Seta screen reader

Hlawula ririmi

Yana enxaxamelweni wa vumbirhi

Nghena endzeni

Timbhoni Ta Yehovha

Xitsonga

Nchumu Lowuntshwa eManhattan

Nchumu Lowuntshwa eManhattan

Hi November 2011, ntlawa wa Timbhoni ta Yehovha wu sungule tsima lerintshwa ro pfuna vanhu va le Manhattan leswaku va twa rungula ra Bibele hi ku tirhisa matafula ni swigolonyana swo saseka leswi navetisaka minkandziyiso. Tsima leri ri endliwa exiphen’wini xa le dzongeni wa Manhattan, ku nga xidorobana xa khale ni lexi nga ni mphensamphesa swinene eNew York City.

Timbhoni ti ave xidorobana lexi hi swiyenge swa mune. Xiyenge ha xin’we xi ni tindhawu to hlayanyana leti vahundzi va ndlela va nga yimaka eka matafula kumbe swigolanyana leswi nga ni minkandziyiso ya Bibele ivi ti va pfuna. Swo tala swa swona swi nga ha kumeka endzeni kumbe ekusuhin ni switichi swa vutleketli bya mani na mani, laha vanhu va makume ya magidi va hundzaka kona siku ni siku.

Ematafuleni wolawo, vanhu va nga kuma tinhlamulo leti humaka eBibeleni ta swivutiso swo tala. Vanhu lava nga riki na nkarhi wo yima, va nga teka nkandziyiso ivi va wu hlaya endzhaku ka nkarhi.

Minkandziyiso yi kumeka hi tindzimi to hlayanayana. Loko nkandziyiso wo karhi wu nga ri kona hi ririmi leri laviwaka, wu nga ha odiwa ivi wu landziwa endzhaku ka masiku ma nga ri mangani.

Vanhu swin’we ni vatirhela-mfumo va ri amukele hi mandla mambirhi tsima leri. Phorisa rin’wana ri te: “Ha yini mi teke nkarhi wo leha ku ta laha? Hakunene mi khome rungula leri hi ri lavaka.

Wanuna un’wana u nambe a yima loko a vona buku leyi nge Xana Bibele Yi Dyondzisa Yini Hakunene? U vule leswaku u vone vanhu exitichini xa xitimela va ri eku yi hlayeni hiloko a tivutisa leswaku va yi kume kwihi. Sweswi se wa swi tiva.

Siku ni siku jaha rin’wana a ri hundza rin’wana ra matafula lawa ku ringana mavhiki ya tsevu loko ri ya entirhweni. Eku heteleleni, ri yimile ivi ri ku, “Ndzi kombela mpfuno.” Lava yimaka ematafuleni lawa va ri pfunile hi ntsako. Va ri nyike Bibele ni ku ri komba ndlela leyi yi nga ri pfunaka ha yona.

Vahundzi va ndlela lava tsakelaka va yima leswaku va vulavula hi timhaka ta Bibele. En’hwetini yin’wana ya ha ku hundzaka, vanhu va tikumele timagazini ta 3 797 ni tibuku ta 7 986 eka tsima leri ra le Manhattan.