Seta screen reader

Hlawula ririmi

Yana enxaxamelweni wa vumbirhi

Nghena endzeni

Timbhoni Ta Yehovha

Xitsonga

Vatirhi Va Ku Tirhandzela Lava Akaka eTuxedo

Vatirhi Va Ku Tirhandzela Lava Akaka eTuxedo

Nkarhi a ku ri 6:45 nimixo eTuxedo le New York. A ri xe kahle ku nga ri na mapapa, va xinuna ni va xisati a va ri karhi va nghena eka muako wa swithezi swa mune lowu etlhelo ka wona ku nga ni tiva leritsongo leri a ri funengetiwe hi gamboko. Vatirhi lava, lava ambaleke swiambalo swo tirha va suka eka tihotela ta kwalaho, emakaya ya vona, van’wana ePatterson, Wallkill, Brooklyn ni le tindhawini tin’wana leti nga ekule hi tikhilomitara ta 80.

Vunyingi bya vatirhi volavo, va suka etindhawini ta le kule swinene ta le United States ni le matikweni man’wana. Va tinyiketele hi ku tirhandzela leswaku va ta tirha laha—van’wana ku ringana vhiki, van’wana mavhiki ya tsevu kasi van’wana ku tlula kwalaho. Va lo tihakelela riendzo ra vona naswona va tirha hi ku tirhandzela, a va holeriwi. Hambiswiritano, va tsaka ngopfu hi ku tirha laha.

Namuntlha ku ni vatirhi va ku tirhandzela va kwalomu ka 120 naswona nhlayo yoleyo yi ta andza eka tin’hweti leti taka. Loko va nghena laha ku dyeriwaka kona, va tshama va ri khume eka tafula ha rin’we naswona van’wana va tsakela ku nwa kofi va ri karhi va twa nun’hwelo lowu taka hi le khixini wa swinyamana swa nguluve. Hi awara ya nkombo nimixo, va hlalela eka tithelevhixini loko ku tlhuvutsiwa ndzimana ya Bibele. Endzhaku ka timete ta 15, vaphameri va namba va sungula ku tisa swakudya ematafuleni. Va tisa swinyamana swa nguluve, xinkwa, matandza ni mukapu wa oats. Swakudya i matutu vana va ntavasi.

Loko va heta ku dya ku pfariwa hi xikhongelo ivi va ya entirhweni. Vatirhi va bula va tsakile va ri karhi va ambala makarapa, manghilazi yo sirhelela mahlo, tivheste to tirha ta mivala yo vonaka ni mabandhi yo chela mathulusi.

Ntirho wa vona i ku cinca Khampani ya International Paper eTuxedo yi va ndhawu leyi va nga ta veka switirho leswi nga ta aka ntsindza wa misava hinkwayo wa Timbhoni ta Yehovha lowu nga ta va eWarwick, ku nga tikhilomitara ti nga ri tingani ku suka kwalaho. Emiakweni leyi a yi ri kona, ku endliwe makamara yo tshama eka wona, tihofisi, tindhawu to tirhela eka tona ni to veka nhundzu. Hi Ravumbirhi, March 12, 2013 huvo ya kwalaho yo pasisa tipulani ta miako yi pasise pulani ya ndhawu ya le Tuxedo.

Xana vatirhi va ku tirhandzela va amukeriwa njhani loko va fika laha va nga ta tshama kona? William la humaka eNew Jersey u ri: “Loko u fika, vanhu lava tirhaka endhawini yo amukela vaendzi va ku komba lomu u nga ta tshama kona ni tindhawu tin’wana ni matirhiselo ya makhiya. Hinkwavo va tsakela ku ku pfuna. Endzhaku ka swakudya swo fihlula, mulanguteri wa ntirho u ku hlamusela ntirho lowu u nga ta wu endla.”

Swi njhani ku tirha endhawini leyi? Yajaira ni nuna wakwe lava humaka ePuerto Rico, va pfuneta ku hoxa tifureme ni tibodo leti ku endliwaka ha tona makhumbi. U ri: “Hi vindzuka hi va-4:30 hi basisa laha hi tshamaka kona, hi nwa kofi ivi hi ya khandziya bazi leri va hi lunghiseleleke rona. Loko ri pela un’wana ni un’wana u va a karhele kambe a tsakile.”

Ndhawu ya Warwick yi rhendzeriwe hi misinya. Zach ni nsati wakwe Beth, lava humaka eMinnesota va pfuneta entirhweni wo aka eWarwick. Loko va vutisiwe leswaku ha yini va ri kwalaho, Beth u te: “A ku na nchumu wo antswa evuton’wini ku tlula ku tirhela Yehovha. Hi lava ku tirhisa vutshila lebyi hi nga na byona entirhweni wa yena.”