Hi Sonto, January 5, 2014, Serge Gerardin a a ri endleleni yo ya enhlengeletanweni ya Timbhoni ta Yehovha hi bazi ekusuhi ni le Paris, eFurwa, loko a vona mhangu yo chavisa swinene. U ri: “Movha wun’wana wu chayise khumbi leri sirhelelaka buloho, hi loko wu haha wu ya chayisa buloho ivi wu wa mavhilwa ya wona ma languta ehenhla kutani wu sungula ku pfurha.”

Serge u ni malembe yo tlula 40 a ri karhi a tirha ku timela ndzilo. Tanihi leswi a rhangelaka ntlawa wo timela ndzilo, u hatle a teka goza. U ri: “Hambileswi a hi famba eka tlhelo rin’wana ra gondzo lerikulu, ndzi kombele muchayeri wa bazi leswaku a yima kutani ndzi tsutsumela laha movha a wu tshwa kona.” Serge u twe ku kalakala, “Ndzi pfuneni! Ndzi pfuneni!” U ri: “A ndzi ambale sudu na thayi naswona a ndzi nga ri na swona swiambalo swa vuhlayiseki. Ku kalakala ka vanhu volavo ku ndzi endle ndzi swi vona leswaku swi nga koteka leswaku va ponisiwa!”

Loko Serge a ri karhi a rhendzeleka hi movha wolowo, u hlanganisiwe hi mukhandziyi loyi a pfilunganyekile kutani a n’wi yisa endhawini leyi hlayisekeke. Serge u ri: “U ndzi byele leswaku ka ha ri ni vanhu van’wana vambirhi endzeni ka movha. Kambe hi nkarhi wolowo se a ku ri ni timovha to hlayanyana leti a ti yimile. Kambe vanhu a va nga swi koti ku tshinela hikwalaho ka ku hisa ni malangavi.”

Vachayeri vo hlayanyana va tilori va te ni swo timela ndzilo. Va ye eka tlhelo leri Serge a a yime eka rona, kutani va wu timela swa xinkarhana. Kambe muchayeri a a manyekile ehansi ka movha. Kutani Serge ni vanhu van’wana lava a va yimile va tlakule movha ivi va humesa muchayeri va n’wi yisa endhawini leyi hlayisekeke.

Serge u ri: “Hi nkarhi wolowo, ndzilo wu tlhele wu sungula ku pfurha hi matimba!” Kambe mukhandziyi un’wana a a ri karhi a lengalenga exitulwini hikwalaho ka leswi a tibohe hi bandhi. Kutani ku fike mutirhi un’wana loyi a tirhaka ku timela ndzilo loyi na yena a a nga ri entirhweni, a ambale swiambalo swa vachayeri va swithuthuthu. Serge u ri: “Ndzi n’wi byele leswaku swi nga endleka movha lowu wu ri ekusuhi ni ku buluka kutani hi koke wanuna yoloye.” Ku nga si hela ni minete, movha wu bulukile.

Loko mintlawa yo timela ndzilo ni ya swilamulelamhangu yi fika, yi tshungule vanhu lava weriweke hi mhangu kutani yi timela ni ndzilo. Serge u kume vutshunguri hikwalaho ka leswi mavoko yakwe a ma vavisekile ni ku tshwa. Loko a ya khandziya bazi leyi a fambaka hi yona, vavanuna vo hlayanyana va tsutsumele eka yena kutani va n’wi nkhensa.

Serge u tsakile hikwalaho ka leswi a koteke ku pfuna. U ri: “Ndzi vone onge Yehovha Xikwembu xa mina u ndzi nyike vutihlamuleri byo va ponisa. Leswi endlaka leswaku ndzi tsaka hileswaku ndzi kote ku pfuna vanhu volavo.”