Seta screen reader

Hlawula ririmi

Yana enxaxamelweni wa vumbirhi

Nghena endzeni

Timbhoni Ta Yehovha

Xitsonga

Ha Yini Hi Dyondza Xibengali?

Ha Yini Hi Dyondza Xibengali?

Sweswinyana Timbhoni ta Yehovha ta 23 eQueens le New York, ti dyondze ku vulavula ni ku hlaya Xibengali ku nga ririmi leri vulavuriwaka eBangladesh ni le swiphen’wini swa India. Ti dyondzisiwe eka tlilasi leyi ku dyondziwaka ririmi hi xihatla hi Timbhoni-kulobye.

Tlilasi yo dyondza Xibengali a ku ri yin’wana ya titlilasi leti khomiweke eUnited States ni le matikweni man’wana. Xikongomelo xo hlanganyela eka titlilasi to tano, i ku dyondza ku bula hi rungula ra Bibele ni vanhu lava vulavulaka tindzimi tin’wana.

Magaly xichudeni xa le tlilasini ya Xibengali u ri: “Nhlayo ya vanhu lava vulavulaka Xibengali endhawini ya ka hina, yi andza hi ku hatlisa. Vanhu va lava tinhlamulo ta swivutiso swa nkoka swo tanihi lexi nge, Ha yini ku ri ni ku xaniseka swonghasi? Loko ndzi byela vanhu hi switshembiso swa Xikwembu leswi tsakisaka hi vumundzuku, va lava ku tiva leswi engetelekeke. Kambe ririmi hi rona ri nga xiphiqo minkarhi hinkwayo.”

Ku pfuna swichudeni leswaku swi dyondza ririmi hi ku hatlisa hilaha swi nga kotaka ha kona, vadyondzisi a va tirhisa tindlela to dyondzisa leti tsakisaka. Ndlela yin’wana a yi katsa ku dyondza u ri karhi u tshukatshukisa miri leswaku u nga rivali hi ku olova.

Endzhaku ka dyondzo yin’wana ni yin’wana, swichudeni a swi namba swi tirhisa leswi swi dyondzeke, swi endzela vanhu lava vulavulaka Xibengali laha va tshamaka kona ni ku va rhamba leswaku swi ta bula na vona hi Bibele. Magaly u te: “Vanhu va tsaka ni swikunwana naswona va lava ku tiva leswaku ha yini ndzi dyondza ririmi ra vona. Leswi swi ndzi tekeleke nkarhi leswaku ndzi ri dyondza swi va pfunile ku vona nkoka wa rungula ra hina.”

Timbhoni ta Yehovha ti dyondza tindzimi timbe ti tlhela ti kuma ndzetelo wa ku dyondzisa eka titlilasi to dyondza ririmi. Exikarhi ka January 2006 na January 2012, ensin’wini ya rhavi ra le United States ntsena, ku ve ni titlilasi ta kwalomu ka 38 to dyondza ririmi leti ku leteriweke vadyondzisi va 2 244. Hi September 1, 2012, ku ve ni titlilasi to tlula 1 500 leti a ku dyondzisiwa tindzimi ta 37 naswona a ti kongomisiwa hi Timbhoni ta Yehovha ensin’wini ya rhavi ra le United States.