leri ndzi ri kumaka eka yona a ri ta teka tin’hweti to hlaya ku va ndzi ri kuma hi poso. Website leyi yi pfune ndyangu wa mina yi tlhela yi ndzi pfuna ndzi titwa ndzi ri wa nkoka endhawini leyi ndzi tshamaka eka yona. Ndzi tlhela ndzi kuma rungula eka yona hi nkarhi wun’we ni lowu vanghana va mina lava vonaka va ri kumaka ha wona.”—C. A, Amerika Dzonga.

“Website leyi yi pfune ndyangu wa mina yi tlhela yi ndzi pfuna ndzi titwa ndzi ri wa nkoka endhawini leyi ndzi tshamaka eka yona”

“Lava nga swi kotiki ku hlaya hi minkandziyiso ya Braille kumbe lava nga riki na yona mali yo xava tibuku ta Braille, jw.org i xitirhisiwa xa risima eka vona. Website leyi yi ni rungula leri rhekhodiweke leri ngo yingiseriwa kunene kutani lava nga voniki va nga swi kota ku yingisela rungula ra sweswinyana ra tinhlokomhaka to hambanahambana. Yi endleriwe vanhu hinkwavo. Yi pfuna vanhu vo fana na mina leswaku va titwa va xiximiwa ni ku tekiwa va ri va nkoka.”—R. D, Afrika.

Lava Lavaka Ku Tiva Xikwembu

“Website ya n’wina yi hambanile ni ti-website tin’wana ta vukhongeri hikuva a yi tirhisi swiga swa vukhongeri ni marito lama nga twisisiwaka hi vafundhisi ntsena. Naswona a yi na rungula ro tala lerova swi tika ku ri twisisa. Yi olovile yi tlhela yi kongoma. A yi na marito yo leha kumbe filosofi. A yi endli leswaku ripfumelo ri vonaka ku ri nchumu lowu tikaka ku va na wona. Hambiswiritano, yi kombisa leswaku munhu un’wana ni un’wana a nga swi kota ku va ni ripfumelo.”—A. G, Asia.

“Yi olovile yi tlhela yi kongoma . . . Yi kombisa leswaku munhu un’wana ni un’wana a nga swi kota ku va ni ripfumelo”

“Ndzi ni vutomi lebyi tsakisaka hikwalaho ka jw.org. Emisaveni leyi nga tiviki nchumu hi Xikwembu, website leyi i xitirhisiwa lexi pfunaka ngopfu. Hi ku hatlisa, ndzi nga hlalela ni ku yingisela swihloko leswi hlamuselaka langutelo ra Xikwembu etimhakeni to karhi ni ku kuma tinhlamulo ta swivutiso swa nkoka evuton’wini.”—J. C, West Indies.

“Ndza khensa hikwalaho ka website leyi hikuva yi ndzi pfune ndzi tiva rito ra Xikwembu hambileswi ndzi tshamaka exikarhi ka makhwati ya Amerika Dzonga. Loko a ku nga ri website leyi, a ndzi ta va ndzi nga tivi nchumu.”—M. F, Amerika Dzonga.

DYONDZA SWO TALA

I VAMANI LAVA ENDLAKA KU RHANDZA KA YEHOVHA NAMUNTLHA?

I Yini Leswi Kumekaka Eka Web Site Ya Hina?

U nga dyondza leswi engetelekeke hi hina ni tidyondzo leti hi ti pfumelaka swin’we ni ku kuma tinhlamulo ta swivutiso swa wena swa Bibele.

XIHONDZO XO RINDZA

Xana Swa Koteka Ku Twisisa Bibele?

Yehovha Xikwembu u lava leswaku u tiva ntiyiso. U ta ku pfuna leswaku u twisisa Matsalwa.